ལོག་འདྲེན་ཐམས་ཅད་ལ་ནི་ཞག་བདུན་དུ་སྦྱིན་སྲེག་བརྒྱ་རྩ་བརྒྱད་བྱའོ། །རྒྱལ་པོའི་བུ་ལ་ནི་ཡུངས་ཀར་ཏིལ་མར་གྱིས་བཏགས་པ་དུས་གསུམ་དུ་ཞག་བདུན་ལ་སྦྱིན་སྲེག་བརྒྱ་རྩ་བརྒྱད་བྱ་ཞིང་། ཉི་མ་ལ་མངོན་དུ་ཕྱོགས་ནས་བཟླས་བརྗོད་འབུམ་བྱས་ན་སྡིག་པ་ཐམས་ཅད་ལས་རབ་ཏུ་གྲོལ་བར་འགྱུར་རོ། །རིག་པ་ཐམས་ཅད་ཚིམ་པར་བྱེད་པར་འདོད་ན་བ་གཅིན་དང་ནས་ཀྱི་ཁ་ཟས་ཟ་ཞིང་རྩྭ་ཨུ་ཤི་ར་ལས་གཟུགས་བརྙན་བྱས་ཏེ། མེ་ཏོག་དཀར་པོས་མཆོད་ཅིང་འོ་མ་བརྒྱ་རྩ་བརྒྱད་ཀྱིས་སྦྱིན་སྲེག་བྱས་ནས་འོ་མས་ཁྲུས་བྱས་ཏེ། བཟླས་པ་བརྒྱ་རྩ་བརྒྱད་བཟླས་ཤིང་ཨ་ག་རུའི་དུད་པས་བདུགས་ན་ཚིམ་ཞིང་རྒྱས་པར་བྱས་པར་འགྱུར་རོ། །ལན་གཅིག་བཟླས་པས་བདག་བསྲུང་བ་བྱས་པར་འགྱུར་རོ། །ལན་གཉིས་བཟླས་པས་གཞན་བསྲུང་བ་བྱས་པར་འགྱུར་རོ། །ལན་གསུམ་བཟླས་པ་བྱས་པས་རྫས་བསྲུང་བ་བྱས་པར་འགྱུར་རོ། །ལུས་ཆད་པ་དང་ཞོམ་པ་དང་དུག་གིས་རེག་པ་དང་ཕུར་བུས་བཏབ་པ་རྣམས་ལ་རྟས་པར་བྱེད་པར་འདོད་ན་སྨན་ཨུ་ཤི་ར་ལས་གཟུགས་བརྙན་དུ་བྱས་ཏེ། མེ་ཏོག་དཀར་པོས་མཆོད་ལ་འདིས་གཙུག་ཏོར་གྱི་རྒྱལ་པོའི་རས་རིས་ཀྱི་མདུན་དུ་ཡུངས་ཀར་གྱི་རྒྱལ་པོ་ལ་ཞོ་དང་སྦྲང་རྩི་དང་མར་གྱིས་བཏགས་ལ་སྦྱིན་སྲེག་སྟོང་རྩ་བརྒྱད་བྱས་ན་རིག་པ་ཉེ་བར་དམིགས་ནས་ཕུར་བུ་འབྱུང་བར་འགྱུར་རོ། །ཇི་སྲིད་དུ་བཟླས་ཀྱང་རིག་པ་འབྲས་བུ་མེད་པར་ཤེས་ན་གི་ཝང་གིས་གྲོ་ག་ལ་བྲིས་ཏེ། གྲོ་ག་དེ་ལ་བརྒྱ་རྩ་བརྒྱད་མངོན་པར་བསྔགས་པ་བྱས་ནས། བཅོམ་ལྡན་འདས་ལ་མཆོད་པ་རྒྱ་ཆེན་པོ་བྱས་ལ། བཅོམ་ལྡན་འདས་འདི་དང་ལྷན་ཅིག་སྟོང་རྩ་བརྒྱད་བཟླས་ལ། ཀུ་ཤའི་སྟན་དེ་ཉིད་དུ་གཉིད་ལོག་ན་རྨི་ལམ་དུ་འོངས་ཏེ་འབྲས་བུ་མེད་པའི་རྒྱུ་སྟོན་པར་འགྱུར་རོ། །ཅི་སྟེ་མེ་ཏོག་པདྨ་བསྒྲུབ་པར་འདོད་ན། ཙནྡན་དམར་པོ་ལས་པདྨ་བྱས་ཏེ། མཆོད་པ་རྒྱ་ཆེན་པོ་བྱས་ནས་ཞག་གསུམ་སྨྱུང་བ་བྱས་ཏེ། པདྨ་ལག་པ་གཡས་པས་བཟུང་ལ་ཇི་སྲིད་འབར་བ་དེ་སྲིད་ཀྱི་བར་དུ་བཟླས་པ་བྱས་ན། གཡོག་འཁོར་ཉི་ཤུ་དང་ནམ་མཁའ་ལ་འགྲོ་བར་འགྱུར། རིག་པ་འཛིན་པའི་འཁོར་ལོས་སྒྱུར་བར་འགྱུར།