།དེའི་ཆོ་འཕྲུལ་དེ་དྲང་སྲོང་ཆེན་པོ་རྒྱས་པས་མཐོང་ནས་སྙིང་འཕར་ཞིང་སྟན་ལས་ལངས་ཏེ་ཐལ་མོ་སྦྱར་ནས་རབ་ཏུ་ངོ་མཚར་དུ་གྱུར་པས་སྒྲ་ཆེར་ཀྱེ་ཨ་ལ་ལ་ལེགས་སོ། །གང་གི་ཕྱིར་བདག་དེ་བཞིན་གཤེགས་པ་དང་ཕྲད་ཅིང་འདུས་ལ་ཐམས་ཅད་མཁྱེན་པའི་སྒོ་ནས་འདི་ལྟ་བུ་སྔོན་མ་མཐོང་བའི་ཆོ་འཕྲུལ་མཐོང་བ་མི་ཉིད་ཐོབ་པ་བདག་དོན་མཆིས་སོ། །བཅོམ་ལྡན་འདས་ཀྱིས་དྲང་སྲོང་ཆེན་པོ་རྒྱས་པ་ལ་འདི་སྐད་ཅེས་བཀའ་སྩལ་ཏོ། །དྲང་སྲོང་ཆེན་པོ་འདི་ཇི་སྙམ་དུ་སེམས། དབང་པོ་ཆེན་པོའི་ལུས་དང་། གང་འདི་དགེ་སློང་མ་འགགས་པའི་ལུས་གསེར་འབར་བ་དང་། ནོར་བུ་མཆོག་ལས་གྲུབ་པ་འདི་གཉིས་གང་བཟང་། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་དྲང་སྲོང་ཆེན་པོ་རྒྱས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་འདི་དགེ་སློང་མ་འགགས་པའི་ལུས་དེ་ལ་དབང་པོ་ཆེན་པོའི་ལུས་ཀྱིས་བརྒྱའི་ཆར་ཡང་ཉེ་བར་མི་མཆི། སྟོང་གི་ཆ་དང་། བརྒྱ་སྟོང་གི་ཆའམ། གྲངས་སམ། ཆར་རམ། བགྲང་བར་རམ། དཔེར་ཡང་མི་བཟོད་དོ། །དྲང་སྲོང་ཆེན་པོ་བསོད་ནམས་ལས་བསྒྲུབས་པའི་ལུས་ལ་དགེ་བའི་རྩ་བ་བསྔོས་པའི་ཁྱད་པར་ནི་དེ་ལྟར་བལྟའོ། །དྲང་སྲོང་ཆེན་པོ་སུམ་ཅུ་རྩ་གསུམ་གྱི་ལྷའི་རིས་དེ་ན། བརྒྱ་བྱིན་གྱི་ཆུང་མའི་དམ་པ་བདེ་སོགས་ཞེས་བྱ་བ་ལྷའི་བུ་མོ་བརྒྱ་སྟོང་གིས་ཡོངས་སུ་བསྐོར་ཅིང་དགའ་ཚལ་ན་འདུག་སྟེ། ལུས་སྤོས་དང་། ཕྲེང་བ་དང་། མེ་ཏོག་གིས་བརྒྱན་ཅིང་འབར་བ། ལྷའི་མེ་ཏོག་པད་མ་དང་། ཨུད་པ་ལ་དྲི་རབ་ཏུ་ཞིམ་པའི་དྲི་དང་ལྡན་པ། མཆུ་གསེར་དང་བིམ་པ་འདྲ་བ། མཆོག་ཏུ་འབར་བའི་ཆ་བྱད་འཛིན་པ། མཆོག་ཏུ་ཕྲལ་འཚེར་བ། སྐྱེད་མོས་ཚལ་དང་ནགས་ན་རྒྱུ་བ། ལྷའི་རྒྱན་དང་། རྐང་གདུབ་དང་། གདུ་བུ་དང་། གདུ་བུ་བསྒྲིལ་མ་དང་། དོ་ཤལ་དང་། སེ་མོ་དོས་ལུས་དུད་པ། འཕྲལ་བ་དང་མཁུར་བ་ཆེ་ལ་ཤིན་ཏུ་རྣམ་པར་ཕྱེ་བ། ནོར་བུ་དང་གསེར་ཤིན་ཏུ་རྣམ་པར་ཕྱེ་བའི་སྐ་རགས་ཀྱིས་བཅིངས་པ་འཇོ་ཞིང་སྒེག་པའི་རྗེས་སུ་ཆགས་པ། མིག་རིང་ཞིང་ཕྱེ་ལ་འཛུམ་པ། ལག་པའི་ནང་རི་མོ་རིང་པོས་ཁྱབ་པ། ལྟེ་བ་ཟབ་པ། ཁྲོ་བ་དང་། སེར་སྣ་དང་། ཕྲག་དོག་དང་། འཐབ་པ་དང་། རྩོད་པའི་ཉེས་པ་སྤངས་པ། བཞིན་ཁྲོ་གཉེར་གྱི་རིམ་པ་གཡོ་བ་དང་བྲལ་བ། མངལ་འཛིན་པའི་སྐྱོན་རྣམ་པར་སྤངས་པའི་ལུས་དང་ལྡན་པའོ།