བ་རུ་རའི་འབྲས་བུ་ལྔའམ་བརྒྱད་ཏིལ་མར་གྱི་ནང་དུ་བཅུག་ལ་བཙོས་ཏེ། ཏིལ་མར་དེ་ལས་བ་རུ་རའི་འབྲས་བུ་བླངས་ནས་དེ་ལ་ཡོངས་སུ་བཟླས་ཏེ། གསེར་དང་། དངུལ་དང་། ཟངས་མ་དང་། ས་ལས་བྱས་པའི་སྣོད་སར་པ་ལ་བཅུག་ནས། ཉལ་བའི་རྐང་པའི་མཐར་བཞག་ལ། གནོད་སྦྱིན་འདི་ཉིད་ཀྱི་སྔགས་ཡི་གེ་གཅིག་པ་སྟོང་གིས་མངོན་པར་བསྔགས་པ་བྱས་ནས། གནས་དབེན་ཞིང་མུན་པའི་ཕྱོགས་སུ་མེ་ཏོག་གིས་གཅལ་བཀྲམ་པ་ལ་ཉལ་བར་བྱས་ན། མི་མ་ཡིན་པ་འོངས་ནས་རྐང་པ་གཉིས་ལ་ལྷའི་བདེ་བའི་རེག་པ་འཇམ་པའི་ལག་པའི་མཐིལ་གྱིས་བསྐུ་ཞིང་བྱུག་པར་བྱེད་དེ། གང་གིས་རེག་པ་ཙམ་གྱི་ལྷའི་བདེ་བའི་རེག་པས་གཉིད་འབྱུང་བར་འགྱུར་ཏེ། གང་གི་ཉི་མ་ཤར་ན་ཡང་མཚན་མོའི་མཐར་དཀའ་བའི་གཉིད་སད་པར་འགྱུར་ཏེ། རབ་ཏུ་སད་ན་ཡང་དེ་ཉིད་སེམས་པར་འགྱུར་ཏེ། དེ་དང་ལྷན་ཅིག་འདོད་པ་སྤྱད་པར་ཡང་མི་བྱ་སྨྲ་བར་ཡང་མ་བྱས་ན་ཟླ་བ་དྲུག་གིས་འགྲུབ་པར་འགྱུར་རོ། །དེ་ནས་དེ་ལྷའི་གཟུགས་དང་ལྡན་པའི་བག་མ་སར་པ་འདྲ་བ། གཡོག་འཁོར་གྱིས་ཡོངས་སུ་བསྐོར་བ། ལག་ན་མར་མེ་ཐོགས་པ། འཇིག་རྟེན་རྣམས་འོད་བཟང་པོ་དག་གིས་གསལ་བར་བྱས་པ། མལ་སྟན་ཡོངས་སུ་འཛིན་པ། རྒྱན་སྣ་ཚོགས་འབར་བ་དང་ལྡན་པ་འོངས་ནས་ཀྱང་ཚིག་རྗོད་པར་བྱེད་ལ། འདོད་པ་ལ་ལོངས་སྤྱོད་པའི་ཡོ་བྱད་ཡོངས་སུ་འཛིན་པ་འོངས་ནས་ཀྱང་། སྒྲུབ་པ་པོ་ལ་མགུལ་པ་ནས་འཁྱུད་པར་བྱེད་དེ། དེ་ནས་བཟུང་ནས་ཆུང་མ་སྡུག་པ་བཞིན་དུ་རྗེས་སུ་མཐུན་པར་བྱེད་དོ། །འོངས་ན་ཡང་འདོད་པ་ལ་བརྟེན་པར་བྱའོ། །མཚན་མོ་ཡོངས་སུ་སྤྱད་ནས་ཐོ་རངས་མི་སྣང་བར་འགྱུར་ཏེ། གསེར་སྲང་སྟོང་རི་བའི་མུ་ཏིག་གི་ཕྲེང་བ་མལ་དུ་ཉིན་རེ་ཞིང་ཡོངས་སུ་བོར་ནས་འགྲོ་བར་ཡང་བྱེད་དོ། །ལྷག་མ་མ་ལུས་པར་ཐམས་ཅད་ཉིན་རེ་ཞིང་ཟད་པར་བྱས་ཏེ། གལ་ཏེ་ཅུང་ཟད་འཇོག་པར་བྱེད་ན་ཡང་ཡོད་པར་མི་འགྱུར་རོ། །སུ་ལ་ཡང་བརྗོད་པར་མི་བྱ་སྟེ། གལ་ཏེ་རྗོད་པར་བྱེད་ན་ཕྱིར་ཡང་འོང་བར་མི་འགྱུར་རོ། །