འདི་སྐད་ཅེས་ཀྱེ་གཽ་ཏ་མ་བདག་གིས་ཆུའི་ཐིགས་པ་འདི་ཁྱོད་ལ་གདམས་ཀྱིས་ནམས་བདག་ལ་དགོས་པར་གྱུར་པ་དེ་ན་སླར་བྱིན་ཅིག་ཅེས་ཟེར་བ་དང་། དེ་བཞིན་གཤེགས་པས་དེ་བླངས་ཏེ་རྒྱ་མཚོ་ཆེན་པོར་བོར་ནས་དེ་ཆུའི་རྒྱུན་གྱིས་བདས་ཏེ་འདྲེས་ནས་ལྷན་ཅིག་ཏུ་མཐར་གྱིས་རྒྱ་མཚོ་ཆེན་པོར་ཞུགས་སོ། །དེ་ནས་སྐྱེས་བུ་ཚེ་ལོ་བརྒྱ་པ་དེ་ལོ་བརྒྱ་ལོན་པ་དང་ང་ག་ལ་བ་དེར་འོངས་ཏེ། ཕྱིན་ནས་འདི་སྐད་ཅེས་གཽ་ཏ་མ་བདག་གི་ཆུའི་ཐིགས་པ་དེ་དགོས་ཀྱིས་བདག་ལ་བྱིན་ཅིག་ཅེས་ཟེར་ན། ཤཱ་རིའི་བུ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་ཡོད་དེ། ཡེ་ཤེས་དེ་དང་ལྡན་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སྐྲའི་རྩེ་མོ་བྱེ་བ་བརྒྱར་བཙལ་བས་ཆུའི་ཐིགས་པ་དེ་རྒྱ་མཚོ་ཆེན་པོ་དེ་ནས་ཆུ་གཞན་དང་མ་འདྲེས་པར་བླངས་ཏེ། སྐྱེས་བུ་དེ་ལ་སླར་བྱིན་ནོ། །ཤཱ་རིའི་བུ་འདི་ལྟར་དོན་ཤེས་པར་བྱ་བའི་ཕྱིར་ཁྱོད་ལ་དཔེར་བསྟན་ཏེ། དེ་གང་གི་དོན་དུ་བལྟ་ཞེ་ན། འདི་ལྟ་སྟེ། ཤཱ་རིའི་བུ་སྐྱེས་བུའི་ཆུའི་ཐིགས་པ་དེ་བཞིན་གཤེགས་པའི་ལག་ཏུ་བཞག་པ་ཡུན་རིང་མོ་ཞིག་ལོན་ཡང་ཆུད་མི་ཟ་བ་དེ་བཞིན་དུ་ཤཱ་རིའི་བུ། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་དེ་བཞིན་གཤེགས་པའི་ཡེ་ཤེས་འདི་ལྟ་བུ་ལ་དད། ཡིད་ཆེས། རབ་ཏུ་རྟོག་ཅིང་དེ་བཞིན་གཤེགས་པ་བྱམས་པས་ཡིད་ལ་བྱེད་པ་དང་། དེ་བཞིན་གཤེགས་པ་ཉིད་ལ་དམིགས་ནས་དེའི་ཕྱིར་ནམ་མཁའ་ལ་མེ་ཏོག་འཐོར་བ་དེ་དག་ཐམས་ཅད་དགེ་བའི་རྩ་བ་འདིའི་མཐའ་མ་ཐོབ་པར་སྡུག་བསྔལ་མཐར་འབྱིན་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར། ཤཱ་རིའི་བུ་དེ་བཞིན་གཤེགས་པས་ཆོས་ཀྱི་དབྱིངས་རབ་ཏུ་རྟོགས་ཏེ། དེ་རབ་ཏུ་རྟོགས་པས་དེ་བཞིན་གཤེགས་པ་རྣམས་ལས་སེམས་གཅིག་བསྐྱེད་པ་ཡང་ཆུད་མི་ཟའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་གང་རྣམ་པར་ཤེས་པ་མ་མཆིས་པར་འཇུག་པ་མཆིས་སམ་བཀའ་སྩལ་པ། ཤཱ་རིའི་བུ་དེ་ནི་མ་ཡིན་ནོ། །བཅོམ་ལྡན་འདས་ཡེ་ཤེས་ནི་གང་ལགས། རྣམ་པར་ཤེས་པ་ནི་གང་ལགས། ཤཱ་རིའི་བུ་འདི་བཞི་ནི་རྣམ་པར་ཤེས་པའི་གནས་ཏེ་རྣམ་པར་ཤེས་པ་དེ་ལ་གནས་སོ།