།གཞན་ཡང་འདུས་བྱས་ལ་སྤྱོད་པའི་ཆོས་ལ་རྣམ་པར་ཤེས་པ་ལ་གནས་ཤིང་གང་འདུས་བྱས་ལ་སྤྱོད་པའི་ཆོས་རྣམ་པར་ཤེས་པ་དེ་ནི་རྣམ་པར་ཤེས་པ་ཞེས་བྱའོ། །འདུས་མ་བྱས་ལ་ནི་རྣམ་པར་ཤེས་པ་རྒྱུ་བ་མེད་དེ། གང་འདུས་མ་བྱས་ཤེས་པ་དེ་ནི་ཡེ་ཤེས་ཞེས་བྱའོ། །གཞན་ཡང་གང་སྐྱེ་བ་དང་། འཇིག་པ་ལ་རབ་ཏུ་གནས་པ་དེ་ནི་རྣམ་པར་ཤེས་པའོ། །གང་སྐྱེ་བ་མེད་པ་དང་། འགག་པ་མེད་པ་ལ་གནས་པ་དེ་ནི་ཡེ་ཤེས་ཞེས་བྱའོ། །དེ་ལྟར་ཤཱ་རིའི་བུ་འདི་ནི་རྣམ་པར་ཤེས་པ། འདི་ནི་ཡེ་ཤེས་ཏེ། བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་བསམ་གྱིས་མི་ཁྱབ་པ་དེ་ལ་མངོན་པར་དད། ཡིད་ཆེས། རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་པ་རྙེད་ནས་ངོ་མཚར་དང་། རྨད་དུ་འདུ་ཤེས་སྐྱེད་དོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་བསྟན་པའི་ཕྱིར། དེའི་ཚེ་ཚིགས་སུ་བཅད་པ་འདི་དག་གསུངས་སོ། །ཇི་ལྟར་གང་གཱའི་ཀླུང་གི་བྱེ་མ་དཔག་མེད་པ། །དེ་བཞིན་ཕྱོགས་བཅུའི་འཇིག་རྟེན་ཁམས་ཀྱི་རྩྭ་རྣམས་ནི། །དེ་དག་སྐྱེས་བུ་ལ་ལས་མེར་བསྲེགས་ཐལ་བར་བྱས། །ལོ་ནི་བརྒྱ་སྟོང་དག་ཏུ་རྒྱ་མཚོར་དཀྲུགས་པ་རྣམས། །དེ་འདྲ་བ་ཡི་སྟོབས་བཅུ་ཡེ་ཤེས་ཕྲ་མངའ་བས། །ཐལ་བ་བླངས་ནས་འགྲོ་བ་དག་ལ་ལུང་སྟོན་པ། །ཞིང་རྣམས་རབ་འབྱམ་དག་གི་ཤིང་རིགས་འདི། །དེ་ཚིག་ཐལ་བ་འདི་ཞེས་རྣམ་པ་ཐམས་ཅད་མཁྱེན། །འདི་ལྟར་ཕྱོགས་བཅུ་དག་གི་འཇིག་རྟེན་ཁམས་ཀྱི་རྡུལ། །ཐམས་ཅད་རྡུལ་དུ་བྱས་ནས་རྒྱལ་བ་རྣམས་སྟོན་ཏེ། །དེ་དག་ཐམས་ཅད་འགྲང་ཡང་ཆགས་མེད་ཐེ་ཚོམ་མེད། །དེ་ལྟར་བདེ་བར་གཤེགས་ཀྱི་ཡེ་ཤེས་ནམ་མཁའ་བཞིན། །ཇི་སྙེད་ཕྱོགས་བཅུའི་འགྲོ་བ་རྣམས་ཀྱི་སེམས་ཀྱི་རྒྱུད། །གང་དག་འདོད་ཆགས་སྤྱོད་དང་ཞེ་སྡང་གཏི་མུག་ལྡན། །སྤྱོད་པ་ཀུན་གྱི་ཚུལ་ཤེས་བསམ་པ་རྣམས་དང་ནི། །གང་གིས་བློ་ཉམས་གང་གིས་ཐར་བར་འགྱུར་བ་མཁྱེན། །འཇིག་རྟེན་ཀུན་མཆོག་སྟོབས་བཅུ་རྣམས་ཀྱི་ཡེ་ཤེས་ནི། །ཇི་སྙེད་ཕྱོགས་བཅུའི་ཆོས་ཀྱི་དབྱིངས་སུ་རབ་ཞུགས་ཀྱང་། །འདྲེན་པ་རྣམས་ལ་རྟོག་དང་རྣམ་པར་རྟོག་མི་འབྱུང་། །བདེ་གཤེགས་སྲས་པོ་དད་པ་རྒྱལ་ལ་དད་པར་བྱེད།། །།