དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྷའི་གནས་ཀྱི་སྟེང་དང་། ལྷའི་གནས་ཀྱི་འོག་ཐམས་ཅད་ན་མཆོག་ཏུ་རྣམ་པར་རྒྱལ་བ། མཆོག་ཏུ་བཙུན་པ། འོད་ཟེར་བརྒྱ་སྟོང་དུ་མས་ཕྱོགས་བཅུའི་འཇིག་རྟེན་གྱི་ཁམས་གསལ་བར་མཛད་པ། མཁྱེན་པ་ཐམས་ཅད་ཕུན་སུམ་ཚོགས་པར་གྱུར་པ། ཡོན་ཏན་ཡོངས་སུ་རྫོགས་པར་གྱུར་པ་དེས་དགེ་སློང་རྣམས་དང་། འཁོར་མང་པོ་རྣམས་དང་ཐབས་ཅིག་ཏུ་པཉྩ་ལའི་ལྗོངས་སུ་བྱོན་ནས། ནགས་ཚལ་ས་གཞི་ཤིན་ཏུ་མཉམ་ལ་ཚེར་མ་རྣམས་མེད་པ་མེ་ཏོག་མཆོག་དམ་པ་དང་རྩྭ་འཇམ་པོ་དག་གིས་ཀུན་དུ་ཁྱབ་པར་བཀྲམ་པར་གཤེགས་ཏེ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཁྱོད་ཀྱིས་ཤིང་འདིའི་དྲུང་དུ་ངའི་ཆེད་དུ་སྟན་ཐིང་ཤིག །དེ་ནས་ཚེ་དང་ལྡན་པ་ཀུན་དགའ་བོས་བཀའ་མཉན་ནས་གདན་བཏིང་ངོ་། །བཏིང་ཟིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གདན་བཤམས་ལགས་ན་འཕགས་པས་དུས་མཁྱེན་པར་མཛད་དུ་གསོལ། དེ་ནས་བཅོམ་ལྡན་འདས་གདན་གྱི་སྟེང་དུ་སྐྱིལ་མོ་ཀྲུང་བཅས་ཏེ་སྐུ་དྲང་པོར་བསྲང་ནས། ཡང་དག་པའི་དྲན་པ་ཉེ་བར་བཞག་སྟེ་བཞུགས་ནས་དགེ་སློང་རྣམས་ལ་བཀའ་སྩལ་པ། ཁྱེད་ཅག་སྔོན་དཀའ་བ་སྤྱད་པའི་བྱང་ཆུབ་སེམས་དཔའི་སྔོན་གྱི་ལུས་ཀྱི་རིང་བསྲེལ་བལྟ་བར་འདོད་དམ། དགེ་སློང་རྣམས་ཀྱིས་གསོལ་བ། བདག་ཅག་མཐོང་བར་མོས་ལགས་སོ། །དེ་ནས་བཅོམ་ལྡན་འདས་བསོད་ནམས་བརྒྱས་རབ་ཏུ་བརྒྱན་པ། མཚན་དང་དཔེ་བྱད་དང་ལྡན་པའི་ཕྱག་གིས་ས་ལ་བསྣུན་པ་དང་། དེའི་ཚེ་ས་ཆེན་པོ་རྣམ་པ་དྲུག་ཏུ་རབ་ཏུ་གཡོས་པར་གྱུར་པས་ས་གས་ཤིང་བྱེ་བར་གྱུར་པ་དང་། རིན་པོ་ཆེ་སྣ་བདུན་གྱི་མཆོད་རྟེན་རིན་པོ་ཆེ་སྣ་ཚོགས་ཀྱི་དྲ་བས་རབ་ཏུ་བརྒྱན་པ་ཞིག་མངོན་པར་འཕགས་ཏེ་བྱུང་བ་འཁོར་མང་པོ་ཀུན་གྱིས་མཐོང་ནས་ངོ་མཚར་ཆེ་བའི་བསམ་པ་སྐྱེས་པར་གྱུར་ཏོ། །དེ་ནས་བཅོམ་ལྡན་འདས་གདན་ལས་བཞེངས་ཏེ། ཕྱག་མཛད་ནས་གཡས་ཕྱོགས་སུ་བསྐོར་བ་མཛད་དེ་སླར་གདན་ལ་བཞུགས་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ།