Degé Kangyur volume 90, F.154.b

བདུད་ཐམས་ཅད་དང་། གསེབ་ལམ་བསྲུང་བ་ཐམས་ཅད་དང་། ལ་གཅན་བསྲུང་བ་ཐམས་ཅད་དང་། ཤོ་གམ་གྱི་གནས་བསྲུང་བ་དེ་དག་ཐམས་ཅད་མྱོས་པར་བྱའོ། །​རྣམ་པར་མྱོས་པར་བྱའོ། །​རེངས་པ་དང་། རྨུགས་པ་དང་། ལག་པ་གཟུང་བ་དང་། རྐང་པ་གཟུང་བ་དང་། སེམས་གཟུང་བ་དང་། ལྕེ་གཟུང་བར་བྱའོ། །​རིག་སྔགས་ཀྱི་རྒྱལ་མོ་གསང་སྔགས་ཆེན་པོ་རྗེས་སུ་འཛིན་པ་འདིས་ནི་གང་དང་གང་དུ་ཡང་ཐར་བར་འགྱུར་རོ། །​ཀྱེ་མ་བྲམ་ཟེ་མྱ་ངན་འདས། །​འཇིག་རྟེན་དག་ན་སྲིད་ལས་རྒལ། །​ཁོན་དང་འཇིགས་པ་ཀུན་འདས་པ། །​རིང་མོ་ཞིག་ནས་གཟོད་མཐོང་ངོ་། །​བཟོད་པ་དཀའ་ཐུབ་མཆོག་སྟེ་བཟོད་པ་ནི། །​མྱ་ངན་འདས་པ་མཆོག་ཅེས་སངས་རྒྱས་གསུང་། །​རབ་ཏུ་བྱུང་བ་གཞན་ལ་གནོད་པ་ནི། །​གཞན་ལ་འཚེ་བ་དགེ་སྦྱོང་མ་ཡིན་ནོ། །​ཡང་ན་མིག་དང་ལྡན་པ་དག །​མཐུ་རྩལ་དག་ཀྱང་ཡོད་པ་བཞིན། །​མཁས་པས་འཚོ་བའི་འཇིག་རྟེན་འདིར། །སྡིག་པ་དག་ནི་ཡོངས་སུ་སྤང་། །​ད་ལྟར་བྱུང་དང་འདས་པ་དང་། །​མ་བྱོན་སངས་རྒྱས་གང་ཡིན་པ། །​ཐམས་ཅད་ལ་ཡང་བདག་ཕྱག་འཚལ། །​དེ་དག་ཀུན་ལ་སྐྱབས་སུ་མཆི། །​འཇིག་རྟེན་དགྲ་བཅོམ་བདེ་གཤེགས་ལ། །​ཟླ་བ་སྐྱབས་སུ་མཆི་ལགས་ཀྱིས། །​སངས་རྒྱས་འཇིག་རྟེན་ཐུགས་བརྩེ་རྣམས། །​ཟླ་བ་ཐར་མཛོད་སྒྲ་གཅན་ལས། །​སྒྲ་གཅན་ཟླ་བ་མུན་སེལ་བ། །​ནམ་མཁའ་དག་ལ་འོད་བྱེད་ཅིང་། །​ལྷམ་མེར་འདུག་པ་དཀར་བ་དང་། །​རྣམ་པར་དག་པའི་འོད་ལྡན་པ། །​བར་སྣང་དག་ལ་མ་བཟུང་བར། །​སྐྱེ་དགུའི་སྒྲོན་དེ་མྱུར་དུ་ཐོང་། །​དེ་ནས་རིངས་བཞིན་སྒྲ་གཅན་དེ། །​ལུས་ཀྱང་རྔུལ་ཞིང་སྐྲག་གྱུར་ལ། །​ནད་པ་བཞིན་དུ་བརྟད་པ་ཡིས། །​ཟླ་བ་རྣམ་པར་གཏོང་བར་བྱེད། །​ཅི་ཡི་ཕྱིར་ན་སྒྲ་གཅན་ཁྱོད། །​ལུས་ཀྱང་རྔུལ་ཞིང་སྐྲག་གྱུར་ལ། །​ནད་པ་བཞིན་དུ་བརྟད་པ་ཡིས། །​རིངས་པར་ཟླ་བ་གཏོང་བར་བྱེད། །​སངས་རྒྱས་ཚིགས་བཅད་འདི་བརྗོད་པས། །​གལ་ཏེ་ཟླ་བ་མ་བཏང་ན། །​བདག་གི་མགོ་བོ་ཚལ་བདུན་འགས། །​གསོན་ཡང་བདེ་བར་མི་འགྱུར་རོ། །​ཀྱེ་མ་བདེན་པར་གཟིགས་པ་ཡི། །​སངས་རྒྱས་རྣམས་ཀྱི་འབྱུང་བ་རྨད། །​དེ་དག་གིས་ནི་ཚིགས་སུ་བཅད། །​བརྗོད་ན་སྒྲ་གཅན་ཟླ་བ་གཏོང་། །​བདེན་པ་དང་བདེན་པའི་ཚིག་གང་གིས་འཇིག་རྟེན་དུ་སེམས་ཅན་བརྗེད་ངས་པ་མེད་པའི་ཆོས་ཅན་བྱུང་བ་ནི་དེ་བཞིན་གཤེགས་པའོ་ཞེས་ཡང་དག་པར་སྨྲ་བས་སྨྲ་བ་ནི་དུས་སུ་ཡང་དག་པར་སྨྲ་བས་སྨྲ་བ་ཡིན་ནོ་ཞེས་བྱ་བ་དང་།



The English translation of this folio by 84000 - Translating the words of the Buddha can be found at:
https://read.84000.co/translation/toh563.html?part=UT22084-090-007-193#UT22084-090-007-193