།གང་གི་སྤྱོད་འགྲོས་སྤྱོད་པ་དང་། །རྣམ་པ་སྣ་ཚོགས་ཚུལ་དང་ནི། །རྣམ་པ་སྣ་ཚོགས་མཚན་ཉིད་དང་། །རྣམ་པ་སྣ་ཚོགས་སེམས་ཅན་གཙོ། །རྣམ་པ་སྣ་ཚོགས་སྐྱེ་གནས་འདོད། །དེ་ལྟར་གདོན་འཇུག་མཚན་མ་ནི། །མཚན་ཉིད་འགྲོས་དང་སྤྱོད་པ་ཡིན། །མི་རྣམས་ཀྱི་ནི་བདེ་སྐྱེད་པ། །སེམས་ཅན་དུ་ཡང་བྱ་བ་སྟེ། །གཞོན་ནུ་སྣ་ཚོགས་ཡང་དག་འབྱུང་། །བསྲུང་བའི་དོན་དུ་རབ་སྦྱར་བྱ། །ཡི་གེ་དྲུག་པས་བྱ་བ་ནི། །ཕྱག་རྒྱ་ཆེན་པོ་དང་ལྡན་པའི། །སྔགས་ཉིད་ཁོ་ན་བཟླས་བྱས་ན། །བསྲུང་བ་ཆེན་པོར་འགྱུར་བ་ཡིན། །འཕགས་པ་འཇམ་དཔལ་གྱི་རྩ་བའི་ཆོ་ག་བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་ལས། གདོན་འཇུག་པའི་སྤྱོད་པའི་ཆོ་གའི་ལེའུ་རབ་འབྱམ་ལས། ཉི་ཤུ་རྩ་ལྔ་པ་རྫོགས་སོ།། །།དེ་ནས་བཅོམ་ལྡན་འདས་ཤཱཀྱ་ཐུབ་པས། གཞན་ཡང་གནས་གཙང་མའི་གཞལ་མེད་ཁང་ལ་གཟིགས་ནས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཁྱོད་ཀྱི་སྔགས་རྣམས་རྒྱུད་ཐམས་ཅད་ལ་ཡང་དག་པར་འཇུག་པ། རིག་པ་ཐམས་ཅད་ལ་འོས་པ། དུས་དཔག་ཏུ་མེད་པའི་ཡོན་ཏན་མ་ལུས་པའི་འབྲས་བུ་འབྱུང་བ་ཡང་རྗེས་སུ་འབྲེལ་བའི་མཚན་མའི་ཚད་ཡོད་དེ། དེ་འགྲུབ་པར་བྱ་བའི་རྒྱུར་བཤད་པ་ནི་འདི་ལྟ་སྟེ། སྐྱེ་བ་གཞན་གྱིས་འགྲུབ་པ་ཉིད། །དུས་ཀྱི་རྒྱུས་ནི་འགྲུབ་པ་མེད། །དེ་ཡི་ཚད་དང་སྦྱོར་བ་ནི། །སྔོན་བྱུང་རྒྱུ་ལས་བྱུང་བ་ཡིན། །རྩེ་གཅིག་བདག་གིར་བྱེད་པས་འགྲུབ། །གྲུབ་པ་རིགས་པ་རྣམ་དཔྱོད་པའོ། །རིགས་པ་གཞོན་ནུ་ཁྱོད་བསྟེན་ན། །ལུས་ཅན་ཀུན་ལ་རབ་ཏུ་སྣང་། །མཐར་གྱིས་བྱས་པའི་ལས་རྣམས་ནི། །རིགས་པ་ཞེས་ནི་བྱ་བ་ཡིན། །དཔའ་བོའི་རིགས་ལྡན་དེ་སྦྱོར་བས། །གྲུབ་པ་མཆོག་ནི་ཐོབ་པར་འགྱུར། །གྲུབ་མེད་བསྒྲུབ་བྱའི་ལས་རྣམས་མེད། །ལས་རྣམས་མེད་པར་འགྲུབ་པའང་མེད། །ལས་དང་བྱེད་པར་ཡང་དག་ལྡན། །ཡང་དག་ལྡན་པས་གྲུབ་པ་འཐོབ། །ཆོ་ག་ལྡན་པའི་རྒྱུ་ཡིས་ནི། །གནས་པ་མཆོག་ནི་ཐོབ་པར་འགྱུར། །སྔགས་པ་སྔགས་ནི་མི་སྒྲོགས་ན། །སྔགས་མིན་པ་ཡང་སྔགས་པར་འགྱུར།