Degé Kangyur volume 40, F.189.a

མི་འམ་ཅི་ཉིད་ཀུན་དུ་བསྐྱེད། །​འདི་དག་སྐྱེ་བ་མེད་ཤེས་པས། །​མི་འམ་ཅི་ཡིས་ཏིང་འཛིན་བསྟན། །​འཇམ་དཔལ་དེ་ལྟར་ན་མི་འམ་ཅིའི་གཟུགས་ཏིང་ངེ་འཛིན་དུ་རྟོགས་པར་བྱའོ། །​འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་ལྟོ་འཕྱེ་ཆེན་པོའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། མིང་གང་གིས་ནི་ཆོས་འདི་དག །​འཇིག་རྟེན་དག་ཏུ་སྣ་ཚོགས་བཞག །​ཆོས་དེ་འདི་ལ་ཡོད་མ་ཡིན། །​མེད་ལས་ཐམས་ཅད་ཀུན་དུ་བརྟགས། །​ཀུན་དུ་བརྟགས་པར་ཀུན་ཤེས་ན། །​ངོ་བོ་ཉིད་ཀྱིས་ཀུན་རྟོག་མེད། །​ཏིང་འཛིན་ཞི་བ་བརྗོད་པ་ནི། །​ལྟོ་འཕྱེ་ཆེན་པོའི་གཟུགས་ཀྱིས་བསྟན། །​འཇམ་དཔལ་དེ་ལྟར་ན་ལྟོ་འཕྱེ་ཆེན་པོའི་གཟུགས་ཏིང་ངེ་འཛིན་དུ་རྟོགས་པར་བྱའོ། །​འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་སེམས་ཅན་དམྱལ་བའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། །​རྡུལ་དང་བྲལ་ཞིང་རྡུལ་མེད་གསོག །​དེ་ལ་བྱེད་པོ་འགའ་ཡང་མེད། །​རང་གི་རྟོག་པས་ཀུན་བསྐྱེད་དེ། །​རྟོག་པ་དེ་ཡང་ཡོད་མ་ཡིན། །​དམྱལ་བ་དྲི་མེད་དྲི་བྲལ་ཞིང་། །​དག་དང་ཡང་དག་འོད་གསལ་དང་། །​མཚན་ཉིད་མེད་ཅིང་མཚན་མེད་པར། །​བྱང་ཆུབ་སྙིང་པོར་ངས་ཤེས་ཏེ། །མཚན་ཉིད་མེད་ཅིང་བྱུང་མེད་དེ། །​ནམ་མཁའ་འདྲ་བར་ཤེས་པས་ན། །​ཏིང་འཛིན་ཞི་བ་བརྗོད་པ་ནི། །​སེམས་ཅན་དམྱལ་བའི་གཟུགས་ཀྱིས་བསྟན། །​འཇམ་དཔལ་དེ་ལྟར་ན་སེམས་ཅན་དམྱལ་བའི་གཟུགས་ཏིང་ངེ་འཛིན་དུ་རྟོགས་པར་བྱའོ། །​འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་དུད་འགྲོའི་སྐྱེ་གནས་ཀྱི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། དཔེར་ན་ཇི་ལྟར་སྤྲིན་གྱི་གཟུགས། །​ཁ་དོག་སྣ་ཚོགས་བྱུང་བ་དག །​དེ་ལ་ཁ་དོག་ཡོད་མིན་ཡང་། །​མི་མཁས་པ་དག་རྨོངས་པར་བྱེད། །​དེ་བཞིན་སེམས་ཀྱང་མེད་པའི་ཕྱིར། །སྤྲིན་གྱི་གཟུགས་དང་མཚུངས་འདྲ་ཡང་། །​དུད་འགྲོའི་སྐྱེ་གནས་རྣམས་སུ་ནི། །​རྣམ་པ་སྣ་ཚོགས་ལུས་ཀྱང་སྟོན། །​ལས་ནི་སྒྱུ་མའི་རང་བཞིན་དང་། །​བྱུང་མེད་མཚན་ཉིད་མེད་པར་ཤེས། །​ཏིང་འཛིན་ཞི་བ་བརྗོད་པ་ནི། །​དུད་འགྲོའི་གཟུགས་ཀྱིས་བསྟན་པ་ཡིན། །​འཇམ་དཔལ་དེ་ལྟར་ན་དུད་འགྲོའི་སྐྱེ་གནས་ཀྱི་གཟུགས་ཏིང་ངེ་འཛིན་དུ་རྟོགས་པར་བྱའོ།



The English translation of this folio by 84000 - Translating the words of the Buddha can be found at:
https://read.84000.co/translation/toh54.html?part=UT22084-040-005-377#UT22084-040-005-377