།འཇིག་རྟེན་གཙོ་བོས་གསུངས་པ་ནི། །རྨི་ལམ་མཁྲིས་ལས་ཡང་དག་བྱུང་། །གང་ཡང་རླུང་བྱུང་རྨི་ལམ་ནི། །གསུམ་པའི་ཐུན་དུ་བསྟན་པ་ཡིན། །འཁོར་ཡུག་ཏུ་ནི་འོད་འཕྲོ་བ། །ཕྱོགས་རྣམས་ཀུན་དུ་རབ་ཏུ་སྣང་། །ནམ་མཁའ་ལ་ནི་འགྲོ་བ་དང་། །ནམ་མཁའི་དཀྱིལ་དུ་ཐད་དྲང་འགྲོ། །བར་སྣང་ནམ་མཁའི་དཀྱིལ་དུ་ནི། །ཀུན་ནས་འཁོར་བར་རྟག་ཏུ་འགྲོ། །རླུང་བྱུང་རྨི་ལམ་ཞེས་བསྟན་པ། །འདི་ལྟ་བུ་ལ་བྱ་བ་ཡིན། །རྒལ་དང་མཆོང་དང་དེ་བཞིན་དུ། །ཤིང་རྣམས་ལ་ནི་མངོན་པར་འཛེག །བསྟན་བཅོས་མ་ལུས་འདོན་པ་དང་། །ཁྱད་པར་དུ་ནི་སྔགས་རྣམས་དང་། །བཤད་དང་བརྗོད་པར་བྱེད་པ་དག །ཕལ་ཆེར་ཡང་ནི་རླུང་ལས་གྱུར། །ཤིང་རྣམས་ཚེར་མ་ཅན་འཛེག་དང་། །ཁ་བ་དག་ཀྱང་ཟ་བ་དང་། །བཟའ་བ་མ་ལུས་ཚ་དང་སྐྱུར། །ཟོས་པ་རླུང་ལས་གྱུར་པ་ཡིན། །གཙོར་ཡང་རླུང་ནི་ཡང་དག་འབྱུང་། །ཤིང་ཐོག་རླུང་ནི་རབ་བསྐྱེད་པ། །དེ་དག་ཟ་བར་རྨི་ལམ་མཐོང་། །རླུང་ལས་བྱུང་བར་ཡང་དག་བསྟན། །དངོས་རྣམས་རླུང་ནི་སྐྱེད་པ་ཡི། །བཟའ་དང་བཅའ་བ་ཁྱད་པར་ལྡན། །དེ་བཞིན་སྐྱེ་བོ་སེམས་འཁྲུགས་དང་། །རེག་པར་བྱེད་དང་སྨྲ་བར་བྱེད། །འབྱུང་པོ་རྣམས་ནི་གར་བྱེད་དང་། །བདག་ཉིད་ཀྱང་ནི་གར་བྱེད་པ། །གང་གིས་རྨི་ལམ་མཐོང་ན་ནི། །དེ་འདྲ་རླུང་ནད་ཅན་དུ་ཤེས། །རྣམ་པ་སྣ་ཚོགས་སྤྱོད་པ་དང་། །རྣམ་པ་སྣ་ཚོགས་འཁྱུད་དང་སྨྲ། །རྣམ་པ་སྣ་ཚོགས་མི་བཟད་གཟུགས། །རྨི་ལམ་རླུང་ནད་ཅན་གྱིས་མཐོང་། །དེ་ལ་སོགས་པའི་རྨི་ལམ་ནི། །འཇིག་རྟེན་མཆོག་གིས་གསུངས་པ་ཡིན། །རྣམ་གསུམ་སྦྱོར་བ་རབ་ལྡན་པ། །འདོད་ཆགས་ཞེ་སྡང་གཏི་མུག་ཡིན། །ཆགས་ཅན་བད་ཀན་ཅན་ཤེས་བྱ། །ཞེ་སྡང་ལས་བྱུང་མཁྲིས་པ་ཅན། །རྨོངས་པ་རླུང་ལས་གྱུར་པ་ཡིན། །འདྲེས་པ་འང་རྣམ་པར་འདྲེས་པའོ། །གྲོང་གི་ཆོས་ནི་མཐོང་བ་ལས། །རྨི་ལམ་ཆགས་པས་ས་བོན་བྱུང་། །དེར་ནི་བུད་མེད་ལ་ཆགས་པ། །བད་ཀན་ལས་བྱུང་རྨི་ལམ་ཡིན། །རྩོད་བཅས་དང་ཚུལ་ཞེ་སྡང་ཅན། །མཁྲིས་པ་ལས་བྱུང་རྨི་ལམ་ཡིན། །མ་རིག་ལས་བྱུང་རྨོངས་རྣམ་པ། །དྲན་པ་ཉམས་པར་མཐོང་བ་ཡིན། །རྣམ་འདྲེས་རྣམ་པར་འདྲེས་པ་ནི། །རྨི་ལམ་ན་ནི་རྟག་ཏུ་མཐོང་། །དེ་བས་རྣམ་པ་ཐམས་ཅད་ཀྱིས། །རྨི་ལམ་ཞེས་བྱ་ཡོད་པ་སྤངས། །བྱ་བ་དུས་ཀྱི་རིམ་པ་ཉིད། །དེ་ཉིད་གཟིགས་པས་བསྟན་པ་ཡིན།