ཤཱ་རིའི་བུ་འདི་བཞི་ནི་རྣམ་པར་ཤེས་པའི་གནས་ཏེ་རྣམ་པར་ཤེས་པ་དེ་ལ་གནས་སོ། །འདི་ལྟ་སྟེ་རྣམ་པར་ཤེས་པའི་གཟུགས་ལ་ཉེ་བར་སོང་ཞིང་གནས། གཟུགས་ལ་དམིགས། གཟུགས་ལ་གནས། དགའ་བ་ལ་བསྟེན་པས་སྐྱེ་ཞིང་འཕེལ་ཏེ་རྒྱས་པར་འགྱུར་བ་དང་། རྣམ་པར་ཤེས་པ་ཚོར་བ་ལ་ཉེ་བར་སོང་ཞིང་གནས། ཚོར་བ་ལ་དམིགས། ཚོར་བ་ལ་གནས། དགའ་བ་ལ་བསྟེན་པས་སྐྱེ་ཞིང་འཕེལ་ཏེ་རྒྱས་པར་འགྱུར་བ་དང་། རྣམ་པར་ཤེས་པ་འདུ་ཤེས་ལ་ཉེ་བར་སོང་ཞིང་གནས། འདུ་ཤེས་ལ་དམིགས། འདུ་ཤེས་ལ་གནས། དགའ་བ་ལ་བསྟེན་པས་སྐྱེ་ཞིང་འཕེལ་ཏེ་རྒྱས་པར་འགྱུར་བ་དང་། རྣམ་པར་ཤེས་པ་འདུ་བྱེད་ལ་ཉེ་བར་སོང་ཞིང་གནས། འདུ་བྱེད་ལ་དམིགས། འདུ་བྱེད་ལ་གནས། དགའ་བ་ལ་བསྟེན་པས་སྐྱེ་ཞིང་འཕེལ་ནས་རྒྱས་པར་འགྱུར་བ་སྟེ། ཤཱ་རིའི་བུ་འདི་ནི་རྣམ་པར་ཤེས་པ་ཞེས་བྱའོ། །གང་ལེན་པའི་ཕུང་པོ་ལྔ་ལ་མི་གནས་པར་རྣམ་པར་ཤེས་པའི་ཕུང་པོ་ཡོངས་སུ་ཤེས་པ་དེ་ནི་ཡེ་ཤེས་ཞེས་བྱའོ། །གཞན་ཡང་རྣམ་པར་ཤེས་པ་ཞེས་བྱ་བ་ནི་སའི་ཁམས་རྣམ་པར་ཤེས་པ་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་རྣམ་པར་ཤེས་པ་སྟེ། འདི་ནི་རྣམ་པར་ཤེས་པ་ཞེས་བྱའོ། །གང་ཁམས་བཞི་ལ་མི་གནས་པར་རྣམ་པར་ཤེས་པའི་ཆོས་ཀྱི་ཁམས་ཀུན་ཏུ་དབྱེ་བ་ཤེས་པ་འདི་ནི་ཡེ་ཤེས་ཞེས་བྱའོ། །གཞན་ཡང་ཤཱ་རིའི་བུ་རྣམ་པར་ཤེས་པ་ཞེས་བྱ་བ་ནི་གང་མིག་གི་ཤེས་པར་བྱ་བའི་གཟུགས་རྣམ་པར་རིག་པ་དང་། རྣ་བས་ཤེས་པར་བྱ་བའི་སྒྲ་རྣམ་པར་རིག་པ་དང་། སྣས་ཤེས་པར་བྱ་བའི་དྲི་རྣམ་པར་རིག་པ་དང་། ལྕེས་ཤེས་པར་བྱ་བའི་རོ་རྣམ་པར་རིག་པ་དང་། ལུས་ཀྱིས་ཤེས་པར་བྱ་བའི་རེག་བྱ་རྣམ་པར་རིག་པ་དང་། ཡིད་ཀྱིས་ཤེས་པར་བྱ་བའི་ཆོས་རྣམ་པར་རིག་པ་སྟེ། འདི་ནི་རྣམ་པར་ཤེས་པ་ཞེས་བྱའོ། །གང་ནང་ཉེ་བར་ཞི་ཞིང་ཕྱི་རོལ་དུ་མི་རྒྱུ་སྟེ་ཡེ་ཤེས་ཀྱི་ཕྱིར་འབྲང་ཞིང་ཆོས་གང་ལ་ཡང་མི་རྟོག་རྣམ་པར་མི་རྟོག་པ་དེ་ནི་ཡེ་ཤེས་ཞེས་བྱའོ། །རྣམ་པར་ཤེས་པ་ནི་དམིགས་པ་ལས་སྐྱེའོ། །རྣམ་པར་ཤེས་པ་ནི་ཡིད་ལ་བྱེད་པ་ལས་སྐྱེའོ། །རྣམ་པར་ཤེས་པ་ནི་ཡོངས་སུ་རྟོག་པ་ལས་སྐྱེ་སྟེ་དེ་ནི་རྣམ་པར་ཤེས་པ་ཞེས་བྱའོ། །གང་འཛིན་པ་མེད་པས་སྙེམས་པ་དང་དམིགས་པ་མེད་རྣམ་པར་རིག་པ་མེད་ཅིང་མི་རྟོག་པ་དེ་ནི་ཡེ་ཤེས་ཞེས་བྱའོ། །གཞན་ཡང་འདུས་བྱས་ལ་སྤྱོད་པའི་ཆོས་ལ་རྣམ་པར་ཤེས་པ་ལ་གནས་ཤིང་གང་འདུས་བྱས་ལ་སྤྱོད་པའི་ཆོས་རྣམ་པར་ཤེས་པ་དེ་ནི་རྣམ་པར་ཤེས་པ་ཞེས་བྱའོ།