ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དག་ཐབས་མཁས་པས། བསམ་གཏན་དང་པོ་ལ་ཡང་སྙོམས་པར་འཇུག །བསམ་གཏན་གཉིས་པ་ལ་ཡང་སྙོམས་པར་འཇུག །བསམ་གཏན་གསུམ་པ་ལ་ཡང་སྙོམས་པར་འཇུག །བསམ་གཏན་བཞི་པ་ལ་ཡང་སྙོམས་པར་འཇུག །བྱམས་པ་ལ་ཡང་སྙོམས་པར་འཇུག །སྙིང་རྗེ་ལ་ཡང་སྙོམས་པར་འཇུག །དགའ་བ་ལ་ཡང་སྙོམས་པར་འཇུག །བཏང་སྙོམས་ལ་ཡང་སྙོམས་པར་འཇུག །ནམ་མཁའ་མཐའ་ཡས་སྐྱེ་མཆེད་ལ་ཡང་སྙོམས་པར་འཇུག །རྣམ་ཤེས་མཐའ་ཡས་སྐྱེ་མཆེད་ལ་ཡང་སྙོམས་པར་འཇུག །ཅུང་ཟད་མེད་པའི་སྐྱེ་མཆེད་ལ་ཡང་སྙོམས་པར་འཇུག །འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་ཡང་སྙོམས་པར་འཇུག །དྲན་པ་ཉེ་བར་གཞག་པ་བཞི་ལ་ཡང་ཡོངས་སུ་སྒོམ། ཡང་དག་པར་སྤོང་བ་བཞི་ལ་ཡང་ཡོངས་སུ་སྒོམ། རྫུ་འཕྲུལ་གྱི་རྐང་པ་བཞི་ལ་ཡང་ཡོངས་སུ་སྒོམ། དབང་པོ་ལྔ་ལ་ཡང་ཡོངས་སུ་སྒོམ། སྟོབས་ལྔ་ལ་ཡང་ཡོངས་སུ་སྒོམ། བྱང་ཆུབ་ཀྱི་ཡན་ལག་བདུན་ལ་ཡང་ཡོངས་སུ་སྒོམ། འཕགས་པའི་ལམ་ཡན་ལག་བརྒྱད་པ་ལ་ཡང་ཡོངས་སུ་སྒོམ། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་ཏིང་ངེ་འཛིན་ལ་ཡང་སྙོམས་པར་འཇུག་ཅིང་དེ་དག་གི་དབང་གིས་མི་སྐྱེ་བ་ཡང་ཡོད་དེ། དེ་དག་སངས་རྒྱས་བཅོམ་ལྡན་འདས་མངོན་དུ་གྱུར་པ་རྣམས་བསྙེན་བཀུར་ཅིང་། དེ་དག་ཏུ་ཚངས་པའི་སྤྱོད་པ་སྤྱད་དེ། དགའ་ལྡན་གྱི་ལྷ་དང་སྐལ་བ་མཉམ་པར་སྐྱེའོ། །དེ་དག་དེར་ཚེའི་ཚུལ་བཞིན་དུ་གནས་ནས། དབང་པོ་མཉམ་པ་དང་། དྲན་ཞིང་ཤེས་བཞིན་དུ་ལྷ་བྱེ་བ་ཁྲག་ཁྲིག་བརྒྱ་སྟོང་དུ་མས་བསྐོར་ཏེ། མདུན་དུ་བྱས་ནས་འདིར་སྐྱེ་བ་བསྟན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ནས། སངས་རྒྱས་ཀྱི་ཞིང་སྣ་ཚོགས་དག་ཏུ་ཆོས་ཀྱི་འཁོར་ལོ་སྐོར་བ་དག་ཀྱང་ཡོད་དོ།། །།ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ། བམ་པོ་བཅུ་གཅིག་པ།