མ་སྐྱེས་པའི་ཆོས་མ་སྐྱེས་པའི་ཆོས་ཞེས་བྱ་བ་བརྗོད་པ་ལ་བདག་གིས་སྤོབས་པ་མྱེད་དོ། །ཚེ་དང་ལྡན་པ་ཤ་ར་དྭ་ཏིའི་བུ། ཆོས་མ་སྐྱེས་པ་རྣམས་ཀྱི་སྐྱེ་བ་མྱེད་པ་ཡང་བདག་གིས་ནི་བརྗོད་པར་སྤོབས་པ་མེད་དེ། དེ་ཅིའི་ཕྱིར་ཞེ་ན། ཚེ་དང་ལྡན་པ་ཤ་ར་དྭ་ཏིའི་བུ། འདི་ལྟར་མ་སྐྱེས་པའི་ཆོས་གང་ཡིན་པ་དང་། སྐྱེ་བ་མེད་པ་གང་ཡིན་པ་དང་། སྤོབས་པ་གང་ཡིན་པ་དང་། བརྗོད་པ་གང་ཡིན་པ་དང་། མྱི་སྐྱེ་བ་གང་ཡིན་པའི་ཆོས་དེ་དག་ཐམས་ཅད་ཀྱང་ལྡན་པ་ཡང་མ་ཡིན་མི་ལྡན་པ་ཡང་མ་ཡིན། གཟུགས་མྱེད་པ་བལྟར་མེད་པ་ཐོགས་པ་མེད་པ་སྟེ། འདི་ལྟར་མཚན་ཉིད་མེད་པར་མཚན་ཉིད་གཅིག་པ་དག་གོ །སྨྲས་པ་ཚེ་དང་ལྡན་པ་རབ་འབྱོར་བརྗོད་པ་ནི་སྐྱེ་བ་མྱེད་ཅེས་བྱ་བ་ཡིན་ཏེ། སྤོབས་པ་ཡང་སྐྱེ་བ་མེད་ལ་ཆོས་ཀྱང་སྐྱེ་བ་མྱེད་དེ། གང་ལས་བརྩམས་ཤིང་བརྗོད་པར་སྤོབས་པའི་ཆོས་དེ་དག་ཀྱང་སྐྱེ་བ་མེད་པ་ཡིན་ནམ། རབ་འབྱོར་ཀྱིས་སྨྲས་པ། ཚེ་དང་ལྡན་པ་ཤ་ར་དྭ་ཏིའི་བུ་དེ་དེ་བཞིན་ཏེ། བརྗོད་པ་ནི་མ་སྐྱེས་པའོ། །སྤོབས་པ་ནི་མ་སྐྱེས་པའོ། །ཆོས་ནི་མ་སྐྱེས་པའོ། །གང་ལས་བརྩམས་ཏེ་སྨྲ་བར་སྤོབས་པའི་ཆོས་དེ་དག་ཀྱང་མ་སྐྱེས་པའོ། །དེ་ཅིའི་ཕྱིར་ཞེ་ན། ཚེ་དང་ལྡན་པ་ཤ་ར་དྭ་ཏིའི་བུ། དེ་ནི་འདི་ལྟར་གཟུགས་སྐྱེ་བ་མྱེད་དོ། །ཚོར་བ་སྐྱེ་བ་མེད་དོ། །འདུ་ཤེས་སྐྱེ་བ་མེད་དོ། །འདུ་བྱེད་སྐྱེ་བ་མྱེད་དོ། །རྣམ་པར་ཤེས་པ་སྐྱེ་བ་མེད་དོ། །མྱིག་སྐྱེ་བ་མྱེད་དོ། །རྣ་བ་སྐྱེ་བ་མྱེད་དོ། །སྣ་སྐྱེ་བ་མེད་དོ། །ལྕེ་སྐྱེ་བ་མྱེད་དོ། །ལུས་སྐྱེ་བ་མྱེད་དོ། །ཡིད་སྐྱེ་བ་མྱེད་དོ། །གཟུགས་སྐྱེ་བ་མྱེད་དོ། །སྒྲ་སྐྱེ་བ་མྱེད་དོ། །དྲི་སྐྱེ་བ་མྱེད་དོ། །རོ་སྐྱེ་བ་མྱེད་དོ། །རེག་སྐྱེ་བ་མྱེད་དོ། །ཆོས་སྐྱེ་བ་མྱེད་དོ། །མྱིག་གི་རྣམ་པར་ཤེས་པ་སྐྱེ་བ་མྱེད་དོ། །རྣ་བའི་རྣམ་པར་ཤེས་པ་སྐྱེ་བ་མྱེད་དོ། །སྣའི་རྣམ་པར་ཤེས་པ་སྐྱེ་བ་མྱེད་དོ། །ལྕེའི་རྣམ་པར་ཤེས་པ་སྐྱེ་བ་མྱེད་དོ། །ལུས་ཀྱི་རྣམ་པར་ཤེས་པ་སྐྱེ་བ་མྱེད་དོ། །ཡིད་ཀྱི་རྣམ་པར་ཤེས་པ་སྐྱེ་བ་མྱེད་དོ། །མྱིག་གི་འདུས་ཏེ་རེག་པ་སྐྱེ་བ་མྱེད་དོ། །རྣ་བའི་འདུས་ཏེ་རེག་པ་སྐྱེ་བ་མྱེད་དོ། །སྣའི་འདུས་ཏེ་རེག་པ་སྐྱེ་བ་མྱེད་དོ།