།ཟློས་པ་རྣམས་ནི་བདེ་བྱའི་ཕྱིར། །བསྟན་པ་འདི་ལ་ཆོ་ག་མཆོག །སྟོབས་ཆེན་འཁོར་ལོས་སྒྱུར་བ་ཡིན། །གཙུག་ཏོར་རྒྱལ་པོ་མཐུ་བོ་ཆེ། །ཀུན་ལ་དབང་ཕྱུག་དམ་པ་ནི། །གང་གི་དུས་ནི་འདི་ཡིན་པ། །དེ་བཞིན་གཤེགས་པ་ཁྱོད་ཀྱིས་གསུངས། །དེ་སྐད་གསུངས་ནས་སངས་རྒྱས་རྣམས། །མི་གསུང་བར་ནི་བཞུགས་པར་གྱུར། །དེ་ནས་སངས་རྒྱས་འདུས་པ་དེ་རྣམས་ཀྱིས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཐམས་ཅད་སྣོད་ཀྱི་འཇིག་རྟེན་རྣམས་གཅིག་ཏུ་འབར་བར་གྱུར་ལ། སངས་རྒྱས་ཀྱིས་བྱིན་གྱིས་བརླབས་ཀྱིས་སེམས་ཅན་གཅིག་ལ་ཡང་གནོད་པར་མ་གྱུར་ཏེ། སྣང་བ་ཆེན་པོ་ཡང་དག་པར་སྣང་བར་གྱུར་ཏོ། །དེ་ནས་བཅོམ་ལྡན་འདས་ཤཱཀྱ་ཐུབ་པས་ཐམས་ཅད་དང་ལྡན་པའི་གནས་གཙང་མའི་གཞལ་མེད་ཁང་ལ་གཟིགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་དེ་ན་གནས་པའི་ལྷའི་བུ་རྣམས་དང་ཉན་ཐོས་དང་རང་སངས་རྒྱས་ཐམས་ཅད་དང་བཅོམ་ལྡན་འདས་དང་འཁོར་ཆེན་པོ་འདུས་པ་ལ་བཀའ་སྩལ་པ། སངས་རྒྱས་བཅོམ་ལྡན་འདས་དང་ཉན་ཐོས་དང་རང་སངས་རྒྱས་ཐམས་ཅད་དང་བྱང་ཆུབ་སེམས་དཔའ་རྣམས་དགོངས་སུ་གསོལ། ཡི་གེ་གཅིག་པ་འདི་ནི་རིག་པའི་འཁོར་ལོས་སྒྱུར་བ། དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་གོང་ནས་གོང་དུ་གནས་པ་བསྟན་པ་ཐོགས་པ་མེད་པ། དཔག་ཏུ་མེད་པའི་སྟོབས་དང་ཕ་རོལ་གནོན་པ། བཅོམ་ལྡན་འདས་གཙུག་ཏོར་གྱི་རྒྱལ་པོ་འཁོར་ལོས་སྒྱུར་བའི་ཆོ་ག་ཡང་ངས་བཤད་པར་བྱའོ། །བསྟན་པ་ནུབ་པའི་དུས་སུ་རྩོད་པའི་དུས་འདི་ལ་བཅོམ་ལྡན་འདས་གཙུག་ཏོར་འཁོར་ལོས་སྒྱུར་བ་དེ་བསྟན་པ་འདི་ལ་སྲུང་བ་གཅིག་པུར་འགྱུར་ཞིང་དུས་ཐམས་ཅད་དུ་གྲུབ་པར་ཡང་འགྲོ་སྟེ། སངས་རྒྱས་ཐམས་ཅད་ཀྱི་བསྟན་པ་ནུབ་པའི་དུས་ཚོད་ལ་འདི་ཉིད་སངས་རྒྱས་བཅོམ་ལྡན་འདས་ཡིན་ཏེ། བསྟན་པའི་དོན་བྱེད་པར་འགྱུར་རོ། །ཡི་གེ་གཅིག་པོ་འདི་ལ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་མཛོད་འདུས་པར་འགྱུར་རོ། །ཀྱེ་ལྷའི་ཚོགས་དང་སེམས་ཅན་ཐམས་ཅད་ཉོན་ཅིག