།ཞི་བའི་ལས་ཀྱི་ལེའུ་སྟེ་བདུན་པའོ།། །།འཇམ་དཔལ་རྒྱས་པའི་ལས་འདིའོ། །སྤོས་ཀྱི་ཁང་པ་དྲི་ཞིམ་པ་དང་ལྡན་པའི་གནས་སུ་བ་སེར་སྐྱའི་རྣམ་ལྔས་སྐྱོང་ནུལ་བྱ་སྟེ་དྲི་ཞིམ་པོས་བྱུགས་པའི་མཎྜལ་བྱའོ། །མེ་ཏོག་གི་ཚོམ་བུ་ཡང་དགྲམ་པར་བྱའོ། །རྒྱས་པ་ལས་བྱུང་བའི་ཐང་ཀ་ཡང་དགྲམ་པར་བྱའོ། །རིན་པོ་ཆེ་རྣམ་པ་ལྔ་དང་འབྲུ་དང་སྨན་ལ་སོགས་པ་དག་ལ་རིལ་བུ་ཉི་ཤུ་རྩ་གཅིག་བྱ་སྟེ། རིན་པོ་ཆེའི་ག་འུར་བཅུག་ལ་མཎྜལ་གྱི་དབུས་སུ་གཞག་པར་བྱའོ། །པོག་ཕོར་བཞི་ཡང་གཞག་པར་བྱའོ། །མེ་ཏོག་ལ་སོགས་པ་ཡང་གཞག་པར་བྱས་ནས་བསམ་གཏན་བསྒོམ་པར་བྱ་སྟེ། ཡི་གེ་ཏྃ་ལས་བསྐྱེད་པའི་མྱུར་བའི་བརྩོན་འགྲུས་དང་ལྡན་པའི་ཡུམ་སྒྲོལ་མ་དཔའ་མོ་གཅིག་མ་རྣལ་འབྱོར་མའི་ལུས་སུ་བསྒོམ་པ་ནི་པདྨ་རྒྱས་པ་ལས་བྱུང་ཞིང་ཉི་ཟླའི་སྟེང་དུ་རྒྱས་པའི་སྐུ་སྟོན་ཀའི་ཟླ་བ་ལྟར་གསལ་བ་སྤྲིན་དང་བྲལ་བའི་ཉི་མ་ལྟ་བུར་གཞོན་ནུ་ལང་ཚོ་ལ་བབ་པ་ལྟ་བུའི་སྐུ་མདོག་སེར་པོ་དོ་ཤལ་དང་དཔུང་རྒྱན་དང་རིན་པོ་ཆེའི་ཆུན་འཕྱང་ལ་སོགས་པས་མཛེས་པར་བརྒྱན་པ། པཉྩ་ལི་ཀའི་གོས་ཀྱིས་སྨད་དཀྲིས་པ། ཀ་ཤི་ཀའི་རས་ཀྱིས་སྟོད་གཡོགས་པ་སྐྱིལ་ཀྲུང་ཕྱེད་པ་དང་བཅས་པ་ཞལ་གཅིག་ཕྱག་གཉིས་པ་ཞལ་འཛུམ་ཞིང་སྤྱན་འཁྱུག་པ། ཕྱག་གཡས་པ་མཆོག་སྦྱིན་མཛད་པ། གཡོན་པ་ཨུཏྤ་ལ་སྡོང་པུ་དང་བཅས་པ་འཛིན་པ་སྐུ་ལས་འོད་འཕྲོ་ཞིང་པདྨའི་གེ་སར་དང་བཅས་པའི་དཀྱིལ་ན་བདུད་རྩིའི་རྒྱུན་སྐུ་ལས་འོད་འཕྲོ་བ་ལྷའི་ཚོགས་དང་ལྷ་མ་ཡིན་གྱི་ཚོགས་དང་ནམ་མཁའ་ལྡིང་གི་ཚོགས་དང་མི་འམ་ཅིའི་ཚོགས་དང་མིའི་ཚོགས་དང་དྲི་ཟའི་ཚོགས་དང་ལྟོ་འཕྱེ་ཆེན་པོའི་ཚོགས་དང་སྲིན་པོ་ལ་སོགས་པའི་སྟོབས་ཟིལ་གྱིས་གནོན་པའི་བྱང་ཆུབ་སེམས་དཔའ་དཔག་ཏུ་མེད་པ་དང་བཅས་པ་བསྒོམ་སྟེ་བཟླས་པ་འདི་བྱའོ། །ཨོཾ་ཏཱ་རེ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་བཟླས་པ་བྱའོ། །དེ་ནས་ལས་ཀྱི་སྔགས་དང་བཅས་པས་ལན་གཅིག་གམ་བདུན་ནམ་ཉི་ཤུ་རྩ་གཅིག་གམ་བརྒྱ་རྩ་བརྒྱད་བརྗོད་ནས། གསོལ་བ་བཏབ་ན་འགྲུབ་པར་འགྱུར་རོ། །འཇམ་དཔལ་དེའི་ཕན་ཡོན་ནི་ལྷའི་ཚོགས་དང་ལྷ་མ་ཡིན་གྱི་ཚོགས་དང་ནམ་མཁའ་ལྡིང་གི་ཚོགས་དང་མིའམ་ཅིའི་ཚོགས་དང་།