ཀ་བ་བརྒྱད་ཀྱིས་མཛེས་པ་སྟེ། །རྡོ་རྗེ་རིན་ཆེན་ཟླ་ཕྱེད་ནི། །འོད་ཟེར་ཕྲེང་བས་མཚམས་ཆར་བྲི། །དབུས་སུ་འཁོར་ལོ་ཡང་ནི་བྲི། །རྡོ་རྗེ་བརྒྱད་ཀྱི་འོད་ཕྲེང་ཅན། །འཁོར་ལོའི་སྟེང་དུ་རྡོ་རྗེ་སྟེ། །རྡོ་རྗེ་ཕྲེང་བས་བསྐོར་བའོ། །ལྷ་རྫས་འབར་བ་ཡི་ནི་མེ། །སྟོན་ཀའི་ཟླ་བ་དྲི་མེད་འོད། །བུམ་པ་བརྒྱད་ནི་གཞག་པ་སྟེ། །སྨན་ཆེན་པོ་ལྔ་དང་། འབྲུ་སྣ་ལྔ་དང་། རིན་པོ་ཆེ་སྣ་ལྔ་དང་། དྲི་ཞིམ་པོའི་ཆུས་བཀང་ལ་གོས་གཉིས་ཀྱིས་ཡོངས་སུ་དཀྲིས་ཏེ། ཙནྡན་དཀར་པོས་ཡན་ལག་བྱུགས་ལ་མེ་ཏོག་གི་ཕྲེང་བས་བརྒྱན་ཏེ། སྣ་ཚོགས་པའི་བཟའ་བའི་ལྷ་བཤོས་དང་མར་མེའི་ཕྲེང་བས་ལེགས་པར་བརྒྱན་ནོ། །དེ་ནས་རྣམ་པར་རྒྱལ་བའི་བུམ་པ་ལ་བརྒྱད་བརྒྱ་སྔགས་ཏེ། སྨན་ཆེན་པོ་ལྔ་དང་རིན་པོ་ཆེ་སྣ་ལྔ་དང་། གོས་ལ་སྟེ་དཀར་པོ་དང་། སེར་པོ་དང་དམར་པོ་དང་ལྗང་གུ་དང་སྔོན་པོས་བརྒྱན་ཅིང་བཞག་གོ། །མེད་ན་ཡང་རས་ཡུག་ཟུང་གཅིག་གིས་བྱ་ཞིང་བླ་རེ་བརྐྱང་བ་ཉིད་དང་། སྣ་ཚོགས་པའི་རྒྱལ་མཚན་ལ་མེ་ཏོག་གི་ཕྲེང་བས་དཔྱངས་ཏེ་དྲི་ཞིམ་པོའི་བདུག་སྤོས་ཀྱིས་བདུགས་ལ་སློབ་མ་དེ་རུ་གཞག་པར་བྱའོ། །གོས་ཟུང་གིས་གདོང་དཀྲིས་ལ་དེ་ནས་མགོ་ལ་ཐོད་ཀྱི་རྣམ་པ་ཡོངས་སུ་བཅིང་ལ་ཙནྡན་གྱིས་ཡན་ལག་བྱུག་ཅིང་མེ་ཏོག་གི་ཕྲེང་བས་བརྒྱན་ཏེ་དབང་བསྐུར་བར་བྱའོ། །ཨོཾ་མཱ་རཱི་ཙྱཻ་སྭཱ་ཧཱ། ཉེ་བར་མཁོ་བ་རྣམས་ལ་མངོན་དུ་བསྔགས་པ་བྱས་ལ་དེ་ནས་དབུས་སུ་མིང་ལྷ་མོ་འོད་ཟེར་ཅན་ཞེས་བྱ་བ་འཛམ་བུའི་ཆུ་བོའི་གསེར་ལྟ་བུའི་འོད་བྱེ་བ་ལྟ་བུའི་སེར་མོ། སྐུ་ལ་གོས་སྔོན་པོ་འཆང་ཞིང་ཤང་འགག་དང་སྟོད་གཡོགས་སྔོན་པོ། སྣ་ཚོགས་པའི་གདུ་བུ་ལ་སོགས་པ་རྒྱན་ཐམས་ཅད་ཀྱིས་ཡོངས་སུ་བརྒྱན་པ་དབུས་སུ་དགོད་དེ། ཕྱག་དྲུག་པ་ཞལ་གསུམ་པ། སྤྱན་གསུམ་གསུམ་པ་ཕག་པ་ལ་ཞོན་པ་མཆོད་རྟེན་སྤྱི་བོར་སྐྱེས་པའི་མགོ་སྐྱེས་ཅན་ཕྱག་གཡོན་པ་ན་གཞུ་དང་། སྐུད་པ་དང་མྱ་ངན་མེད་པའི་ཡལ་ག་བསྣམས་པ། ཕྱག་གཡས་པ་ན་མདའ་དང་། རྡོ་རྗེ་དང་། ཁབ་བསྣམས་པའི་ཕྱག་རྒྱ་ཅན་མཆོད་རྟེན་གྱི་ཁོངས་སུ་གཡས་བརྐྱང་བའི་ཞབས་ཀྱིས་བཞུགས་པའོ། །ཨོཾ་ཨརྐྐ་མ་སི་སྭཱ་ཧཱ་ཞེས་བྱ་བ་ནི་ཤར་ཕྱོགས་སུ་དགོད་དོ།