Degé Kangyur volume 89, F.1.b

༄༅༅། །​རྒྱ་གར་སྐད་དུ། སིདྡྷ་ཨེ་ཀ་བཱི་ར་མ་ཧཱ་ཏནྟྲ་རཱ་ཛ་ནཱ་མ། བོད་སྐད་དུ། དཔའ་བོ་གཅིག་པུ་གྲུབ་པ་ཞེས་བྱ་བའི་རྒྱུད་ཀྱི་རྒྱལ་པོ་ཆེན་པོ། བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །​དཔའ་བོ་གཅིག་གྲུབ་དཔའ་བོའི་གཙོ། །​རབ་མཆོག་སྨྲ་བ་རྣམས་ཀྱི་མཆོག །​འགྲོ་བའི་བླ་མ་འཇམ་རྡོ་རྗེས། །​འཇིག་རྟེན་དོན་དུ་རྒྱུད་རབ་གསུངས། །​ལྷ་ཉིད་གསང་སྔགས་ཚུལ་གྱིས་ནི། །​དངོས་གྲུབ་ཐམས་ཅད་སྩོལ་མཛད་པ། །​སྔགས་པས་དེ་ཉིད་བསྒོམས་ནས་ནི། །​དེ་གྲུབ་ན་ནི་འགྲུབ་འགྱུར་ཏེ། །​སྔགས་པ་ལུས་ནི་རྣམ་དག་དང་། །​གང་ཚེ་དངོས་གྲུབ་ཕྲ་མོ་འགྲུབ། །​སྣོད་དུ་གྱུར་པའི་ལུས་ལ་ནི། །​དངོས་གྲུབ་ཆེན་པོ་རབ་ཏུ་སྐྱེ། །​རིམ་པ་འདི་ཡིས་འདི་ལ་ནི། །​ས་ལ་སོགས་པ་འཐོབ་པ་སྐྱེ། །​སྔགས་པས་ཡིད་བཞིན་ནོར་བུ་ལྟར། །​རྟག་ཏུ་སེམས་ཅན་དོན་བྱེད་དོ། །​དེ་ལྟར་མཁྱེན་ནས་ཐུགས་བརྩེས་ནོན། །​རྡོ་རྗེ་འཆང་སོགས་ཀྱིས་ཞུས་ཚེ། །​གྲུབ་པའི་གསང་སྔགས་བསྡུས་པ་ནི།



The English translation of this folio by 84000 - Translating the words of the Buddha can be found at:
https://read.84000.co/translation/toh544.html?part=UT22084-089-001-424#UT22084-089-001-424