དེ་ནས་འཇམ་དཔལ་གྱིས་ཞུས་པ། བཅོམ་ལྡན་འདས་ལྷ་དེ་ལྷས་ཇི་ལྟར་བྱིན་གྱིས་བརླབ་པར་བྱ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་སྤྲུལ་པ་ལྟ་བུ་དང་སྒྱུ་མ་ལྟ་བུ་དང་འཇའ་ཚོན་ལྟ་བུ་དང་སྨིག་རྒྱུ་ལྟ་བུ་དང་ཆུ་ཟླ་ལྟ་བུ་དང་གཟུགས་བརྙན་ལྟ་བུས་སོ། །འཇམ་དཔལ་གྱིས་སྨྲས་པ། བཅོམ་ལྡན་འདས་སྤྲུལ་པ་ཞེས་བྱ་བ་ཇི་ལྟ་བུ། བཅོམ་ལྡན་འདས་ཀྱིས་བཀའ་སྩལ་པ། སྤྲུལ་པ་ཞེས་བྱ་བ་ནི་ཡང་དག་པ་མ་ཡིན་ཞིང་གཉིས་ཀ་འཁྲུལ་པའོ། །སྒྱུ་མ་ནི་གཞན་འཁྲུལ་པའོ། །འཇའ་ཚོན་ནི་སྟོང་པའོ། །སྨིག་རྒྱུ་ནི་ཡུལ་འཁྲུལ་ཅིང་སྟོད་པའོ། །ཆུ་ཟླ་ནི་རྒྱུ་འབྲས་སོ། །གཟུགས་བརྙན་ནི་དྲི་ཟའི་གྲོང་ཁྱེར་ཏེ། འཇམ་དཔལ་འཁྲུལ་པ་ནི་དེ་བཞིན་ཏེ་ཉོན་མོངས་པ་དང་བཅས་པའི་ཁམས་ཀྱང་དེ་བཞིན་ནོ། །འཇམ་དཔལ་དེ་ལྟ་བས་ན་ལྷས་ལྷ་ལ་བྱིན་གྱིས་རློབ་པ་ཡང་འདྲའོ། །འཇམ་དཔལ་སྤྲུལ་པ་དང་སྒྱུ་མ་དང་འཇའ་ཚོན་དང་སྨིག་རྒྱུ་དང་ཆུ་ཟླ་དང་གཟུགས་བརྙན་ནི་ཐོགས་པ་མེད་ཅིང་ཐོགས་པ་དང་བྲལ་བའོ། །ཐ་དད་པ་མེད་ཅིང་ཐ་དད་པ་དང་བྲལ་བའོ། །འཇམ་དཔལ་དེའི་ཕྱིར་དེའི་རང་བཞིན་དེ་དང་འདྲ་བར་ཡིད་ལ་གྱིས་ཤིག །དེ་ནས་བཅོམ་ལྡན་འདས་ཀྱིས་བྱིན་གྱིས་བརླབ་པ་མཛད་པ་ནི། ལག་པ་ཐལ་མོ་ཁོང་སྟོང་དུ་སྦྱར་ཏེ། གུང་མོ་གཉིས་བརྐྱང་སྟེ་རྩེ་སྦྱར་ནས། མཛུབ་མོ་གཉིས་དང་སྲིན་ལག་གཉིས་གུང་མོ་ལ་རེག་སྟེ་ཟུར་བཅག་ནས་མཐེའུ་ཆུང་དང་མཐེ་བོ་རྩེ་སྤྲད་ནས་ནང་སྦྱར་བ་ནི་རྡོ་རྗེའི་ཕྱག་རྒྱའོ། །དེའི་སྔགས་ནི་ཨོྃ་སརྦ་ཏ་ཐ་ག་ཏ་ཨ་ཏཾ་ཨ་ཧཾ་བཛྲ་སྟ་ན་སརྦ་ཏ་ཐཱ་ག་ཏ་བཛྲ་སྟ་ན་ཧཱུྃ་ཞེས་བརྗོད་པར་བྱའོ། །དེ་ནས་ཡང་བཅོམ་ལྡན་འདས་ཀྱིས་དབང་བསྐུར་བར་མཛད་པ་ནི། ལག་པ་ཐལ་མོ་སྦྱར་ཏེ་མཐེའུ་ཆུང་དང་སྲིན་ལག་གཉིས་ཕྱིར་བཀན་ཏེ། གུང་མོ་རྩེ་སྤྲད་དེ་མཐེ་བོས་མཛུབ་མོ་གཉིས་མནན་པ་ནི་རིན་པོ་ཆེའི་ཕྱག་རྒྱ་སྟེ་མགོ་བོའི་སྟེང་དུ་བཞག་ནས་སྔགས་བརྗོད་པ་ནི། ཨོྃ་སརྦ་ཏ་ཐཱ་ག་ཏ་ཙིནྟཱ་མ་ཎི་ཛྭ་ལ་ནི་སརྦ་ཏ་ཐཱ་ག་ཏ་ཨ་ཧཾ་ཤུད་དྷ་པ་རི་ཤུད་དྷཱ་ཡ་སྭཱ་ཧཱ། ཞེས་བྱ་བའི་སྔགས་འདིས་ཕྱོགས་བཅུའི་སངས་རྒྱས་ཐམས་ཅད་ཀྱིས་དབང་བསྐུར་ཞིང་བྱིན་གྱིས་བརླབས་པའོ།