།སྔགས་ནི་དོན་ཀུན་སྒྲུབ་པ་སྟེ། །རྩེ་གཅིག་སེམས་ཀྱིས་འགྲུབ་པར་འགྱུར། །རྨོངས་པའི་བདག་ཉིད་གཡེང་བའི་སེམས། །དེ་ལ་གྲུབ་པ་འགྲུབ་མི་འགྱུར། །གང་ལ་ཡིད་ནི་དག་པ་དང་། །བསྟན་པ་ལ་ནི་རབ་དད་པ། །འབྲས་བུ་མཐའ་དག་འགྲུབ་པ་སྟེ། །འགྲོ་བ་དམ་པ་འཐོབ་པར་འགྱུར། །དཀོན་མཆོག་གསུམ་ལ་དད་པ་ནི། །འདོད་པའི་གྲུབ་པར་ཉེ་བར་བསྟན། །འཕགས་པ་འཇམ་དཔལ་གྱི་རྩ་བའི་ཆོ་ག་བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་ལས། ལས་དང་བྱ་བ་དང་ཆོ་ག་དང་རྒྱུ་མཚན་ཤེས་པའི་ལེའུ་རབ་འབྱམ་ལས། ཉི་ཤུ་རྩ་བདུན་པ་རྫོགས་སོ།། །།དེ་ནས་བཅོམ་ལྡན་འདས་ཤཱཀྱ་ཐུབ་པས་གཞན་ཡང་གནས་གཙང་མའི་གཞལ་མེད་ཁང་ལ་གཟིགས་ནས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཁྱོད་ཀྱི་ཕྱག་རྒྱ་དང་སྔགས་རབ་འབྱམ་མཆོག་ཏུ་ཤིན་ཏུ་གསང་བ་ཉོན་ཅིག །མ་དད་པའི་སེམས་ཅན་དང་། དེ་བཞིན་གཤེགས་པའི་བསྟན་པ་ལ་མངོན་པར་དད་པ་མེད་པ་དང་། དམ་ཚིག་མེད་པ་དང་། གནང་བ་མེད་པ་དང་། དཀོན་མཆོག་གསུམ་གྱི་གདུང་རྒྱུན་གཅོད་པར་བྱེད་པ་དང་། མི་དགེ་བའི་བཤེས་གཉེན་གྱིས་ཡོངས་སུ་ཟིན་པ་དང་། བསོད་ནམས་མི་འདོད་པ་དང་། སྐྱེ་བོ་སྡང་བ་དང་། འགྲོགས་ཤིང་འདྲེས་པ་དང་། སྡིག་པའི་གྲོགས་པོས་ཡོངས་སུ་ཟིན་པ་དང་། སངས་རྒྱས་དང་ཆོས་ལས་ཐག་རིང་དུ་གྱུར་པ་དང་། ཆོ་ག་འདི་ལ་འབྲས་བུ་མེད་པར་གྱུར་པ་དང་། སློབ་དཔོན་གྱི་མན་ངག་མེད་པ་དང་། གཞོན་ནུ་ཁྱོད་ཀྱི་གསང་བའི་དཀྱིལ་འཁོར་ལ་དབང་མ་བསྐུར་བ་དང་། དེ་བཞིན་གཤེགས་པའི་རིགས་ལ་དམ་ཚིག་མ་མཐོང་བ་དང་། སྐྱེ་བོ་མངོན་པར་མི་འདོད་པ་དང་། སྣོད་དུ་མ་གྱུར་པའི་སེམས་ཅན་རྣམས་ལ་བསྟན་པར་མི་བྱའོ། །སངས་རྒྱས་ཆོས་ལ་མ་དད་དང་། །བྱང་ཆུབ་ལམ་ནི་རིང་གྱུར་ལ། །དེ་ལ་ཕྱག་རྒྱ་མི་སྦྱིན་ཞིང་། །རྒྱུད་ཉིད་ཀྱང་ནི་བསྟན་མི་བྱ། །བག་མེད་རྨོངས་པར་གྱུར་པའམ། །ཡང་ན་གལ་ཏེ་ཆགས་པས་བྱིན། །ཟློས་པ་ཕྱིན་ཅི་ལོག་བྱེད་ལ། །དེ་ལ་སྔགས་ནི་མི་འགྲུབ་བོ། །ཕྱག་རྒྱ་ཉེ་བར་མི་འགྱུར་ཞིང་། །སྔགས་ཉིད་ཀྱང་ནི་གཞན་དུ་འགྱུར།