Degé Kangyur volume 101, F.56.a

གཟུངས་སྔགས་ཀྱི་ཚིག་འདི་དག་འཇིག་རྟེན་དུ་འབྱུང་བ་ནི་དེ་ལྟ་མ་ཡིན་ནོ། །​རིགས་ཀྱི་བུ་དག་གལ་ཏེ་སེམས་ཅན་མནར་མེད་པ་ན་འཁོད་པ་བསྐལ་པར་གནས་པ། མཚམས་མེད་པ་ལྔ་བྱེད་བྱེད་པ། དམ་པའི་ཆོས་སྤོང་བར་བྱེད་པའི་སེམས་ཅན་དེ་དག་གི་ཕྱིར་གཟུངས་སྔགས་ཀྱི་ཚིག་འདི་དག་ཞག་ཉི་ཤུ་རྩ་གཅིག་གི་བར་དུ་ཉིན་ལན་གསུམ་མཚན་ལན་གསུམ་བརྗོད་ན། དེའི་ཚེ་གཟུངས་སྔགས་ཀྱི་ཚིག་འདི་དག་གི་མཐུས་སེམས་ཅན་དམྱལ་བ་ཆེན་པོ་མནར་མེད་པ་ཁ་བརྒྱར་འགྱེས་པར་འགྱུར་ལ། སེམས་ཅན་དེ་དག་ཀྱང་ཡོངས་སུ་ཐར་བར་འགྱུར་ན་འཛམ་བུའི་གླིང་བའི་མི་རྣམས་ལྟ་ཅི་སྨོས་ཏེ། གང་དག་གི་རྣ་ལམ་དུ་གྲག་པར་གྱུར་པ་དེ་དག་གིས་ནི་བདག་ཅག་ནི་དེ་བཞིན་གཤེགས་པ་བཞི་པོ་རྣམས་དང་། བྱང་ཆུབ་སེམས་དཔའ་བཞི་པོ་རྣམས་དང་། ཟླ་བ་དང་ཉི་མ་རྣམས་ཀྱིས་ཡོངས་སུ་ཟིན་པ་ཡིན་ནོ་སྙམ་དུ་ཤེས་པ་ཁོ་ནར་བྱ་སྟེ། འདི་ལ་སོམ་ཉིའམ་ཡིད་གཉིས་བསྐྱེད་པར་མི་བྱའོ། །​ཏདྱ་ཐཱ། དྷུ་ན་ཊི། དྷུ་ན་ཊི། མ་ཧཱ་དྷུ་ན་ཊི། སུ་རུ་སུ་རུ་སྭཱ་ཧཱ། ཤུ་ཀླ་བི་ཤོ་དྷ་ནི། ཏ་ར་ཏ་ར་སྭཱ་ཧཱ། ཛྱོ་ཏིཥྠ་དཱི་པེ། ཏུ་རུ་ཏུ་རུ་སྭཱ་ཧཱ། པདྨ་མཱ་ལི་ནི། སཏྱ་ཏ་ར་བུདྡྷི། ཧུ་རུ་ཧུ་རུ་སྭཱ་ཧཱ། སཏྱ་བུདྡྷི། སཏྱ་ཨ་བ་ལོ་ཀི་ནི། ཀ་ར་ཀ་ར། ཀི་རི་ཀི་རི་སྭཱ་ཧཱ། དྷ་ར་ན་བུ་ཊི། ཨ་པྲ་ཏི་ཧ་ཏ་བུདྡྷི། ཙུ་རུ་ཙུ་རུ་སྭཱ་ཧཱ། ལཀྵ་ཎི་ཙི་ཏེ། དྷཱུ་མ་པ་རི་ཧ་རེ། ཧུ་རུ་ཧུ་རུ། ཁུ་རུ་ཁུ་རུ་སྭཱ་ཧཱ། དྷ་ར་དྷ་ར། མཱ་དྷ་ར། དྷ་ར་དྷ་ར། དྷ་ར་ཡནྟི་ཡེ་སྭཱ་ཧཱ། སུ་པྲ་ཏི། སུ་མ་ཏི། ཨ་པྲ་ཏི་ཧ་ཏ། བུདྡྷི། དྷ་ར་དྷ་ར། དྷ་ར་ཡནྟི་ཡེ་སྭཱ་ཧཱ། བཅོམ་ལྡན་འདས་དེ་བཞིན་གཤེགས་པ་ཡེ་ཤེས་ཏ་ལ་ལ་ལ་ཕྱག་འཚལ་ལོ། །​དེ་བཞིན་གཤེགས་པ་གསེར་གྱི་འོད་བརྩེགས་སྣང་བ་ལ་ཕྱག་འཚལ་ལོ། །​དེ་བཞིན་གཤེགས་པ་བདེན་གསུང་ལ་ཕྱག་འཚལ་ལོ། །​དེ་བཞིན་གཤེགས་པ་འཇིགས་པའི་སྒྲ་སྒྲོགས་རྒྱལ་པོ་ལ་ཕྱག་འཚལ་ལོ། །​སྭཱ་ཧཱ། འཕགས་པ་ཡེ་ཤེས་ཏ་ལ་ལ་ཞེས་བྱ་བའི་གཟུངས་འགྲོ་བ་ཐམས་ཅད་ཡོངས་སུ་སྦྱོང་བ་རྫོགས་སོ།​། །​།



The English translation of this folio by 84000 - Translating the words of the Buddha can be found at:
https://read.84000.co/translation/toh848.html?part=UT22084-088-016-67#UT22084-088-016-67