ཆོས་བདུན་པོ་དེ་དག་གིས་ནི་རིག་པ་དང་སྔགས་འགྲུབ་ཅིང་ཡོངས་སུ་རྫོགས་པར་འགྱུར་རོ། །ཆོས་བརྒྱད་དང་ལྡན་ན་རིག་པ་དང་སྔགས་ཀྱི་སྤྱོད་པའི་དོན་འགྲུབ་ཅིང་ལམ་དུ་འགྲོ་བར་འགྱུར་ཏེ། བརྒྱད་པོ་གང་ཞེ་ན། མཐོང་བ་དང་མ་མཐོང་བའི་འབྲས་བུ་དག་ལ་བལྟ་བ་དང་སེམས་པར་འདོད་པ་ཉིད་དང་། བྱང་ཆུབ་སེམས་དཔའི་འབྲས་བུ་དང་བཅས་པའི་རྫུ་འཕྲུལ་དང་རྣམ་པར་འཕྲུལ་པ་ཉིད་ལ་ཐེ་ཚོམ་མེད་ཅིང་དང་བ་ཉིད་དང་། ཕྱིན་ཅི་མ་ལོག་པའི་སྔགས་གཟུང་བ་དང་བླ་མ་ལ་གུས་པ་ཉིད་དང་། སངས་རྒྱས་དང་བྱང་ཆུབ་སེམས་དཔའ་ཉིད་ཀྱི་སྔགས་དང་། རྒྱུད་དང་སྤྱོད་པ་བསྟན་པ་མི་སླུ་བ་བཟུང་ཞིང་བདོག་པ་ཐམས་ཅད་ཡོངས་སུ་གཏོང་བ་ཉིད་དང་། སངས་རྒྱས་ཀྱི་ཞིང་གནས་དང་གནས་མ་ཡིན་པ་རྨི་ལམ་ན་མཐོང་བ་རབ་ཏུ་སྟོན་པ་ལ་མཁས་པ་ཉིད་དང་། སེར་སྣ་དང་གཉིད་དང་རྨུགས་པ་མཐའ་དག་དང་བྲལ་བར་བྱེད་ཅིང་རྟག་ཏུ་བརྩོན་འགྲུས་རྩོམ་ལ། སངས་རྒྱས་དང་བྱང་ཆུབ་སེམས་དཔའ་ལ་བདག་ཉིད་འབུལ་བར་བྱེད་པ་ཉིད་དང་། མདོར་བསྡུ་ན་དགེ་བའི་རྩ་བས་ཆོག་མི་ཤེས་ཤིང་གོ་ཆ་ཆེན་པོ་བགོས་པ་དང་། བགེགས་ཐམས་ཅད་རབ་ཏུ་སེལ་བར་འདོད་པ་ཉིད་དང་། བྱང་ཆུབ་ཀྱི་སྙིང་པོ་གནོན་པ་དང་ལོངས་སྤྱོད་ཆེན་པོ་དང་། དབང་ཆེ་བར་གྲགས་པར་བདག་ཉིད་འདོད་པ་ཉིད་དང་དབང་ཆེ་བར་གྲགས་པའི་གང་ཟག་ལ་བསྙེན་པ་དང་དགེ་བའི་བཤེས་གཉེན་དང་མི་འབྲལ་བར་བྱ་བ་དང་། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ལ་ཉེ་བར་གནས་པ་ཉིད་དེ། ཆོས་བརྒྱད་པོ་འདི་དག་དང་ལྡན་ན་སྔགས་སྤྱད་པའི་དོན་འགྲུབ་པའི་ཡང་དག་པའི་ལམ་དུ་འགྱུར་རོ། །གྲོགས་པོ་དག་མདོར་ན་བྱང་ཆུབ་ཀྱི་སེམས་དང་མི་འབྲལ་བ་དང་། དཀོན་མཆོག་གསུམ་ལ་དད་པ་དང་མཆོག་ཏུ་སྡུག་བསྔལ་ཞིང་ཚུལ་ཁྲིམས་ཉམས་པ་ལ་ཡང་མི་སྐྱོ་བའི་ཡིད་ཀྱིས་རྟག་ཏུ་མངོན་པར་བརྩོན་པ་ལ། ངའི་སྔགས་ཀྱི་ལེའུ་རབ་འབྱམ་མཐའ་ཡས་ཤིང་རྨད་དུ་བྱུང་བ། བྱང་ཆུབ་སེམས་དཔའི་སྤྱོད་པའི་རྒྱུ་མཐུན་པའི་ཡིད་ལས་བྱུང་བ་འགྲུབ་པར་འགྱུར་ཏེ་དེ་ལས་གཞན་དུ་ཤེས་པར་བྱ་བ་མ་ཡིན་ནོ། །རྣམ་པར་རྟོག་པ་མེད་པའི་ཡིད་དུ་བྱས་ནས་ཉམ་སད་པའི་ཕྱིར་ཡང་བསྒྲུབ་པར་བྱ་བ་ཡིན་ནོ།