ལས་གཞན་དང་གཞན་སྟོང་ཕྲག་བརྒྱ་བྱེད་པར་འགྱུར་ཏེ་རང་གི་བློས་ཀྱང་ཐམས་ཅད་དུ་སྦྱར་བར་བྱའོ། །ཐམས་ཅད་ལ་ཐོགས་པ་མེད་པའི་ལས་ཅན་དུ་འགྱུར། ཕུག་གི་གནས་ཐམས་ཅད་ཀྱི་རྗེ་དཔོན་དང་རྒྱལ་པོར་འགྱུར། ཚེ་བསྐལ་པ་སྟོང་ཕྲག་བཅུ་གཉིས་ཐུབ་པར་འགྱུར། ཤི་ནས་འཇིག་རྟེན་གྱི་ཁམས་བདེ་བ་ཅན་དུ་པདྨའི་སྙིང་པོ་ལས་རྒྱན་ཐམས་ཅད་ཀྱིས་བརྒྱན་པ། ནོར་བུ་དང་། གསེར་དང་། དངུལ་དང་། རྡོ་རྗེ་དང་། བཻ་ཌཱུརྱ་དང་། མརྒད་དང་། པདྨ་རཱ་ག་དང་། ཨིནྡྲ་ནཱི་ལ་དང་། མུ་ཏིག་རྣམས་ཀྱིས་ལུས་བརྒྱན་པར་འགྱུར་རོ། །སྐྲ་བུང་བ་ལྟར་ག་ནག་ཅིང་འཁྱིལ་ལ་འཁྱིལ་པ་དང་། མིག་ཨུཏྤ་ལའི་མཆོག་སྔོན་པོ་ལྟ་བུ་དང་། བགས་པའི་མདོག་གསེར་ལྟ་བུར་འགྱུར་རོ། །ངག་འཇམ་པ་དང་སྙན་པ་དང་ཡིད་དུ་འོང་བར་འགྱུར་རོ། །རྒྱལ་བ་འོད་དཔག་མེད་ཀྱི་ཕྱག་གིས་སྤྱི་བོ་ལ་འཇོག་པར་འགྱུར་རོ། །ཕྱག་ན་པདྨའི་ཕྱག་མཆོག་སྦྱིན་པས་དབུགས་འབྱིན་ཅིང་ཁྱད་པར་མཆོག་སྦྱིན་པར་འགྱུར་རོ། །པདྨ་ལ་རབ་ཏུ་གནས་པ་རྣམ་པར་གཟིགས་པ་དོན་ཡོད་པའི་སངས་རྒྱས་ཞེས་བྱ་བ་འཕགས་པ་འོད་དཔག་མེད་ལུང་སྟོན་པར་འགྱུར་རོ། །དེ་ནས་ཡུངས་ཀར་དེ་དེ་བཞིན་གཤེགས་པ་སྟོང་ཕྲག་བརྒྱ་ཕྲག་བྱེ་བ་སྙེད་ཀྱི་སྤྱན་དུ་གྱུར་པ་དང་གང་གཱའི་ཀླུང་གི་བྱེ་མ་དང་མཉམ་པའི་སངས་རྒྱས་བཅོམ་ལྡན་འདས་རྣམས་ཀྱི་རིང་བསྲེལ་དུ་འགྱུར་ཞིང་། ཁམས་སྣ་ཚོགས་ཀྱི་ཁ་དོག་རྣམ་པ་སྣ་ཚོགས་ཀྱི་མདོག་གི་ངོ་བོ་ཉིད་དུ་འགྱུར། ནོར་བུ་རིན་པོ་ཆེ་བདུན་དང་འདྲ་ཞིང་འདི་ལྟ་སྟེ། སྐུ་གདུང་རེ་རེ་ཡང་ཉི་མ་བཞིན་དུ་སོ་སོར་གསལ་བར་འགྱུར་རོ། །ཕྱོགས་བཅུ་ཀུན་ཏུ་འོད་ཟེར་འབྱུང་བར་འགྱུར་ཞིང་རྫུ་འཕྲུལ་གྱི་ཆོ་འཕྲུལ་རྣམ་པ་སྣ་ཚོགས་མཛད་དེ་ལུས་རེ་རེ་སྟོན་པར་འགྱུར་རོ། །རིང་བསྲེལ་འདི་མཐོང་བ་ཙམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་ཏེ། གཞན་དུ་ཡིད་ལ་མ་བྱས་ན་དེ་དག་གིས་དེ་བཞིན་གཤེགས་པ་ཐམས་ཅད་ཀྱིས་དེ་ལ་སྨད་པར་མི་འགྱུར་རོ། །གཞན་ཡང་ཉལ་ཀར་རང་གི་བློས་བྱམས་པའི་སེམས་ཀྱིས་རིང་བསྲེལ་མངོན་དུ་བྱས་ཏེ་སྨོན་ལམ་གདབ་པར་བྱའོ། །ཅི་འདོད་པ་བསམས་ཏེ་མཆོད་པ་བྱས་ན་བསམས་པ་ཙམ་གྱི་མོད་ལ་སྐད་ཅིག་ཏུ་ཐམས་ཅད་འགྲུབ་པར་འགྱུར་རོ།