ཡང་མདོར་ན་རེ་ཞིག་དང་པོ་བཟླས་པས་གང་དུ་གནས་པ་ལས། དཔག་ཚད་ལྔའི་ནང་ནས་མ་རུངས་པའི་གདོན་ཐམས་ཅད་འབྱེར་བར་འགྱུར་རོ། །གྲུབ་པ་ཐམས་ཅད་ཀྱང་ནུས་པ་མེད་པར་འགྱུར་ཞིང་ལྷ་ཐམས་ཅད་ཀྱི་ནུས་པ་དང་བྲལ་བར་འགྱུར་རོ། །སྒྲུབ་པ་པོའི་འདོད་པ་མ་གཏོགས་པར་ལྷ་ཐམས་ཅད་ཀྱང་གནས་པར་མི་འགྱུར་རོ། །འཇིག་རྟེན་དང་འཇིག་རྟེན་ལས་འདས་པའི་སྒྲུབ་པ་པོ་གཞན་རྣམས་ཀྱིས་གྲུབ་པ་འཕྲོག་པར་བྱེད་ཅིང་། གཞན་གྱི་སྦྱོར་བས་གསང་སྔགས་བཅད་པ་དང་བཅོམ་པ་དང་ཕུར་བུས་བཏབ་པའང་ཐར་བར་བྱེད་དོ། །བདག་གིས་གཞན་གྱི་རིག་སྔགས་གཅོད་པར་འདོད་ན། རྩྭ་ཀུ་ཤ་སྔོན་པོ་ཆང་པ་གང་བླངས་ལ། ལན་བརྒྱ་རྩ་བརྒྱད་མངོན་པར་བསྔགས་པ་བྱས་ནས་མཚོན་གྱིས་བཅད་ན། རིག་པ་གང་གི་ཕྱིར་དམིགས་ཏེ་བཅད་པ་དེ་གཅོད་པར་འགྱུར་རོ། །གཟུགས་བརྙན་བྱས་ཏེ་འདིས་སེང་ལྡེང་གི་ཕུར་པས་སྙིང་ལ་བཏབ་ན་གནད་ལ་བབ་པར་འགྱུར་རོ། །ལེ་བརྒན་དུ་བཙོས་པའི་སྐུད་པ་ལ་ལན་བདུན་བཟླས་བརྗོད་བྱས་ཏེ། མདུད་པ་བོར་ན་བཅིང་བར་འགྱུར་རོ། །ཁམ་ཕོར་ཁ་སྦྱར་གྱི་ནང་དུ་བརྒྱ་རྩ་བརྒྱད་བཟླས་ཏེ་ཁ་བཀབ་པ་བྱས་ན་རེངས་པར་འགྱུར་རོ། །མཚོན་ཆས་སྙིང་དུམ་བུ་གཉིས་སུ་བྱས་ན་གཉིས་སུ་གས་པར་འགྱུར་རོ། །སྐེ་ཚེ་ལ་དུག་དང་ཁྲག་གིས་བཏགས་པས་བསྐུ་བ་བྱས་ན་འཆི་བར་འགྱུར་རོ། །ཀ་ར་བཱི་རའི་ལྕུག་མས་ཀུན་ཏུ་བརྡེག་ན་གནོད་པར་འགྱུར་རོ། །གཞན་གྱི་རིག་པ་ཐམས་ཅད་ལ་མངོན་སྤྱོད་བྱ་བ་ནི་ཅི་དགར་བྱར་རུང་ངོ་། །སྔར་གསུངས་པའི་ལས་ཐམས་ཅད་ལ་འོ་མས་ཁྲུས་བྱས་ནས་སྦྱིན་སྲེག་བྱས་ན་ཞི་བར་འགྱུར་རོ། །མར་གྱི་སྦྱིན་སྲེག་གིས་ནི་ཐམས་ཅད་ཞི་བར་འགྱུར་ཞིང་ཉམས་རྟས་པ་བྱས་པར་ཡང་འགྱུར་རོ། །ཁུ་ཚུར་བཅིངས་པས་སྔགས་ཐམས་ཅད་རེངས་པར་འགྱུར་རོ། །ཡིད་ཀྱིས་ནི་དགྲོལ་བར་བསམས་པས་བཀྲོལ་བར་འགྱུར་རོ། །སྔགས་སྒྲུབ་པར་འདོད་པས་ཀྱང་འདི་ཉིད་ཀྱིས་བཅིང་བ་བྱས་ཏེ་བསྒྲུབ་པར་བྱའོ། །ཆོ་ག་གང་སྒྲུབ་པར་འདོད་པས་ཀྱང་དེ་ཉིད་འདིས་བསྒྲུབ་པར་བྱའོ། སྔགས་སྒྲུབ་པ་དང་འདི་ཉིད་ཀྱི་སྔགས་ཀྱིས་སྤྱན་དྲང་བ་བྱ་བ་དང་ཡང་སླར་གཤེགས་སུ་གསོལ་བ་བྱ་བ་ཡིན་ནོ།