དངོས་པོ་མེད་པ་སྟོང་པ་ཉིད་ལ་གནས་པ་མ་ཡིན། ངོ་བོ་ཉིད་སྟོང་པ་ཉིད་ལ་གནས་པ་མ་ཡིན། དངོས་པོ་མེད་པའི་ངོ་བོ་ཉིད་སྟོང་པ་ཉིད་ལ་གནས་པ་མ་ཡིན། ཕྱིར་མི་ལྡོག་པའི་ས་ལ་གནས་པ་མ་ཡིན། དྲན་པ་ཉེ་བར་གཞག་པ་རྣམས་པར་གནས་པ་མ་ཡིན། ཡང་དག་པར་སྤོང་བ་རྣམས་ལ་གནས་པ་མ་ཡིན། རྫུ་འཕྲུལ་གྱི་རྐང་པ་རྣམས་ལ་གནས་པ་མ་ཡིན། དབང་པོ་རྣམས་ལ་གནས་པ་མ་ཡིན། སྟོབས་རྣམས་ལ་གནས་པ་མ་ཡིན། བྱང་ཆུབ་ཀྱི་ཡན་ལག་རྣམས་ལ་གནས་པ་མ་ཡིན། འཕགས་པའི་ལམ་ཡན་ལག་བརྒྱད་པ་ལ་གནས་པ་མ་ཡིན། །འཕགས་པའི་བདེན་པ་རྣམས་ལ་གནས་པ་མ་ཡིན། བསམ་གཏན་རྣམས་ལ་གནས་པ་མ་ཡིན། ཚད་མེད་པ་རྣམས་ལ་གནས་པ་མ་ཡིན། གཟུགས་མེད་པའི་སྙོམས་པར་འཇུག་པ་རྣམས་ལ་གནས་པ་མ་ཡིན། རྣམ་པར་ཐར་པ་བརྒྱད་ལ་གནས་པ་མ་ཡིན། མཐར་ཀྱིས་གནས་པའི་སྙོམས་པར་འཇུག་པ་དགུ་ལ་གནས་པ་མ་ཡིན། རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་ལ་གནས་པ་མ་ཡིན། མངོན་པར་ཤེས་པ་རྣམས་ལ་གནས་པ་མ་ཡིན། ཏིང་ངེ་འཛིན་རྣམས་ལ་གནས་པ་མ་ཡིན། གཟུངས་ཀྱི་སྒོ་རྣམས་ལ་གནས་པ་མ་ཡིན། དེ་བཞིན་གཤེགས་པའི་སྟོབས་བཅུ་ལ་གནས་པ་མ་ཡིན། མི་འཇིགས་པ་བཞི་ལ་གནས་པ་མ་ཡིན། སོ་སོ་ཡང་དག་པར་རིག་པ་བཞི་ལ་གནས་པ་མ་ཡིན། བྱམས་པ་ཆེན་པོ་ལ་གནས་པ་མ་ཡིན། སྙིང་རྗེ་ཆེན་པོ་ལ་གནས་པ་མ་ཡིན། སངས་རྒྱས་ཀྱི་ཆོས་མ་འདྲེས་པ་རྣམས་ལ་གནས་པ་མ་ཡིན་ནོ། །དེ་དག་ནི་མངོན་པར་ཞེན་པ་ཡིན་ཏེ། ཇི་ལྟར་མངོན་པར་ཞེན་པ་ཡིན་ཞེ་ན། གཟུགས་ལ་མངོན་པར་ཞེན་པ་ཡིན། ཚོར་བ་ལ་མངོན་པར་ཞེན་པ་ཡིན། འདུ་ཤེས་ལ་མངོན་པར་ཞེན་པ་ཡིན། འདུ་བྱེད་ལ་མངོན་པར་ཞེན་པ་ཡིན། རྣམ་པར་ཤེས་པ་ལ་མངོན་པར་ཞེན་པ་ཡིན།