ཇི་ལྟར་མི་དབུལ་པོ་གཞན་གྱི་ངོར་ལྟ་བ་དང་འདྲ་སྟེ། དེ་དག་གི་དོན་དུ་ངས་དཔེ་འདི་བྱས་ན་ཅི་ནས་སེམས་ཅན་རྣམས་ཆོས་རིན་པོ་ཆེའི་ཕུང་པོ་འདི་འདྲ་བ་ལས་རིང་དུ་མི་འགྱུར་བར་བྱ་བའི་ཕྱིར་ཆོས་ཀྱི་རྣམ་གྲངས་འདིའི་ཆེད་དང་སེམས་ཅན་ཐམས་ཅད་ཀྱི་དོན་དུ་ད་ཁྱོད་ལ་གསོལ་བ་འདེབས་ན་རིགས་ཀྱི་བུ་ཁྱོད་སྤྲོའམ། དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ངུ་ཞིང་བྱང་ཆུབ་སེམས་དཔའ་ཀུན་ཏུ་བཟང་པོ་རང་གི་ཆོས་ཀྱི་སྟན་ལས་ལངས་མ་ཐག་ཏུ་དེ་ནས་དེའི་མོད་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་དུ་རབ་ཏུ་གཡོས་སོ། །འགུལ། རབ་ཏུ་འགུལ། ཀུན་ཏུ་རབ་ཏུ་འགུལ་ཏོ།།ལྡེག །རབ་ཏུ་ལྡེག །ཀུན་ཏུ་རབ་ཏུ་ལྡེག་གོ། །འུར་འུར། རབ་ཏུ་འུར་འུར། ཀུན་ཏུ་རབ་ཏུ་འུར་འུར་རོ། །ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ་མོ། །འཁྲུགས། རབ་ཏུ་འཁྲུགས། ཀུན་ཏུ་རབ་ཏུ་འཁྲུགས་སོ། །འཇིག་རྟེན་དུ་སྣང་བ་ཆེན་པོ་ཡང་བྱུང་བར་གྱུར་ཏོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་སོར་མོ་བཅུ་ཐལ་མོ་སྦྱར་ཏེ་ངུ་ཞིང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་སྤྲོ་ལགས་སོ། །བདེ་བར་གཤེགས་པ་བདག་སྤྲོ་ལགས་སོ། །བཅོམ་ལྡན་འདས་ཁྱོད་ནི་ཐམས་ཅད་མཁྱེན་པ། སེམས་ཅན་ཐམས་ཅད་ལ་ཕན་པར་བཞེད་པ། ཐུགས་རྗེ་ཆེན་པོ་དང་ལྡན་པ་ལགས་ཀྱི་སྟེང་དུ་བདག་ནི་དེ་བཞིན་གཤེགས་པ་ལས་སྐྱེས་པ་ལགས་ན། ཅིའི་སླད་དུ་དེ་བཞིན་གཤེགས་པའི་བཀའ་ལྟར་མི་བགྱིད། བཅོམ་ལྡན་འདས་དེ་བཞིན་གཤེགས་པའི་བཀའ་ནི་བདུད་རྩིའི་བཀའ་ལགས་ན། བདག་དེ་བཞིན་གཤེགས་པའི་བཀའ་དང་འགལ་བར་བགྱིད་པའི་མཐུ་བདག་ལ་ག་ལ་མཆིས། བཅོམ་ལྡན་འདས་བདག་གིས་ནི་བྱས་པ་གཟོ་བར་བགྱི་བ་ལགས་ཀྱི། བྱས་པ་མི་གཟོ་བར་བགྱི་བ་མ་ལགས་སོ།