།ཤ་ར་དྭ་ཏིའི་བུ་སྟོང་པ་ཉིད་གང་ཡིན་པ་དེ་ནི་མི་སྐྱེ་མི་འགག་ཅིང་། ཀུན་ནས་ཉོན་མོངས་པར་འགྱུར་བ་མྱེད། རྣམ་པར་བྱང་བ་མྱེད་ལ། འགྲིབ་པ་མྱེད་ཅིང་འཕེལ་བ་མྱེད་པ་སྟེ། དེ་ནི་འདས་པ་ཡང་མ་ཡིན། མ་འོངས་པ་ཡང་མ་ཡིན། ད་ལྟར་བྱུང་བ་ཡང་མ་ཡིན་ནོ། །གང་མི་སྐྱེ་མི་འགག་ཅིང་། ཀུན་ནས་ཉོན་མོངས་པར་འགྱུར་བ་མྱེད། རྣམ་པར་བྱང་བ་མྱེད་ལ། མྱི་འགྲིབ་མི་འཕེལ་ཏེ། འདས་པ་ཡང་མ་ཡིན། མ་འོངས་པ་ཡང་མ་ཡིན། ད་ལྟར་བྱུང་བ་ཡང་མ་ཡིན་པ་དེ་ལ་ནི་གཟུགས་མེད་དོ། །ཚོར་བ་མྱེད་དོ། འདུ་ཤེས་མྱེད་དོ། །འདུ་བྱེད་དོ། །རྣམ་པར་ཤེས་པ་མྱེད་དོ། །དེ་ལ་ནི་མྱིག་མྱེད་དོ། །རྣ་བ་མྱེད་དོ། །སྣ་མེད་དོ། །ལྕེ་མྱེད་དོ། །ལུས་མྱེད་དོ། །ཡིད་མྱེད་དོ། །དེ་ལ་ནི་གཟུགས་མྱེད་དོ། །སྒྲ་མྱེད་དོ། །དྲི་མྱེད་དོ། །རོ་མྱེད་དོ། །རེག་བྱ་མྱེད་དོ། །ཆོས། མྱེད་དོ། །དེ་ལ་ནི་མིག་གི་ཁམས་མྱེད་དོ། །གཟུགས་ཀྱི་ཁམས་མྱེད་དོ། །མྱིག་གི་རྣམ་པར་ཤེས་པའི་ཁམས་མྱེད་དོ། །དེ་ལ་ནི་རྣ་བའི་ཁམས་མྱེད་དོ། །སྒྲའི་ཁམས་མྱེད་དོ། །རྣ་བའི་རྣམ་པར་ཤེས་པའི་ཁམས་མྱེད་དོ། །དེ་ལ་ནི་སྣའི་ཁམས་མྱེད་དོ། །དྲིའི་ཁམས་མྱེད་དོ། །སྣའི་རྣམ་པར་ཤེས་པའི་ཁམས་མྱེད་དོ། །དེ་ལ་ནི་ལྕེའི་ཁམས་མྱེད་དོ། །རོའི་ཁམས་མྱེད་དོ། །ལྕེའི་རྣམ་པར་ཤེས་པའི་ཁམས་མྱེད་དོ། །དེ་ལ་ནི་ལུས་ཀྱི་ཁམས་མྱེད་དོ། །རེག་བྱའི་ཁམས་མྱེད་དོ། །ལུས་ཀྱི་རྣམ་པར་ཤེས་པའི་ཁམས་མྱེད་དོ། །དེ་ལ་ནི་ཡིད་ཀྱི་ཁམས་མྱེད་དོ། །ཆོས་ཀྱི་ཁམས་མྱེད་དོ། །ཡིད་ཀྱི་རྣམ་པར་ཤེས་པའི་ཁམས་མེད་དོ། །དེ་ལ་ནི་སའི་ཁམས་མྱེད་དོ། །ཆུའི་ཁམས་མྱེད་དོ། །མྱེའི་ཁམས་མྱེད་དོ། །རླུང་གི་ཁམས་མྱེད་དོ། །ནམ་མཁའི་ཁམས་མྱེད་དོ། །རྣམ་པར་ཤེས་པའི་ཁམས་མྱེད་དོ།། །། ཤེས་བར་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ། བམ་པོ་དྲུག་པ། །དེ་ལ་ནི་མ་རིག་པ་མྱེད་དོ། །མ་རིག་པ་འགག་པ་མྱེད་དོ། །དེ་ལ་ནི་འདུ་བྱེད་མྱེད་དོ། །འདུ་བྱེད་འགག་པ་མྱེད་དོ། །དེ་ལ་ནི་རྣམ་པར་ཤེས་པ་མྱེད་དོ།