།དེ་དག་གི་སྟེང་དུའང་རང་སངས་རྒྱས་བརྒྱད་བྲི་བར་བྱ་སྟེ། དགེ་སློང་གི་ཆ་བྱད་འཛིན་པ་ལུས་སྐྱེས་བུ་ཆེན་པོའི་མཚན་དང་ལྡན་པ། ཆོས་གོས་དམར་པོ་གྱོན་པ། སྐྱིལ་མོ་ཀྲུང་གིས་ཉེ་བར་གནས་པ། རིན་པོ་ཆེའི་ཨུཏྤལ་ལ་འདུག་པ་ཆ་བྱད་ཞི་བའི་བདག་ཉིད་ཀུན་ནས་འོད་འཕྲོ་བའི་ཕྲེང་བས་ཁྱབ་པ། མེ་ཏོག་དྲི་ཞིམ་པོས་གཅལ་བཀྲམ་པ་ལ་འདི་ལྟ་སྟེ། མེ་ཏོག་མཱ་ལི་ཏ་དང་དབྱར་གྱི་མེ་ཏོག་དང་། དྷཱ་ནུཥྐ་རི་ཀ་དང་པུན་ནཱ་ག་དང་ནཱ་ག་གེ་སར་ལ་སོགས་པའི་མེ་ཏོག་གིས་རས་རིས་ཀུན་ནས་གཅལ་བཀྲམ་པར་བྲི་བར་བྱའོ། །བཅོམ་ལྡན་འདས་ཤཱཀྱ་ཐུབ་པའི་གཡོན་ཕྱོགས་སུ་འཕགས་པ་འཇམ་དཔལ་གྱི་སྟེང་དུ་རིན་པོ་ཆེ་དུ་མས་ཉེ་བར་སྤྲས་པ། ཤིན་ཏུ་ཡངས་པའི་གཞལ་མེད་ཁང་གི་དཀྱིལ་འཁོར་བྲག་གི་ཚོགས་ཀྱིས་ཤིན་ཏུ་ཉེ་བར་མཛེས་པར་བྱས་པ། རིན་པོ་ཆེའི་ཨུཏྤ་ལས་ཤིན་ཏུ་བཀབ་པ་རིའི་རྣམ་པ་ལྟ་བུ་བྲི་བར་བྱའོ། །གནས་དེར་སངས་རྒྱས་བཅོམ་ལྡན་འདས་བརྒྱད་བྲི་བར་བྱ་སྟེ། འདི་ལྟ་སྟེ་རིན་ཆེན་གཙུག་ཏོར་ཅན་རིན་པོ་ཆེ་བཻ་ཌཱུརྱའི་འོད་རྣམ་པར་འཕྲོ་བ། ཀུན་ནས་འོད་འདོམ་གང་བ། རིན་པོ་ཆེ་པདྨ་རཱ་ག་དང་ཨིནྡྲ་ནཱི་ལ་དང་། མརྒད་ལ་སོགས་པ་དང་། བཻ་ཌཱུརྱ་དང་ཨསྨ་གར་བྷ་ལ་སོགས་པ་ནོར་བུ་རིན་པོ་ཆེ་ཆེན་པོའི་བྱེ་བྲག་ཀུན་ནས་འོད་འཕྲོ་བ་དང་ལྡན་པ་ཉི་མ་འཆར་ཀའི་མདོག་འདྲ་བ། དེ་བཞིན་གཤེགས་པའི་སྐུ་ལྷུང་བཟེད་དང་ཆོས་གོས་དང་བླ་གོས་དང་ལྡན་པ། སྐྱིལ་ཀྲུང་གིས་བཞུགས་ཤིང་ཆོས་འཆད་པ། ན་བཟའ་སེར་པོ་མནབས་པ། སྐྱེས་བུ་ཆེན་པོའི་མཚན་གྱིས་སྐུ་ལ་ཁྱབ་པ། དཔེ་བྱད་བཟང་པོ་བརྒྱད་ཅུས་སྐུ་ཉེ་བར་མཛེས་པ། ཞི་བའི་གཟིགས་པ་དང་ལྡན་པ། རྣམ་པ་ཐམས་ཅད་ཀྱི་མཆོག་དང་ལྡན་པའི་དེ་བཞིན་གཤེགས་པ་རིན་ཆེན་གཙུག་ཏོར་ཅན་བྲི་བར་བྱའོ། །གཉིས་པ་དེ་བཞིན་གཤེགས་པ་མེ་ཏོག་ཡང་དག་པར་སྐྱེས་པའི་དབང་པོའི་རྒྱལ་པོ་ཁ་དོག་གསེར་འདྲ་བ་བྲི་བར་བྱའོ། །གསུམ་པ་པདྨའི་གཙུག་ཏོར་པདྨའི་གེ་སར་དང་འདྲ་བ་ཆོས་འཆད་པ་བྲི་བར་བྱའོ། །བཞི་པ་སྤྱན་བཟང་པོ་ཡང་བྲི་བར་བྱའོ། །ལྔ་པ་བསྙེན་པར་དཀའ་བ་དང་། དྲུག་པ་རྒྱལ་བ་རྣམ་པར་སྣང་མཛད་དང་། བདུན་པ་སྨན་གྱི་བླ་བཻ་ཌཱུརྱའི་འོད་ཀྱི་རྒྱལ་པོ་དང་། བརྒྱད་པ་དེ་བཞིན་གཤེགས་པ་སྡུག་བསྔལ་ཐམས་ཅད་ཞི་བར་བྱེད་པའི་སྤྱན་གྱི་རྒྱལ་པོ་བྲི་བར་བྱའོ།