།ཇི་སྟེ་དེ་ཉིད་དུ་འདུག་ནའང་ཁྱབ་འཇུག་གི་འཁོར་ལོའི་འཇིགས་པ་མེད་པར་འགྱུར་རོ། །ཅི་སྟེ་འཁོར་ལོ་ནང་དུ་བྱུང་ན་ཡང་སྔགས་དྲན་པ་ཙམ་གྱིས་ཐལ་བར་འགྱུར་རོ། །བསམས་པ་ཙམ་གྱིས་ཕྱིར་གསོ་བར་ཡང་ནུས་སོ། །ནམ་ཡང་ཕྱིས་རབ་ཏུ་འཇུག་པར་ཡང་མི་འགྱུར་རོ། །ཡར་ངོ་དེ་དང་དེའི་ཚེས་གཅིག་ནས་བརྩམས་ཏེ། དུས་གསུམ་དུ་སྣ་མའི་མེ་ཏོག་ལ་ལན་གཅིག་བཟླས་ནས། བཅོམ་ལྡན་འདས་ཀྱི་ཞབས་ཀྱི་མཐེ་བོའི་དྲུང་དུ་གཞག་པ་བྱས་ནས། ཅི་ཙམ་ན་ཞབས་ཀྱི་མཐོ་བོ་ནས་འོད་ཟེར་བྱུང་ནས། སྒྲུབ་པ་པོ་དེའི་ལུས་ལ་ཞུགས་པར་འགྱུར་གྱི་བར་དུ་བྱས་ན། དེའི་མོད་ཁོ་ན་ལ་སྐྲ་འཁྱིལ་ཞིང་འཁོར་དང་ལྡན་པར་ཡང་འགྱུར་རོ། །འཁོར་དང་བཅས་པ་ནམ་མཁའ་ལ་འགྲོ་ཞིང་རིག་པ་འཛིན་པའི་རྒྱལ་པོར་ཡང་འགྱུར་རོ། །བསྐལ་པར་ཡང་གནས་པར་འགྱུར་རོ། །དེ་ནས་རྒྱ་མཚོའི་ངོགས་སུ་རས་རིས་ནུབ་ཕྱོགས་སུ་བསྟན་ཏེ་བཞག་ལ་ཀླུ་ཤིང་གིས་མེ་རབ་ཏུ་སྦར་ནས། རྒྱ་མཚོ་ལ་དམིགས་ནས་ཀླུ་ཤིང་གི་མེ་ཏོག་གིས་སྦྱིན་སྲེག་འབུམ་བྱས་ན། རྒྱ་མཚོའི་རླབས་འབྱུང་བར་འགྱུར་ཏེ། དེ་ནི་གྲུབ་པའི་མཚན་མ་ཡིན་པས་འཇིགས་པར་མི་བྱའོ། །ཇི་སྲིད་རྒྱ་མཚོ་ལས་བྲམ་ཟེའི་གཟུགས་ཀྱིས་འོང་བར་འགྱུར་རོ། །བདག་གིས་ཅི་ཞིག་བྱ་ཞེས་སྨྲ་བ་ན་ཁྱོད་ངའི་དབང་དུ་གྱིས་ཤིག་ཅེས་སྨྲ་བར་བྱའོ། །དེ་ནས་གང་ཅི་བསྒོ་བ་དེ་ཐམས་ཅད་བྱེད་པར་འགྱུར་རོ། །ས་ལ་པདྨ་འདབ་མ་སྟོང་དང་ལྡན་པ་བྲིས་ཏེ། དེའི་སྟེང་དུ་འདུག་ནས་བརྒྱ་ཕྲག་སྟོང་བཟླས་པ་བྱས་ན་པདྨ་དེ་ས་ལས་འཕགས་ནས་གཡོག་འཁོར་སྟོང་དང་བཅས་པ་ནམ་མཁའ་ལ་འགྲོ་བར་འགྱུར་རོ། །བསྐལ་པ་ཆེན་པོར་གནས་པའི་རིག་པ་འཛིན་པའི་རྒྱལ་པོར་ཡང་འགྱུར་རོ། །ལམ་གཅོད་པར་བྱེད་པར་ཡང་མི་ནུས་སོ། །འོད་དཔག་ཚད་ལྔར་སྣང་བར་བྱེད་པར་འགྱུར་རོ། །ཆོ་འཕྲུལ་ཆེན་པོའི་ཟླ་བ་ཕྱེད་ལ་སྣ་མའི་མེ་ཏོག་དང་ལྡན་པས་རེ་རེ་ཞིང་བཟླས་ཤིང་། བཅོམ་ལྡན་འདས་ཀྱི་གཙུག་ཏོར་གྱི་སྟེང་དུ་འབུམ་ཕྲག་གཅིག་ཕུལ་ན། ཇི་སྲིད་གཙུག་ཏོར་ནས་འོད་ཟེར་འབྱུང་བར་འགྱུར་ཏེ། སྒྲུབ་པ་པོའི་ལུས་ལ་ཞུགས་ཀྱི་བར་དུ་བྱས་ན་དེའི་མོད་ཁོ་ན་ལ་མངོན་པར་ཤེས་པ་ལྔ་ཐོབ་པར་འགྱུར་རོ།