།རྣམ་པར་སྨིན་དང་འཁོར་དང་མྱ་ངན་འདས། །རྣམ་པར་དབྱེ་བ་རྒྱལ་བའི་སྲས་ཀྱིས་ཤེས། །དེ་ཐུགས་སྐྱེས་པའི་བྱང་ཆུབ་སེམས་དཔར་བརྗོད། །ཐམས་ཅད་མཁྱེན་པ་འདས་དང་བྱུང་རྣམས་དང་། །མ་བྱོན་དག་ཀྱང་ཆོས་རྣམས་རྣམ་དཔྱད་ནས། །གྲུབ་དང་གང་ཡང་ལེགས་སྐྱེས་མཐར་ཐུག་དང་། །རང་བྱུང་རྣམས་ཀྱི་གྲུབ་པ་ཅི་འདྲ་བ། །སངས་རྒྱས་དམ་པ་དེ་དག་ཐམས་ཅད་ནི། །དུས་གསུམ་མཉམ་ཉིད་རྗེས་སུ་ཞུགས་པ་ཤེས། །ནམ་ཡང་མཉམ་ཉིད་བྱེ་བྲག་འབྱེད་མི་བྱེད། །དེ་ནི་དུས་གསུམ་ཐ་དད་མེད་པར་འཇུག །གང་གི་ཕན་ཡོན་རྣམ་པ་འདི་འདྲ་བ། །དེ་ནི་བྱང་ཆུབ་སེམས་དཔའ་བཞི་པ་སྟེ། །འདི་དག་རབ་བསྒྲུབས་བྱང་ཆུབ་སེམས་དཔའ་དེ། །བྱང་ཆུབ་དོན་དུ་ངེས་པར་འབྱུང་བར་འགྱུར། །དེ་ལྟར་བྱང་ཆུབ་སེམས་དཔའ་ལྔ་པ་སྟེ། །སྦྱོར་བ་ཕུན་སུམ་ཚོགས་པར་བརྗོད་པ་ཡིན། །ཐབས་ལ་མཁས་པའི་རྗེས་སུ་ཞུགས་པ་སྟེ། །བསོད་ནམས་ལས་དག་བརྩམས་པས་མཐར་ཕྱིན་བྱེད། །དེ་ལྟར་བསོད་ནམས་རབ་ཏུ་ཅི་བྱེད་ཀྱང་། །འཇིག་རྟེན་ཀུན་གྱི་རྟེན་དུ་འགྱུར་བ་དང་། །ཕན་པར་འདོད་དང་བདེ་བ་ཐོབ་བྱེད་དང་། །སྙིང་བརྩེ་བ་དང་སྐྱེ་དགུ་དགྲོལ་འགྱུར་བྱེད། །འཇིག་རྟེན་གནོད་གྱུར་གདུལ་བར་བྱ་བའི་ཕྱིར། །འདྲེན་པར་བྱེད་ཅིང་རབ་ཏུ་དང་བར་བྱེད། །སེམས་ཅན་མང་པོ་ཐམས་ཅད་གདུལ་འདོད་དང་། །མྱ་ངན་འདས་པའི་སེམས་ཀྱིས་མཐུ་ཡང་ཆེ། །འཇིག་རྟེན་ཐམས་ཅད་མཐའ་མ་མེད་པ་དང་། །དེ་བཞིན་དཔག་ཏུ་མེད་ཅིང་གྲངས་མེད་དང་། །མཚུངས་མེད་བསམ་ཡས་མཉམ་མེད་གཞལ་ཡས་དང་། །སྟོང་པ་མི་གཡོ་མེད་པའི་རང་བཞིན་ཤེས། །དེ་ནི་བྱང་ཆུབ་སེམས་དཔའ་ལྔ་པ་སྟེ། །སྦྱོར་བ་ཕུན་ཚོགས་ཕན་དང་སྙིང་བརྩེ་ལྡན། །དེ་ལ་རྗེས་སུ་བསྟན་པ་འདི་འདྲ་སྟེ། །ཡོན་ཏན་ཀུན་དང་ལྡན་པ་རྣམས་ཀྱིས་བསྟན། །དེ་ནི་སེམས་ཅན་མཐའ་ཡས་ཐམས་ཅད་དང་། །ཆོས་ཀྱི་ངོ་བོ་ཉིད་ལ་རྨོངས་པ་མེད། །ཤིན་ཏུ་བློ་ལྡན་རྟོག་བྲལ་རྣམ་རྟོག་མེད།