སྐྱེ་བོ་ཐམས་ཅད་དབང་དུ་འགྱུར་ལ་དེའི་ཚེ་འདི་ཐམས་ཅད་དབང་དུ་བྱེད་པར་འགྱུར་ཏེ། གང་སྨྲས་པ་དེ་ཐམས་ཅད་བྱེད་དོ། །ཇི་སྟེ་དུ་བ་འཐུལ་བར་བྱེད་ན་མི་སྣང་བར་བྱེད་པ་ཐམས་ཅད་ཀྱི་རྒྱལ་པོར་འགྱུར་རོ། །བར་གྱི་བསྐལ་པར་འཚོ་བར་འགྱུར་རོ། །གང་གི་ཚེ་འབར་བར་གྱུར་པ་དེའི་ཚེ་ནི་ལྷ་གཞོན་ནུའི་གཟུགས་སུ་འགྱུར་ཞིང་། ཉི་མ་འཆར་ཀའི་གཟི་བརྗིད་དང་ལྡན་ལ་རིག་པ་འཛིན་པའི་རྒྱལ་པོར་འགྱུར། བསྐལ་པ་ཆེན་པོར་འཚོ་བར་འགྱུར། དེ་བཞིན་དུ་གི་ཝང་དང་བ་བླ་ལ་སོགས་པ་ལའང་བསྒྲུབ་པར་བྱའོ། །ཅི་སྟེ་མིག་སྨན་བསྒྲུབ་པར་འདོད་ན། ལིག་བུ་མིག་དང་ཨུཏྤ་ལ་སྔོན་པོ་དང་རུ་རྟ་དང་ཙནྡན་དག་གཅིག་ཏུ་བྱས་ཏེ། ཟངས་མའི་སྣོད་དུ་གཞག་ལ་ཟླ་བ་གཟས་ཟིན་པའི་དུས་སུ་ཅི་སྲིད་དུ་བ་འཐུལ་བ་དེ་སྲིད་ཀྱི་བར་དུ་བཟླས་པ་བྱའོ། །དེ་ནས་མིག་ལ་བསྐུས་ན་མི་སྣང་བར་འགྱུར་ཏེ། ཅི་ལྟར་འདོད་པའི་གཟུགས་དང་མི་སྣང་བར་བྱེད་པ་ཐམས་ཅད་ཀྱི་རྒྱལ་པོར་འགྱུར་རོ། །ཇི་སྟེ་རལ་གྲི་བསྒྲུབ་པར་འདོད་ན་རལ་གྲི་མ་ཉམས་པ་བླངས་ལ། མར་ངོའི་ཚེས་བརྒྱད་དམ་བཅུ་བཞི་ལ་རས་རིས་ལ་མཆོད་པ་རྒྱ་ཆེན་པོ་དང་གཏོར་མ་བཏང་ཞིང་བསྲུང་བ་བྱས་ན། རལ་གྲི་ལག་པ་གཡས་པས་བཟུང་སྟེ། ཇི་སྲིད་འོད་འཕྲོ་བ་དང་འབར་བ་དེ་སྲིད་ཀྱི་བར་དུ་བཟླས་པ་བྱས་ན། གལ་ཏེ་འོད་འཕྲོ་ན་ནི་རིག་པ་འཛིན་པ་གཅིག་པུར་འགྱུར་རོ། །འབར་བས་ནི་དེ་རིག་པ་འཛིན་པ་རྣམས་ཀྱི་རྒྱལ་པོར་འགྱུར་བ་དང་། སྟོབས་དང་ཕ་རོལ་གནོན་པ་ཐོགས་པ་མེད་པ་དང་གང་གིས་མཐོང་བ་དང་གང་མཐོང་བ་དེ་དང་ལྷན་ཅིག་ནམ་མཁའ་ལ་འགྲོ་བར་འགྱུར་རོ། །ཅི་སྟེ་རྡོ་རྗེ་བསྒྲུབ་པར་འདོད་ན་ལྕགས་བཟང་པོའི་རང་བཞིན་ལས་རྡོ་རྗེ་བྱས་ཏེ། སོར་བཅུ་དྲུག་པ་རྩེ་མོ་གཉི་ག་ཡང་རྩེ་གསུམ་པ་ཙནྡན་དམར་པོས་བྱུགས་ལ། ཆོ་འཕྲུལ་གྱི་ཟླ་ཕྱེད་ཀྱི་ཚེས་ནས་བརྩམས་ནས་རས་རིས་ལ་མཆོད་པ་རྒྱ་ཆེན་པོ་བྱས་ཏེ་བཟླས་པ་བྱ་ཞིང་། ཚེས་ནས་ཉི་མ་རེ་རེ་ཞིང་རེ་རེས་བསྐྱེད་པའི་དགེ་སློང་དག་ལ་བཤོས་དྲང་བར་བྱའོ། །ཐ་མར་ནུབ་གསུམ་སྨྱུང་བ་བྱས་ལ་སྐུ་གདུང་དང་བཅས་པའི་མཆོད་རྟེན་གྱི་མདུན་དུ་རས་རིས་རབ་ཏུ་བཞག་ཅིང་།