།སྔགས་དང་རྒྱུད་ནི་རིགས་པ་ལ། །གང་ཞིག་རྟག་ཏུ་མི་འཇུག་པའོ། །སྔགས་དང་ཕྱག་རྒྱ་མཐའ་དག་ནི། །གང་ཞིག་ཆོ་ག་ལྡན་བྱེད་པའོ། །འཇམ་དཔལ་གཞོན་ནུ་འདི་དག་ནི། །ཡང་དང་ཡང་དུ་བསྟན་པ་ཡིན། །སྔགས་ཀྱི་རིག་པ་མཐའ་དག་ནི། །ཕྱག་རྒྱས་སྔགས་ནི་ཕན་པ་འབྱུང་། །དེ་སྲིད་ལས་ལ་ཆོ་གའི་རྒྱལ། །འདིས་ནི་འབྲས་བུ་རྒྱ་ཆེན་འབྱུང་། །འཇིག་རྟེན་གསང་མཆོག་ཕན་པ་དང་། །སྔགས་དང་ཕྱག་རྒྱས་དམ་བཅས་པ། །དེ་ནས་རིགས་ལྡན་འཇམ་དཔལ་ཏེ། །ཁྱབ་པར་བྱེད་པ་བྱིས་པའི་གཟུགས། །ཅུང་ཟད་འཛུམ་པའི་བཞིན་གྱུར་གནས། །གཞོན་ནུ་སྣ་ཚོགས་ཡང་དག་འབྱུང་། །བྱང་ཆུབ་སེམས་དཔའ་བརྩོན་འགྲུས་ཆེ། །ས་བཅུ་ལ་ནི་གནས་པ་ཡིས། །སངས་རྒྱས་ཉི་མའི་གཉེན་གྱུར་པ། །ཐུབ་པ་མཆོག་ལ་རབ་ཏུ་ཞུས། །བཅོམ་ལྡན་སྔགས་ཀྱི་རྒྱུད་དག་ནི། །གང་ཡིན་འདི་ནི་འཇིག་རྟེན་བསྟན། །སྔོན་གྱི་སངས་རྒྱས་དག་གིས་ཀྱང་། །དེ་ཡང་བདག་ལ་གསུངས་པ་ཡིན། །དེ་ལྟར་ཤཱཀྱ་སེང་གེ་ཡིས། །ཅི་ཡི་ཕྱིར་ན་རབ་ཏུ་གསུངས། །བདག་ནི་དེ་ལྟར་ཐེ་ཚོམ་འཚལ། །ཐུབ་པ་མཆོག་གིས་བདག་ལ་གསུངས། །བློ་ལྡན་ཀ་ལ་པིང་ཀའི་སྐད། །ཚངས་པ་ཡི་ནི་གསུང་དབྱངས་ཀྱིས། །ས་བཅུ་ལ་ནི་རབ་གནས་པའི། །བྱང་ཆུབ་སེམས་དཔའ་ལ་གསུངས་པ། །སྔོན་ནི་བསྐལ་པ་མང་པོ་རུ། །ང་ནི་འཁོར་བར་འཁོར་བ་ན། །ཐུབ་དབང་མེ་ཏོག་ཀུན་སྐྱེས་ལས། །ཆོ་གའི་རྒྱལ་པོའང་ང་ཡིས་ཐོབ། །དེ་དང་དེར་ནི་སེམས་ཅན་ལ། །ཕན་པ་མང་པོ་བྱས་པ་ཡིན། །ཐུགས་རྗེའི་དབང་དུ་སོང་ནས་ནི། །དེ་ཚེ་བདག་གི་སྨོན་ལམ་བྱས། །སངས་རྒྱས་མཆོག་ཏུ་དེ་ཚེ་བདག །དུས་ཀྱི་མཐར་ནི་ཡང་དག་བྱུང་། །ཆོས་ཀྱི་འཁོར་ལོ་བསྐོར་ནས་ནི། །བསྟན་པའི་དོན་ནི་བྱས་པ་ཡིན། །ཕྱི་མ་ཡི་ནི་དུས་དག་ཏུ། །དེ་ཚེ་ང་ནི་མྱ་ངན་འདའ། །དེ་ན་ཆོ་གའི་རྒྱལ་དབང་པོ། །ཁྱོད་ཀྱི་དྲུང་དུ་ང་ཡིས་བསྟན། །ང་ཡང་འཇིག་རྟེན་མྱ་ངན་འདས། །འཛམ་བུའི་གླིང་ནི་རབ་སྟོངས་ཤིང་། །དེ་བཞིན་སྟོན་པའི་ཆོས་ཀྱི་མཛོད། །རྩོད་དུས་ཐག་རིང་གྱུར་པ་ན། །སེམས་ཅན་རྣམས་ལ་བསྟན་པའི་དོན། །ཆོ་གའི་རྒྱལ་པོ་གཅིག་བྱེད་འགྱུར།