Degé Kangyur volume 101, F.55.b

མུན་པ་མུན་ནག་བསལ་བའི་ཕྱིར་ཤར་བའི་གཟུངས་སྔགས་ཕྱོགས་བཅུར་ཁྱབ་པའི་བློ་ཅན་ཞེས་བྱ་བ་གང་གི་མཐུས་བདག་ཅག་སེམས་ཅན་ཐམས་ཅད་ལ་སྣང་བར་བྱེད་པ་ཐོབ་པར་འགྱུར་ཞིག་གུ་སྙམ་མོ། །​དེ་ནས་དེ་བཞིན་གཤེགས་པ་དེ་དག་དང་། བྱང་ཆུབ་སེམས་དཔའ་དེ་དག་གིས་ལྷའི་བུ་ཟླ་བ་དང་ཉི་མ་དེ་དག་གི་སེམས་ཀྱི་ཡོངས་སུ་རྟོག་པ་ཐུགས་ཀྱིས་མཁྱེན་ནས། དེའི་ཚེ་དེ་བཞིན་གཤེགས་པ་བྱང་ཆུབ་སེམས་དཔའ་དང་བཅས་པ་དེ་དག་གིས་གཟུངས་སྔགས་འདི་བཀའ་སྩལ་པ། སྱཱདྻ་ཐེ་དན། ཙཀྵུརྡ་ད། ཙཀྵུ་ཤྴུ་བྷ་དྷུ་ལ་མེ་ཐཱ་ཀ་ལ་ཏྠ། ཨིཏྟི་ཏྠནྶ་སཱུ་རཊྚ། སཱུ་རཊྚ། སུདྠཱ་ཡ། ཨིཏྠནྶཱ། བེ་ལཱ་བེ་ལཱ་པཱ་ཎི་ཙ་རུ་མཱུརྟི་ནི། ཨཱ་ར་ཎི། ཨཱ་ར་ཎི། ཀཱ་ལ་པཱ་ཎི། ཀཱ་ལ་པཱ་ཎི། ཏུ་རུ་དུ་སི། ཏུ་རུ་དུ་སི། དྷ་སུ་ཏེ། དྷ་སུ་ཏི། དྷི་རི་དྷི་རི། དྷུ་ར་དྷུ་ར། དྷུ་རུ་དྷུ་ར། ཀཱ་ལ་ཀཱ་ལ། སཏྠཱ་ས། གཱི་ལ་གཱི་ལ། གཱི་ལ་བ་ཡ། གཱི་ལ་བ་ཡ། དྷུ་སུ་དྷུ་སུ། སུནྡྷུ་སུནྡྷུ། སཏྠཱ་སུ། ཨཏྠཱ་སུ། ཨེ་ཐཱ་སུ། ཨེ་ཐཱ་སཱ་པཱ་ནི། ཡུ་ཙུ་རེ་དྷེ། སུ་དྷ་རེ། ཀ་ར་ཀ་ར། ཀི་རི་ཀི་རི། ཀུ་རུ་ཀུ་རུ། ཀུརྨ་ཀུརྨ། ཀུརྨ་པཱ་ཎི། ཀུརྨ་བཱ་ཎི། ཀེ་ལུ་ཀེ་ལུ། ཀེ་ལ་པཱ་ཎི། ཀེ་ལ་པཱ་ཎི། ཀརྐཱ་རི། ཀརྐཱ་རི། ལ་རུ་བུདྡྷེ། དྷུ་རུ་དྷེ། དྷུ་རུ་དྷེ། མ་ཧཱ་དྷུ་རུ་དྷེ། ཀ་ར་ཀ་ར། ཀི་རི་ཀི་རི། བི་ཧུ་སི། བི་ཧུ་སི། དྷ་སུ་དྷ་སུ། ཧ་སུ་ཧ་སུ། ཧ་སུ་པ་ནི་སྭཱ་ཧཱ། དེ་ནས་བྱང་ཆུབ་སེམས་དཔའ་ཀུན་དུ་བཟང་པོས་ལྷའི་བུ་ཟླ་བ་དང་ཉི་མ་གཉིས་ལ་འདི་སྐད་ཅེས་སྨྲས་སོ། །​ཀྱེ་མ་རིགས་ཀྱི་བུ་དག་གཟུངས་སྔགས་འདི་ནི་སེམས་ཅན་ངན་སོང་དུ་འགྲོ་བ་རྣམས་ལ་ཕན་གདགས་པའི་ཕྱིར་སངས་རྒྱས་བྱེ་བ་ཕྲག་བརྒྱད་ཅུ་རྩ་བཞིས་གསུངས་པ་ཡིན་ཏེ། རིགས་ཀྱི་བུ་དག་ཨུ་དུམ་བཱ་རའི་མེ་ཏོག་ནི་ཆེས་རྙེད་པར་སླའི། གཟུངས་སྔགས་ཀྱི་ཚིག་འདི་དག་ནི་འཇིག་རྟེན་དུ་འབྱུང་བ་ནི་དེ་ལྟ་མ་ཡིན་ནོ། །རིགས་ཀྱི་བུ་དག་གཟུངས་སྔགས་ཀྱི་ཚིག་འདི་དག་ནི་ཆེས་རྙེད་པར་སླའི། འདི་དག་ནི་འཆང་བའམ་ཀློག་པ་ནི་དེ་ལྟ་མ་ཡིན་ནོ། །​རིགས་ཀྱི་བུ་དག་སངས་རྒྱས་འབྱུང་བ་ནི་ཆེས་རྙེད་པར་སླའི། གཟུངས་སྔགས་ཀྱི་ཚིག་འདི་དག་འཇིག་རྟེན་དུ་འབྱུང་བ་ནི་དེ་ལྟ་མ་ཡིན་ནོ།



The English translation of this folio by 84000 - Translating the words of the Buddha can be found at:
https://read.84000.co/translation/toh848.html?part=UT22084-088-016-66#UT22084-088-016-66