གཟུགས་མྱེད་པའི་སྙོམས་པར་འཇུག་པ་འདི་དག་ལ་ཡང་མཉམ་པར་གཞོག་ལ། བསམ་གཏན་དང་། ཚད་མྱེད་པ་དང་། གཟུགས་མྱེད་པའི་སྙོམས་པར་འཇུག་པའི་དབང་གིས་ཀྱང་མྱི་སྐྱེ་ཞིང་། །དེ་དག་གི་རོ་མྱོང་བར་བྱེད་པ་ཡང་མྱེད་ལ། དེ་དག་གིས་འཕྲོགས་པར་ཡང་མི་འགྱུར་བ་འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མྱེད་པ་རྣམས་ལ་སྤྱོད་པའི་བསམ་གཏན་གྱི་ཕ་རོལ་ཏུ་ཕྱིན་པའོ། །ནམ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་ཡིད་ལ་བྱ་བས། བསམ་གཏན་དང་། ཚད་མྱེད་པ་དང་། གཟུགས་མྱེད་པའི་སྙོམས་པར་འཇུག་པ་དེ་དག་ལ་ཡང་མཉམ་པར་གཞོག་ཅིང་རྣམ་པར་ལྡང་ལ། དེ་དག་ལ་མྱི་རྟག་པའི་རྣམ་པ་དང་། སྡུག་བསྔལ་བའི་རྣམ་པ་དང་། བདག་མྱེད་པའི་རྣམ་པ་དང་། ཞི་བའི་རྣམ་པ་དང་། སྟོང་པའི་རྣམ་པ་དང་། མཚན་མ་མྱེད་པའི་རྣམ་པ་དང་། སྨོན་པ་མྱེད་པའི་རྣམ་པར་རབ་ཏུ་རྟོག་ཀྱང་། ཉན་ཐོས་དང་རང་སངས་རྒྱས་ཀྱི་སྐྱོན་མྱེད་པར་ཡང་འཇུག་པར་མྱི་བྱེད་པ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མྱེད་པ་རྣམས་ལ་སྤྱོད་པའི། ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། ཚེ་དང་ལྡན་པ་ཤ་ར་དྭ་ཏིའི་བུ་འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོའི་ཐེག་པ་ཆེན་པོའོ། །ཚེ་དང་ལྡན་པ་ཤ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཐེག་པ་ཆེན་པོ་ནི། ནང་སྟོང་པ་ཉིད་ཤེས་ཀྱང་དམྱིགས་པའི་ཚུལ་གྱིས་མ་ཡིན། ཕྱི་ནང་སྟོང་པ་ཉིད་ཤེས་ཀྱང་དམྱིགས་པའི་ཚུལ་གྱིས་མ་ཡིན། སྟོང་པ་ཉིད་སྟོང་པ་ཉིད་ཤེས་ཀྱང་དམྱིགས་པའི་ཚུལ་གྱིས་མ་ཡིན། ཆེན་པོ་སྟོང་པ་ཉིད་ཤེས་ཀྱང་དམྱིགས་པའི་ཚུལ་གྱིས་མ་ཡིན། དོན་དམ་པ་སྟོང་པ་ཉིད་ཤེས་ཀྱང་དམྱིགས་པའི་ཚུལ་གྱིས་མ་ཡིན། འདུས་བྱས་སྟོང་པ་ཉིད་ཤེས་ཀྱང་དམྱིགས་པའི་ཚུལ་གྱིས་མ་ཡིན། འདུས་མ་བྱས་སྟོང་པ་ཉིད་ཤེས་ཀྱང་དམྱིགས་པའི་ཚུལ་གྱིས་མ་ཡིན།