འདུས་མ་བྱས་སྟོང་པ་ཉིད་ཤེས་ཀྱང་དམྱིགས་པའི་ཚུལ་གྱིས་མ་ཡིན། མཐའ་ལས་འདས་པ་སྟོང་པ་ཉིད་ཤེས་ཀྱང་དམྱིགས་པའི་ཚུལ་གྱིས་མ་ཡིན། ཐོག་མ་དང་ཐ་མ་མྱེད་པ་སྟོང་པ་ཉིད་ཤེས་ཀྱང་དམྱིགས་པའི་ཚུལ་གྱིས་མ་ཡིན། དོར་བ་མྱེད་པ་སྟོང་པ་ཉིད་ཤེས་ཀྱང་དམྱིགས་པའི་ཚུལ་གྱིས་མ་ཡིན། རང་བཞིན་སྟོང་པ་ཉིད་ཤེས་ཀྱང་དམྱིགས་པའི་ཚུལ་གྱིས་མ་ཡིན། ཆོས་ཐམས་ཅད་སྟོང་པ་ཉིད་ཤེས་ཀྱང་དམྱིགས་པའི་ཚུལ་གྱིས་མ་ཡིན། རང་གི་མཚན་ཉིད་སྟོང་པ་ཉིད་ཤེས་ཀྱང་དམྱིགས་པའི་ཚུལ་གྱིས་མ་ཡིན། མྱི་དམྱིགས་པ་སྟོང་པ་ཤེས་ཀྱང་དམྱིགས་པའི་ཚུལ་གྱིས་མ་ཡིན། དངོས་པོ་མྱེད་པ་སྟོང་པ་ཉིད་ཤེས་ཀྱང་དམྱིགས་པའི་ཚུལ་གྱིས་མ་ཡིན། ངོ་བོ་ཉིད་སྟོང་པ་ཉིད་ཤེས་ཀྱང་དམིགས་པའི་ཚུལ་གྱིས་མ་ཡིན། དངོས་པོ་མེད་པའི་ངོ་བོ་ཉིད་སྟོང་པ་ཉིད་ཤེས་ཀྱང་དམྱིགས་པའི་ཚུལ་གྱིས་མ་ཡིན་པ་སྟེ། ཚེ་དང་ལྡན་པ་ཤ་ར་དྭ་ཏིའི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཐེག་པ་ཆེན་པོའོ། །ཚེ་དང་ལྡན་པ་ཤ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཐེག་པ་ཆེན་པོ་ནི། ཆོས་ཐམས་ཅད་ལ་སེམས་རྣམ་པར་མྱི་འཁྲུག་ཅིང་མཉམ་པར་གཞག་པར་ཤེས་པ་སྟེ། ཚེ་དང་ལྡན་པ་ཤ་ར་དྭ་ཏིའི་བུ་འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོའི་ཐེག་པ་ཆེན་པོའོ། །ཚེ་དང་ལྡན་པ་ཤ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཐེག་པ་ཆེན་པོ་ནི་རྟག་ཅེས་བྱ་བར་ཤེས་པ་མྱི་འཇུག །མྱི་རྟག་ཅེས་བྱ་བར་ཤེས་པ་མྱི་འཇུག་པ་དང་། བདེ་ཞེས་བྱ་བར་ཤེས་པ་མྱི་འཇུག །སྡུག་བསྔལ་ཞེས་བྱ་བར་ཤེས་པ་མྱི་འཇུག། སྡུག་བསྔལ་ཞེས་བྱ་བར་ཤེས་པ་མྱི་འཇུག་པ་དང་། བདག་ཅེས་བྱ་བར་ཤེས་པ་མྱི་འཇུག །བདག་མྱེད་ཅེས་བྱ་བར་ཤེས་པ་མྱི་འཇུག་པ་དང་། སྡུག་ཅེས་བྱ་བར་ཤེས་པ་མྱི་འཇུག །མྱི་སྡུག་ཅེས་བྱ་བར་ཤེས་པ་མྱི་འཇུག་པ་དང་། སྟོང་ཞེས་བྱ་བར་ཤེས་པ་མྱི་འཇུག་མྱི་སྟོང་ཞེས་བྱ་བར་ཤེས་པ་མྱི་འཇུག་པ་དང་། མཚན་མ་ཡོད་ཅེས་བྱ་བར་ཤེས་པ་མྱི་འཇུག་མཚན་མ་མྱེད་ཅེས་བྱ་བར་ཤེས་པ་མྱི་འཇུག་པ་དང་།