།ཉེ་བར་འཚེ་བ་ཐམས་ཅད་ལ་གཞོན་ནུ་མས་བཀལ་བའི་རས་ལ་ཀ་ར་བཱི་རའི་སྨྱུ་གུས་གིའུ་ཝང་ལ་མངར་གསུམ་གྱི་ནང་དུ་བཅུག་སྟེ་སྔགས་བཟླས་པ་བྱས་ན་ཉེ་བར་འཚེ་བ་ཆེན་པོ་ལས་ཐར་བར་འགྱུར་རོ། །མངོན་སྤྱོད་ཀྱི་ལས་ལ་ནི་དུར་ཁྲོད་ཀྱི་རས་སམ་མཚོན་གྱིས་བཅད་པའི་རས་ལ་དུག་ལ་སོགས་པས་བྲིས་ཏེ་ཆུ་ངོགས་ཀྱི་ས་དང་། རྒྱལ་པོའི་སྒོའི་ས་དང་། ལམ་གྱི་བཞི་མདོའི་ས་དང་། གླང་བུའི་རྭ་ལ་འབྱར་བའི་ས་དང་། བསྒྲུབ་བྱའི་ཆུ་བཏུང་བའི་ས་དང་། ས་ལྔ་ལས་བསྒྲུབ་བྱའི་གཟུགས་བརྙན་བྱས་ཏེ་དེའི་ནང་དུ་བཅུག་ལ་ཚ་བའི་མར་གྱིས་བྱུགས་ཏེ་དུར་ཁྲོད་དུ་སྦས་ལ་ཧེ་རུ་ཀ་གཡོན་བརྐྱང་བའི་ཞབས་ཀྱིས་གནས་ཤིང་ཁམས་གསུམ་རྣམ་པར་རྒྱལ་བའི་སྦྱོར་བ་དང་ལྡན་པས་སྔགས་བརྒྱ་ཕྲག་བརྒྱད་བཟླས་ན་དེ་མ་ཐག་ཏུ་འཆིའོ། །ཡང་ན་སེང་ལྡེང་གི་ཕུར་བུས་བཏབ་ལ་དུར་ཁྲོད་ཀྱི་མེ་ལ་གདུང་བར་བྱས་ན་དེ་མ་ཐག་ཏུ་འཆིའོ། །སྐྲོད་པ་ཡིན་ན་རས་དེ་ཉིད་ལ་བྱ་རོག་གི་སྨྱུ་གུས་ཁྱིའི་འོ་མ་དང་། ད་དུ་རའི་ཁུ་བ་དང་དུར་ཁྲོད་ཀྱི་སོལ་བ་དང་བསྲེས་པས་བྲིའོ། །འབྲས་ཀྱི་ཁུ་བ་ལ་གཟུགས་བརྙན་བྱས་ཏེ་དེའི་ནང་དུ་ལམ་གྱི་བཞི་མདོར་བརྐོས་ཏེ་སྦས་ལ་གཤིན་རྗེ་གཤེད་ཀྱི་སྔགས་ཀྱི་རྣལ་འབྱོར་གྱི་བཟླས་པ་དྲན་ན་དཔག་ཚད་བརྒྱ་ཡིན་ཡང་མི་གནས་སོ། །དབྱེ་བ་ནི་གོས་དེ་ལ་འུག་པའི་སྒྲོའི་སྨྱུ་གུས་དེ་ཉིད་ཀྱི་སོལ་བས་འཁོར་ལོ་ལ་སོགས་པ་བྲིས་ལ་ཆུ་ངོགས་གཉིས་ཀྱི་ལྷོའི་ཕྱོགས་ཀྱི་ས་བླངས་ལ་བསྒྲུབ་བྱའི་གཟུགས་བརྙན་བྱས་ལ་དེའི་ནང་དུ་བཅུག་སྟེ། དེ་ནས་གཉིས་རྒྱབ་སྤྲད་ལ་སྐྲའི་ཐེ་གུ་དཀྲི་བར་བྱའོ། །དུར་ཁྲོད་དུ་བཞག་ལ་དེའི་སྟེང་དུ་ལྕི་བའི་ཉལ་ཉིལ་ལ་དུར་ཁྲོད་ཀྱི་ཤིང་གི་མེས་བསྲོ་ཞིང་གདུང་བར་བྱས་ན་དེ་མ་ཐག་ཏུ་འཕྲོག་བྱེད་དང་ཆུང་མ་ཡང་འབྱེད་པར་བྱེད་ན་ས་གཞིའི་སྐྱེ་འགྲོའི་བུད་མེད་ལྟ་སྨོས་ཀྱང་ཅི་དགོས། རེངས་པར་བྱེད་ན་གོས་དེ་ཉིད་ལ་ཡུང་བས་བྲིས་ལ་ཁུ་བ་སེར་པོ་ལ་བྱས་པའི་རྗེ་བཙུན་མའི་ལྟོ་བར་གཞུག་པ་ནི་དེ་ལས་བྱས་པའི་བསྒྲུབ་བྱའི་གཟུགས་བརྙན་བཅུག་སྟེ་མེ་ཏོག་སེར་པོས་མཆོད་ན་ཞག་བདུན་གྱིས་དགྲ་ཆེན་པོ་ཡང་རེངས་པར་བྱེད་དོ། །གཞན་གྱི་དཔུང་རེངས་པར་བྱེད་ན་དེ་གཉིས་ཀྱི་གོས་ལ་བྱི་བའི་ཁྲག་གིས་ཡལ་ག་བདུན་གྱི་སྨྱུ་གུས་བྲིས་ལ་དེ་ལ་ཕྱུགས་ཀྱི་རྭས་བཏོན་པའི་ས་དང་། ལམ་བཞི་མདོའི་ས་དང་། རྒྱལ་པོའི་སྒོའི་ས་དང་། ཆུ་ཀླུང་གི་ངོགས་གཉིས་ཀྱི་ས་ལས་ཚོགས་བདག་བྱས་ཏེ། དེའི་ལྟོ་བར་བཅུག་ནས་ལམ་གྱི་བཞི་མདོར་བརྐོས་ཏེ་སྦས་ལ་ཁམས་གསུམ་རྣམ་པར་རྒྱལ་བའི་རྣལ་འབྱོར་གྱིས་སྔགས་འདི་བཟླས་པར་བྱའོ།