།ཟླ་བ་ལ་ཕག་པའི་ཤིང་རྟ་ལ་གསེར་གྱི་མདོག་ཤིན་ཏུ་མང་ཞིང་ལེགས་པའོ། །ནུབ་མོའི་དུས་སུ་ཟླ་བ་ལ་ཉིན་མོའི་དུས་སུ་ཉི་མ་ལ་གནས་པ་འགྲུབ་བཞིན་བལྟ་བ་བསམ་པར་བྱའོ། །ཨོཾ་པྃ་ཡྃ་རྃ་བྃ་མྃ། མ་མེ་པཱ་ཤཱྃཏུ་སྟ་སྭཱ་ཧཱ། ཨནྟརྡྷཱ་ན་མ་སི་སྭཱ་ཧཱ། སྔགས་བཟླས་ཞིང་འགྲོ་ན་དེ་ལྟར་མེད། གཟུང་དུ་མེད། བཅིང་དུ་མེད། དགག་ཏུ་མེད། བརྒལ་དུ་མེད། རྨོངས་པར་བྱར་མེད། ཆད་པས་གཅད་དུ་མེད། མགོ་བྲེག་ཏུ་མེད། གཞུར་མེད། ཚིག་པར་བྱར་མེད། དགྲའི་དབང་དུ་མི་འགྲོའོ། །ལྡོང་རོས་དང་། གིའུ་ཝང་དང་། མིག་སྨན་དང་བཅས་པས་ཏ་ཀ་རའི་བྱང་ཕྱོགས་ཀྱི་རྩ་བ་གཅེར་བུ་སྐྲ་གྲོལ་བར་གྱུར་པས་ཟླ་བ་འམ་ཉི་མ་གཟས་བཟུང་བའི་དུས་སུ་ཕྱུང་སྟེ། གོང་མ་དེ་དང་གཅིག་ཏུ་བྱས་ཏེ་རིལ་བུ་བྱས་ལ་ཉི་མ་དང་ཟླ་བ་དང་། མེའི་དབུས་སུ་བཅུག་སྟེ་ཁ་རུ་བཅུག་ནས་སྦས་ཏེ་ཉིན་མོ་དང་མཚན་མོ་མི་མཐོང་བར་བྱེད་པའི་གཙོ་བོའི་རིལ་བུའོ། །ཨོཾ་ཡང་ནི་སྙིང་པོ་མཆོག་གོ། །སྙིང་པོའི་ལས་སྙིང་པོ་གསང་བ་ལས་ཤིན་ཏུ་གསང་བ། འདོད་པ་བཞི་སྦྱིན་པ་བསྐྱེད་པ་འདི་ལས་སངས་རྒྱས་ཉིད་ཐོབ་པར་འགྱུར་རོ། །ཞེས་བྱའོ། །དེ་ནས་གཞན་ཡང་སྦྱོར་བ་ནི་ཟླ་བའི་དབུས་སུ་བཅོམ་ལྡན་འདས་མ་འོད་ཟེར་ཅན་ཟླ་བའི་གདན་ལ་བཞུགས་ཤིང་འཛམ་བུ་ནཱ་དའི་ཆུ་བོའི་གསེར་ལྟ་བུའི་འོད་དང་། འོད་ཟེར་ཅན་ཡིད་དུ་འོང་མ། ཞལ་རྔམ་སྤྱན་གསུམ་ཕྱག་དྲུག་མ། གོས་སྔོན་པོ་འཆང་ཞིང་སྔོན་པོའི་ཤང་འགག་དང་། སྟོད་གཡོགས་ཅན་དང་། སྣ་ཚོགས་རྒྱན་ཐམས་ཅད་ཀྱིས་བརྒྱན་པ་དབུ་ལ་མཆོད་རྟེན་བཀོད་པ། ཞལ་དང་པོ་སེར་པོ་བཞད་པའི་ཞལ། གཡོན་པ་ཕག་ཞལ་ནག་པོ་མཆེ་བ་གཙིགས་ཤིང་འཇིགས་པར་བྱེད་པ། ལྕེ་འདྲིལ་ཞིང་དགྲ་བོ་ལ་ཁྲོ་གཉེར་བྱེད་ཅིང་འཇིགས་པར་བྱེད་ཅིང་གཡས་པའི་ཞལ་ནི་དཀར་པོ། སྟོན་ཀའི་ཟླ་བའི་འོད་དྲི་མ་མེད་པ་ཅན་ནོ། །གཡོན་པའི་ཕྱག་ཏུ་གཞུ་དང་སྐུད་པ་དང་། ཤིང་མྱ་ངན་མེད་པའི་ཡལ་ག་དང་ལྡན་པའོ། །གཡས་པ་ན་མདའ་དང་། ཁབ་དང་རྡོ་རྗེ་གསོར་བ་ལ་དགྱེས་པ་དེ་ལྟ་བུའི་རྣམ་པར་བསྒོམ་མོ། །འདོད་པ་ཐམས་ཅད་སྟེར་བ་དོན་ཡོད་པ། དངོས་གྲུབ་ཐམས་ཅད་སྟེར་བའོ།