བྱས་པ་མི་གཟོ་བར་བགྱི་བ་མ་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོ་ལ་ལེགས་སོ་ཞེས་བྱ་བ་བྱིན་ཏེ། ཀྱེ་རྒྱལ་བའི་སྲས་ལེགས་སོ་ལེགས་སོ། །ཁྱོད་ནི་དེ་བཞིན་གཤེགས་པ་རྣམས་ཀྱི་སྲས་ཀྱི་ཐུ་བོ་དང་། གཙོ་བོ་དང་། མཆོག་དང་དམ་པ་དང་ཕུལ་ཡིན་ཏེ། ཆོས་ཀྱི་རྣམ་གྲངས་འདི་ཁྱོད་ལ་ཡོངས་སུ་གཏད་དོ། །འདི་ནི་ངའི་སྟོན་པ་ཡིན་ཏེ། དེའི་ཕྱིར་ཁྱོད་ཀྱིས་བསྲུང་བར་བྱའོ། །དུས་དུས་སུ་བསྟི་སྟང་གྱིས་ཤིག །རིན་པོ་ཆེའི་སྣོད་དུ་ཆུག་ལ་ཕྲག་པ་ལ་ཐོགས་ཤིག། ཕྱི་མའི་ཚེ་ཕྱི་མའི་དུས་ན་དགེ་སློང་སྡིག་པ་ཅན་དེ་དག་ལ་ཡིད་མ་རྟོན་ཅིག །རིགས་ཀྱི་བུ་འདི་ནི་ཁྱོད་ལ་རྗེས་སུ་བསྟན་པའོ། །བྱང་ཆུབ་སེམས་དཔའ་ཀུན་ཏུ་བཟང་པོས་གསོལ་པ། བཅོམ་ལྡན་འདས་རབ་ཏུ་བྱུང་བ་ཅི་འདྲ་བ་དེ་དག་འབྱུང་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁ་རོག་དེ་སྐད་མ་འདྲི་ཤིག །བྱང་ཆུབ་སེམས་དཔའ་ཀུན་ཏུ་བཟང་པོས་གསོལ་པ། སེམས་ཅན་མང་པོ་ལ་སྨན་པར་བགྱིད་པར་འགྱུར་ལགས་ན། བཅོམ་ལྡན་འདས་ཀྱིས་བཤད་དུ་གསོལ། བདེ་བར་གཤེགས་པས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀུན་ཏུ་བཟང་པོ་བཤད་ཀྱིས་ཉོན་ཅིག །འཁོར་རྒྱ་མཚོ་ལྟ་བུ་འདི་དང་འཇམ་དཔལ་དང་སྤྱན་རས་གཟིགས་དབང་ཕྱུག་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པ་ཐམས་ཅད་ཡིད་ལ་བྱེད་པ་གཞན་ཐོང་ལ། ཕྱི་མའི་ཚེ་ཕྱི་མའི་དུས་ན་རབ་ཏུ་བྱུང་བ་ཅི་འདྲ་བ་དག་འབྱུང་བར་འགྱུར་བ་དེ་དག་ཉོན་ཅིག །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོ་ལ་འདི་སྐད་ཅེས་བཀའ་སྩལ་ཏོ། །ཀུན་ཏུ་བཟང་པོ་རབ་ཏུ་བྱུང་བ་དམ་པའི་ཆོས་སུན་འབྱིན་པ། ཁྱིམ་ལ་ཆགས་པ། རྙེད་པ་ལ་ཆགས་པ། གཙུག་ལག་ཁང་ལ་ཆགས་པ། གནས་ལ་ཆགས་པ། ལྷུང་བཟེད་དང་ཆོས་གོས་ལ་ཆགས་པ། ཁྱིམ་སུན་པར་བྱེད་པ། སྡིག་པའི་ཆོས་ཀུན་དུ་སྤྱོད་པ་དེ་དག་འབྱུང་སྟེ།