།དེས་བརྗོད་པར་བྱ་བ་ནི་ཉིན་རེ་ཞིང་གནོད་སྦྱིན་ལུང་བཞིན་དུ་བྱེད་པ་དགོས་སོ་ཞེས་བརྗོད་པར་བྱ་སྟེ། དེས་གནོད་སྦྱིན་རེ་རེ་སྟེར་བར་འགྱུར་རོ། །དེས་ལུང་བསྒོ་བར་བྱ་བ་ནི་དཔག་ཚད་བརྒྱ་ནས་བུད་མེད་རྣམས་འདིར་འོང་བར་གྱིས་ལ་ཐོ་རངས་དེ་ཉིད་དུ་ཁྱེར་ཅིག་ཅེས་པ་དང་འཁོར་བརྒྱ་ལ་ཡང་འབྲས་ཆན་བྱིན་ཅིག་ཅེས་བརྗོད་ན། རྒྱབ་ཏུ་ཁུར་ནས་གང་དུ་འདོད་པ་དེར་འགྲོ་ཞིང་ཁྱེར་བར་འགྱུར་རོ། །ལུང་སྩལ་བ་ཐམས་ཅད་བྱེད་པར་འགྱུར་རོ། །ཅི་སྟེ་ཕྱག་ན་རྡོ་རྗེ་བསྒྲུབ་པར་འདོད་ན་བཞི་འགྱུར་དང་བདུན་འགྱུར་གྱི་སྔོན་དུ་བསྙེན་པ་བྱས་ལ། ཆོ་འཕྲུལ་གྱི་ཟླ་བ་ཕྱེད་པོ་མ་ལུས་པ་ལ་རབ་ཏུ་རྒྱ་ཆེ་བའི་མཆོད་པ་བྱས་ལ་ཇི་སྲིད་ཟླ་བ་ཉ་བའི་བར་དུ་སྟེ། ཟླ་བ་ཉ་བའི་བར་དུ་མཆོད་པ་བྱས་ལ་དགེ་སློང་གི་དགེ་འདུན་ཁྱད་པར་ཅན་དག་ལ་བཤོས་གསོལ་ནས། འཕགས་པ་རྡོ་རྗེ་འཛིན་ཁོ་ན་ལ་རྗེས་སུ་ཡི་རང་བར་བྱེད་དུ་གཞུག་གོ། །དེ་ནས་མཆོད་པ་རྒྱ་ཆེན་པོ་བྱས་ནས་དང་པོའི་ཐུན་འདས་ཏེ་གཉིས་པའི་ཐུན་ལ་སྐྱིལ་མོ་ཀྲུང་བཅས་ཏེ་འདུག་ལ། སེམས་རྩེ་གཅིག་པས་རྡོ་རྗེ་འཛིན་བལྟ་བར་བྱའོ། །ཞེས་སེམས་ལ་ཀུན་ཏུ་བརྟགས་ཏེ། གུ་གུལ་གྱི་རིལ་བུ་རྒྱ་ཤུག་གི་འབྲས་བུའི་ཚད་ཙམ་གྱི་མཚན་མོ་ཐུན་གཅིག་ཏུ་སྦྱིན་སྲེག་བྱའོ། །དེ་ནས་བཅོམ་ལྡན་འདས་ཀྱི་ཡུལ་བསྐྱོད་པར་འགྱུར་ཞིང་། ས་འགུལ་བ་དང་སྤྲིན་གྱི་སྒྲ་སྒྲོགས་པར་འགྱུར་བ་དང་། རིག་པ་འཛིན་པ་ཐམས་ཅད་མེ་ཏོག་གི་ཆར་རབ་ཏུ་འབེབས་པར་འགྱུར་རོ། །སྐབས་འདིར་བཅོམ་ལྡན་འདས་ཕྱག་ན་རྡོ་རྗེ་རིག་པ་ཐམས་ཅད་ཀྱིས་ཡོངས་སུ་བསྐོར་བ་དང་རིག་པ་མཆོག་ལ་སོགས་པའི་རིག་པའི་རྒྱལ་པོས་ཡོངས་སུ་བསྐོར་བ་བྱོན་པར་འགྱུར་རོ། །ལྷ་ཐམས་ཅད་དང་། ཀླུ་ཐམས་ཅད་དང་། གནོད་སྦྱིན་ཐམས་ཅད་དང་། དྲི་ཟ་དང་མིའམ་ཅིས་བྱང་ཆུབ་སེམས་དཔའ་ཡོངས་སུ་བསྐོར་བ་བྱོན་པར་འགྱུར་རོ། །དེའི་མོད་ལ་དམྱལ་བའི་སེམས་ཅན་རྣམས་ཀྱི་ཤིན་ཏུ་དྲག་པའི་ཚོར་བའི་སྡུག་བསྔལ་ཉེ་བར་ཞི་བར་འགྱུར་རོ། །དྲིའི་ཆུས་མཆོད་ཡོན་དབུལ་ཞིང་ཕྱག་འཚལ་ཏེ་འདུག་པར་བྱའོ། །དེ་ནས་རྡོ་རྗེ་འཛིན་གྱིས་གསུངས་པ་ནི་མཆོག་ཅི་ཞིག་སྦྱིན་པར་བྱ།