Degé Kangyur volume 89, F.4.b

རྡོ་རྒྱུས་ལ་མངོན་པར་བསྔགས་པས་སའི་སྟེང་དུ་ཡང་དང་ཡང་དུ་བྲིས་ཏེ། ལུགས་ལས་བཟློག་པས་ཕྱིས་ན་བཅིངས་པ་ལས་གྲོལ་བར་བྱེད་དོ། །​ལོ་མ་ལ་མིང་དང་སྔགས་སུ་བཅས་པ་མངོན་པར་བྲིས་ཏེ། མགོ་བོ་ལ་བཏགས་ན་བཅིངས་པ་ཐམས་ཅད་གྲོལ་བར་འགྱུར་རོ། །​ཨོཾ་ཏཱ་རི་ཎི་ཏཱ་ར་ཡ། མོ་ཙ་ནི་མོ་ཙ་ཡ། མོ་ཀྵ་ནི་མོ་ཀྵ་ཡ། ཛཱི་བྃ་བ་ར་དེ་སྭཱ་ཧཱ། སྔགས་ཀྱི་རྒྱལ་པོ་འདི་ལེགས་པར་བཟླས་ན་ལས་ཐམས་ཅད་བྱེད་པར་འགྱུར་ཞིང་། ལན་བདུན་མངོན་པར་བསྔགས་པའི་ཏིལ་མར་གྱིས་སྐྱེ་བའི་སྒོ་ལ་བསྐུས་ན་སྦྲུམ་མ་བདེ་བར་བཙའ་བར་འགྱུར་རོ། །​ལན་བདུན་མངོན་པར་བསྔགས་པའི་ཆུ་འཐུངས་ན། མངལ་འཁྱིམ་པ་བདེ་བར་བཙའ་བར་བྱེད་དོ། །​རྟག་ཏུ་བཟླས་པས་བདག་དང་གཞན་འཆིང་བ་ལས་ཐར་བར་འགྱུར་རོ། །​སྐེའམ་དཔུང་པ་ལ་བསྲུང་བ་བཏགས་པས་འཇིགས་པ་ཐམས་ཅད་ལས་སྲུང་བར་བྱེད་དོ། །​ཨོཾ་ཏཱ་རེ་ཏུཏྟྭ་རེ་ཏུ་རེ་མོཀྵ་ཡ་ཛཱི་བཾ་སྭཱ་ཧཱ། སྔགས་ཀྱི་རྒྱལ་པོ་འདི་སྔར་སྨོས་པའི་བྱ་བ་བྱེད་པར་འགྱུར་རོ། །​གུར་གུམ་གྱིས་གྲོ་ག་ལ་གང་གི་མིང་སྨོས་པའི་སྔགས་མངོན་པར་བྲིས་ལ་སྤྲ་ཚིལ་དུ་གཏུམས་ཏེ། དྲི་ཞིམ་པོའི་ཆུས་བཀང་བའི་བུམ་པ་གསར་པའི་ནང་དུ་བཅུག་སྟེ། མེ་ཏོག་དྲི་ཞིམ་པོ་ལ་སོགས་པས་དུས་གསུམ་དུ་མཆོད་པ་བྱས་ན་འཐབ་པ་དང་འཐབ་མོ་དང་རྩོད་པ་ཐམས་ཅད་ལས་རྣམ་པར་རྒྱལ་བར་འགྱུར་རོ། །​གུར་གུམ་གྱི་གྲོ་ག་ལ་གང་གིས་མིང་སྨོས་པ། ཨོཾ་ཨེ་རཎྜ་སྱ་བ་ནེ་ཀཱ་ཀོ །​རང་གཱ་ཏཱི་ར་མུ་ཡ་སྠི་ཏཿཡི་བ་ཏུ་དཱུ་ཏ། ཡཱ་ནཱི་ཡམྤི་ཤལྱཱ་བྷ་བ་ཏུ་གུརྦི་ཎཱི། ཨོཾ་ཨེ་རཎྜ་བ་ནེ་ཀཱ་གཿགངྒཱ་ཏཱི་ར་མུ་བ་སྠི་ཏཿཔི་བ་ཏུ་དཱུ་ཏཿསཱ་ནཱི་ཡམྦི་ཤལྱཱ་བྷ་བ་ཏུ་གུརྦྦི་སྭཱ་ཧཱ། ལན་བདུན་མངོན་པར་བསྔགས་པའི་ཆུ་ཁྱོར་བ་གསུམ་ཕོ་ཉར་འོངས་པས་འཐུངས་ན། སྦྲུམ་མ་བདེ་བར་བཙའ་བར་བྱེད་དོ། །​ཨོཾ་ཨ་མ་ར་ཎི་ཛཱི་བན་ཏི་ཡེ་སྭཱ་ཧཱ། སྔགས་ཀྱི་རྒྱལ་པོ་འདི་ལེགས་པར་བཟླས་ན་ལས་ཐམས་ཅད་བྱེད་པར་འགྱུར་རོ། །​མངོན་པར་བསྔགས་པའི་ཆུ་འཐུངས་ན་འབྲུམ་བུ་འོང་བར་མི་འགྱུར་རོ། །​ལུས་ལས་སྐྱེས་པའི་དུག་མི་བཟད་པ་དང་སྤྲེའུ་དུག་དང་སྦྲུལ་དུག་ལ་སོགས་པའི་རྨ་ལ་ཡུང་བ་དང་ཨ་རུ་ར་དང་རུ་རྟ་ལ་སོགས་པ་ལ་ཡོངས་སུ་བཟླས་ཏེ་བསྐུས་ན་རང་བཞིན་དུ་གནས་པར་འགྱུར་རོ། །​ནད་དང་རྣམ་པར་འཚེ་བ་ཐམས་ཅད་ལ་སྔགས་མདུད་བཅིངས་ན་ཞི་བར་བྱེད་དོ།



The English translation of this folio by 84000 - Translating the words of the Buddha can be found at:
https://read.84000.co/translation/toh544.html?part=UT22084-089-001-430#UT22084-089-001-430