ཞེས་བརྗོད་པས་རྡོ་རྗེའི་རིགས་ཐམས་ཅད་ཀྱིས་མེ་ཏོག་དང་མར་མེ་དང་དྲི་ཆབ་དང་བཤོས་གཙང་གིས་མཆོད་དོ། །འཇམ་དཔལ་དེའི་ལས་ནི་འདིའོ། །སྤྲ་ཚིལ་ལས་གང་ལ་བྱ་བའི་གཟུགས་བྱས་ཏེ། སྐྲོད་པའི་རྫས་ནི་བྱ་རོག་དང་ཧུ་ལུའི་ཤ་མིང་དང་བཅས་པའི་སྙིང་གར་བཅུག་ནས་སྔགས་འདི་བརྗོད་པར་བྱའོ། །ཨོཾ་ཨ་མུ་ཀཾ་མེ་བ་ཤམ་ན་ཡ་སྭཱ་ཧཱ། ཞེས་བརྗོད་ནས་རླུང་གི་ཕྱོགས་སུ་སྤས་ན་འཇམ་དཔལ་འཐབ་ཅིང་འབྱེར་བར་འགྱུར་ཏེ་གཞན་དུ་འབྲོས་པར་འགྱུར་རོ། །རྡོ་རྗེ་རིགས་ཀྱི་ཡུམ་གྱི་ལེའུ་སྟེ་བཅུ་གཉིས་པའོ།། །།འཇམ་དཔལ་པདྨའི་རིགས་ཀྱི་ཡུམ་ནི་ཞལ་བཞི་པ་ཕྱག་བརྒྱད་པ། རྩ་བའི་ཞལ་ནི་དམར་མོ་བནྡུ་ཀའི་མེ་ཏོག་གི་མདོག་ཅན་གྱི་སྐུ་གཞོན་ནུ་ལང་ཚོ་ལ་བབ་པ་གཡས་ཞལ་དཀར་པོ། གཡོན་ཞལ་ནག་པོ་རྒྱབ་ཞལ་སེར་པོ་རིགས་བཞིས་དབུ་ལ་མཚན་པ་སྤྱན་གསུམ་པའོ། །ཕྱག་བརྒྱད་ན་པདྨ་དང་མདའ་དང་མདུང་དང་ཐ་མ་མཆོག་སྦྱིན་གྱི་ཕྱག་རྒྱའོ། །ཨུཏྤ་ལ་གཞུ་དང་རྡོ་རྗེ་ལྕགས་ཀྱུ་དང་ཞགས་པ་དང་སྡིགས་མཛུབ་ནི་གཡོན་པའི་ཕྱག་རྒྱའོ། །རྡོ་རྗེ་སྐྱིལ་མོ་ཀྲུང་གིས་བཞུགས་ཤིང་ཆོས་སྐུའི་རང་བཞིན་ཅན་ནོ། །འཇམ་དཔལ་དེའི་སྔགས་ནི་འདིའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཛྙཱ་ན་སཱ་ག་རཱ་ཡ། ཨ་མི་ཏ་བྷ་དེ་བ་བྱུ་ཧ་རཱ་ཛཱ་ཡ། ཏ་ཐཱ་ག་ཏཱ་ཡ། ཨཪྷ་ཏེ་བྷྱཿ སཾ་མྱཀི་སཾ་བུདྡྷཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཏུཏྟཱ་རེ་ཏུ་རེ་སྭཱ་ཧཱ། ཞེས་བརྗོད་པས་པདྨའི་རིགས་ཐམས་ཅད་ཀྱིས་མེ་ཏོག་དང་བདུག་སྤོས་དང་མར་མེ་དང་དྲི་ཆབ་དང་ཞལ་ཟས་ཀྱིས་མཆོད་དོ། །འཇམ་དཔལ་དེའི་ལས་ནི་འདིའོ། །དྷ་དུ་ར་དང་ནིམ་པ་དང་མྱ་ངན་འཚང་གིས་མེ་ཏོག་བཏགས་ཏེ་ཕྱེ་མ་སྦྲང་རྩི་དང་ལྡེ་གུ་བྱས་ནས་སྔགས་འདི་བརྗོད་པར་བྱའོ། །ཨོཾ་ཨ་མུ་ཀ་ཨ་མི་ཏ་ནཾ་ཀུ་མཱ་རི་མ་ཧཱ་མུ་རི་དྲ་བ་ཏེ་ན་ད་སྱ་པི་ཏ་བ་ཡཙྪ་ཏུ་ཧཱུྃ་ཧྲཱིཿ། ཞེས་བརྗོད་ནས་ལུས་ལ་བྱུགས་ན་རང་དབང་མེད་པར་ཁུགས་པར་འགྱུར་རོ། །པདྨ་རིགས་ཀྱི་ཡུམ་གྱི་ལེའུ་སྟེ་བཅུ་གསུམ་པའོ།།