།དེ་བཞིན་གཤེགས་པ་ཞབས་མཛེས་དེད་དཔོན་ཚེ། །དེ་བཞིན་གཤེགས་པ་ཆུ་བོ་རྣམ་དག་ལ། །མུ་ཏིག་དག་གིས་གཏོར་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཨུད་པལ་བརྒྱ་བྱིན་ཚེ། །དེ་བཞིན་གཤེགས་པ་ཟླ་བའི་འོད་དེ་ལ། །སྐུ་ཚེའི་འདུ་བྱེད་གཟུང་བར་གསོལ་བཏབ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་དུལ་གནས་མེ་ཏོག་གསེར་རྟོག་ཚེ། །དེ་བཞིན་གཤེགས་པ་དཔའ་བའི་སེམས་དེ་ལ། །གསེར་དག་གིས་ནི་གཏོར་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྤོབས་པ་མཐའ་ཡས་འོད་ཟེར་པད་མ་མཁན། །བྱེད་ཚེ་དེ་བཞིན་གཤེགས་པ་ཐར་པའི་ཤེས་རབ་ལ། །ཤིང་ལས་བྱས་པའི་ལྷུང་བཟེད་དག་ནི་ཕུལ་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་དྲང་སྲོང་གསལ་བ་ཕྲེང་རྒྱུད་ཚེ། །དེ་བཞིན་གཤེགས་པ་དཔའ་བོའི་སེམས་དེ་ལ། །མེ་ཏོག་དག་ལས་བྱས་པའི་གདུགས་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡོན་ཏན་བརྩོན་འགྲུས་ཁྱིམ་བདག་ཚེ། །དེ་བཞིན་གཤེགས་པ་ཙམ་པའི་སྒྲོན་མ་ལ། །འཇམས་གང་ཞིག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་སྙིང་པོ་མར་འཚོང་ཚེ། །དེ་བཞིན་གཤེགས་པ་མཆོད་གནས་དཔལ་དེ་ལ། །ཞུན་མར་སྲང་བརྒྱད་སྙེད་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ལྷ་བདག་ཀ་རན་ཛ་བྱེད་ཚེ། །དེ་བཞིན་གཤེགས་པ་བློ་གྲོས་ལེགས་སེམས་ལ། །བཀྴ་ཀ་དག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རིན་ཆེན་མཐོན་པོ་རྒྱལ་བུའི་ཚེ། །དེ་བཞིན་གཤེགས་པ་གཟི་བརྗིད་དཔལ་དེ་ལ། །སྤོས་དང་ཕྲེང་བ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་གསལ་བ་ཚོང་པའི་ཚེ། །དེ་བཞིན་གཤེགས་པ་སྐྱེ་བོ་དད་པ་ལ། །སྦྲང་རྩི་བལྡག་པར་བྱ་བ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་སྐལ་ལྡན་ཤིང་རྟ་ཅན། །ལྷམ་མཁན་ཚེ་ན་བདེ་གཤེགས་བློ་མཆོག་ལ།