མངལ་འཛིན་པའི་སྐྱོན་རྣམ་པར་སྤངས་པའི་ལུས་དང་ལྡན་པའོ། །ལྷའི་བུ་མོ་བདེ་སོགས་ཞེས་བྱ་བ་དེ་ཤིན་ཏུ་འདོད་པ་ལ་ཆགས་པ་ལས་བྱུང་བའི་སྒེག་པ། རི་རབ་ལ་ཡོད་པའི་གཞལ་མེད་ཁང་དང་། ཤིང་གེལ་པ་དང་འཁྲི་ཤིང་གི་བླ་རེས་ཁེབས་པར་བྱས་པ་ལས་བྱུང་བའི་འདོད་པ་སྐྱེས་པས་བྱུང་བ། མེ་ཏོག་འཐོར་བ་དང་བཅས་པའི་རླུང་ལྡང་བ། ཧ་ཅང་རིང་བ་ཡང་མ་ཡིན། ཧ་ཅང་ཐུང་བ་ཡང་མ་ཡིན། དཀུ་ཧ་ཅང་སྦོམ་པ་ཡང་མ་ཡིན། ཧ་ཅང་ཕྲ་བ་ཡང་མ་ཡིན་པ། ལུས་ཧ་ཅང་སྦོམ་པ་ཡང་མ་ཡིན། ཧ་ཅང་ཕྲ་བ་ཡང་མ་ཡིན་པ། བཞིན་མདངས་ཅན། གཙང་ཞིང་མཛེས་པ། པད་མ་འདོད་པ། དྲི་རབ་ཏུ་ཞིམ་པའི་དྲིའི་ངད་རླུང་གིས་བདས་པ་རྨད་དུ་བྱུང་བས་མཛེས་པར་བྱས་པའོ། །དྲང་སྲོང་ཆེན་པོ་དེ་ལྟར་སུམ་ཅུ་རྩ་གསུམ་རིས་ཀྱི་ལྷ་དེ་དག་ནི་ནད་མེད་པ། རིམས་ནད་མེད་པ། སྐྱེད་མོས་ཚལ་དང་། ནགས་ཚལ་དང་། གཞལ་མེད་ཁང་གི་གནས་ཀྱི་ནང་ན་གནས་ཤིང་རྒྱུ་བའོ། །དེ་དག་གི་ཚེ་ནི་ལྷའི་ལོ་སྟོང་ཐུབ་བོ། །དེ་དག་ལྷའི་གནས་དེ་ན་གནས་པ་ལས་བསོད་ནམས་ཟད་ནས་ཚེ་ཟད་པར་གྱུར་པའི་ཚེ་ཤི་འཕོ་བའི་ལྟས་སྔོན་མ་བྱུང་བ་ལྔ་འབྱུང་སྟེ། རྫིང་བུ་ཤེལ་རྡོ་ལྟར་གསལ་བ། རེག་ན་བདེ་བའི་རླུང་ལྡང་བ། རྫིང་བུའི་འགྲམ་འཁྲི་ཤིང་གི་བླ་རེ་དང་། ཤིང་གེལ་པ་ཕུན་སུམ་ཚོགས་པ་དང་ལྡན་པར་ཞུགས་པ་ན་འབྲུ་མར་གྱིས་གཏོར་བ་ལྟ་བུ་འབྱུང་ངོ་། །དེས་འབྲུ་མར་གྱིས་གཏོར་བ་དེ་མཐོང་ནས་སྙིང་དངངས་སྐྲག་སྟེ། རྫིང་བུ་དེ་ནས་བྱུང་ནས་ནགས་སྟུག་པོར་རྒྱུག་ཅིང་བྲོས་སོ། །དེ་རིངས་པར་འགྲོ་བ་ལྷའི་བུ་མོ་དེ་དག་གི་མཐོང་ནས་ཕྱི་བཞིན་དུ་འབྲངས་པ་དང་། དེ་ནགས་སྟུག་པོ་དེའི་ནང་ན་ཤིང་དྲུང་ཞིག་ན་གནས་ཤིང་འདུག་གོ །དེ་ནས་ལྷའི་བུ་མོ་དེ་དག་སྙིང་རྗེ་རྗེ་སྐད་དུ་ག་ཆད་པར་ངུ་ཞིང་འདི་སྐད་ཅེས་ཇོ་ཅོ་བདག་ཅག་བོར་ཏེ་གཅིག་པུ་ཤིང་དྲུང་འདི་ན་ཅི་དགའ་ཞེས་འཛེར་ཏེ་དེ་ངུ་ཞིང་དམན་པའི་སྒྲས་སླར་འདི་སྐད་ཅེས་སྨྲས་སོ། །བདག་འདི་ན་སྔོན་མ་བྱུང་བ་འབྲུ་མར་གྱིས་གཏོར་བ་ལྟ་བུ་ལུས་ལས་བྱུང་ངོ་ཞེས་དེ་སྐད་སྨྲས་པ་དང་། མཆན་ཁུང་གཉིས་ནས་རྔུལ་བྱུང་ནས། དེ་དག་གིས་རྔུལ་བྱུང་བ་མཐོང་བ་དང་། ལྷའི་བུ་མོ་དེ་དག་རིང་དུ་དོང་སྟེ་ཡོངས་སུ་སྤངས་སོ། །དེས་ཡོངས་སུ་སྤངས་པར་ཤེས་ནས་མྱ་ངན་གྱིས་རེག་གོ །དེ་མྱ་ངན་གྱིས་རེག་པས་དབུགས་དྲག་ཏུ་རྒྱུའོ།