།བུད་མེད་དགུག་པ་མཆོག་ཏུ་གྲུབ་པའོ། །དེ་ནས་གཞན་ཡང་སྦྱོར་བ་འདི་ཡིན་ཏེ། མྱ་ངན་མེད་ཀྱི་ཤིང་ལེབ་ལ་མིའི་བདག་པོའི་གཟུགས་གསལ་པོར་བྲིས་ལ་རང་གི་ཁྲག་དང་གིའུ་ཝང་དང་གུར་གུམ་གྱིས་དེའི་སྙིང་གར་མིང་བྲིས་ཏེ་མཱྃ་གིས་ཡོངས་སུ་བསྐོར་ཅིང་། ཡང་ཙྱཻ་ཡིས་ཡོངས་སུ་བསྐོར་བ་བྱས་ལ། རྐང་པ་གཡོན་པས་མནན་ཅིང་མིའི་བདག་པོའི་མིང་གཟུང་བའི་སྔགས་བཟླས་པ་བྱས་ན་ཞག་གསུམ་གྱིས་ཐེ་ཙོམ་མེད་པར་འགུགས་པར་བྱེད་དོ། །དེ་ནས་གནོད་སྦྱིན་མོ་འགུགས་པར་འདོད་ན་དགེ་བའི་སྐར་མ་བཟང་བ་རྒྱལ་ལ་དུར་ཁྲོད་དུ་ཤིང་ནྱ་གྲོ་དྷའི་རང་བཞིན་གྱི་གཟུགས་བརྙན་ཁྲུ་གང་ཚད་ཙམ་གྱིས་གནོད་སྦྱིན་མོའི་གཟུགས་གསལ་པོ་ལང་ཚོ་ལ་བབ་པ་བྱས་ལ། རྒྱན་ཐམས་ཅད་ཀྱིས་བརྒྱན་པ་གཡས་པའི་ཞབས་ཅུང་ཞིག་བསྐུམ་པ། གཡོན་པའི་ཕྱག་གིས་ཤིང་ནྱ་གྲོ་དྷའི་ཡལ་ག་ལ་འཇུས་པ། སྒེག་པའི་ཉམས་ཀྱིས་རོལ་པའི་འདོད་པ་སྤྱད་པ་ལ་དགའ་བ། སྔོན་དུ་བསྟན་པའི་སྨན་ཆེན་པོས་མིང་དང་། སྔགས་སྤེལ་བའི་སྙིང་གར་བྱས་ལ། སྟེང་གཡོགས་ཡོད་པའི་ས་ཕྱོགས་གཅིག་ཏུ་མིའི་འདུ་འཛི་མེད་པར་ནུབ་མོར་དོག་སར་ཙནྡན་གྱི་དཀྱིལ་འཁོར་ཉེ་བར་བྱུགས་ལ་ཐང་སྐུའི་མདུན་དུ་བཞུགས་པར་བྱའོ། །མེ་ཏོག་གིས་རྣམ་པར་བཀྲམ་སྟེ། མར་མེ་སྦར་བར་བྱ་ཞིང་། གུ་གུལ་གྱི་བདུག་པ་ཡང་སྦྱིན་པར་བྱའོ། །གནོད་སྦྱིན་མོ་གང་གི་མིང་ནས་བཟུང་ནས་བཟླས་པ་བྱས་ན་དེ་འོང་བར་འགྱུར་རོ། །ཞག་དང་པོ་ལ་མཚན་མ་སྟོན་ཅིང་དེ་ནས་ཞག་གཞན་གྱིས་མཐོང་བར་བྱེད་དོ། །དེའི་ཚེ་ཅི་ཡང་མི་སྨྲ་བར་གནས་པར་བྱའོ། །སྨྲ་བཅད་ཀྱི་སྡོམ་པས་ཅི་སྲིད་ཟླ་བ་གཅིག་ཏུ་བྱས་ན་འགྲུབ་པར་འགྱུར་རོ། །གྲུབ་ནས་མཆོག་སྟེར་བར་བྱེད་དོ། །མ་ཉིད་དམ། སྲིང་མོ་ཉིད་དམ། ཆུང་མ་ཉིད་གང་རུང་དུ་སྒྲུབ་པ་པོས་བརྗོད་པར་བྱའོ། །དེའི་ཚེ་ལུས་ཀྱིས་ཁུར་ནས་རང་གི་ཡུལ་དུ་འགྲོ་སྟེ། སྒྲུབ་པ་པོ་བསྐལ་པ་གཅིག་གི་བར་དུ་ཅི་དགས་འཚོ་བར་འགྱུར་རོ། །གང་གི་ཚེ་སྐྱོན་གྱིས་བག་མེད་པར་གྱུར་ཏེ་མ་གྲུབ་ན་སྦྱིན་བདག་ཆེན་པོར་འགྱུར་ཏེ་ཚེ་འདི་ལ་ལོངས་སྤྱོད་རྒྱ་ཆེན་པོ་ཐོབ་ཅིང་སྐྱེ་བ་གཞན་དུ་གནོད་སྦྱིན་གྱི་རིགས་སུ་སྐྱེ་བར་འགྱུར་རོ།