Degé Kangyur volume 40, F.195.a

འཇམ་དཔལ་ཆོས་ཐམས་ཅད་ནི་བྱིན་གྱི་རླབས་མེད་པས་བྱིན་གྱིས་བརླབས་པ་ཡིན་ཏེ། ཆོས་ཀྱི་རྣམ་གྲངས་འདི་ཡང་བྱིན་གྱི་རླབས་མེད་པས་བྱིན་གྱིས་བརླབས་པ་ཡིན་པས། འཇམ་དཔལ་དེའི་ཕྱིར་ངས་བདུད་སྡིག་ཅན་ལ་འདི་སྐད་དུ་ང་ཆོས་ཀྱི་རྣམ་གྲངས་འདི་ལ་བྱིན་གྱིས་རློབ་པར་མི་བྱེད་དོ་ཞེས་སྨྲས་སོ། །​འཇམ་དཔལ་བདེན་པ་དང་བདེན་པའི་ཚིག་གང་གིས་ཆོས་ཐམས་ཅད་བྱིན་གྱི་རླབས་མེད་པས་བྱིན་གྱིས་བརླབས་པ་དང་། ཐ་དད་དུ་དབྱེར་མེད་པ་དང་། བརྗོད་དུ་མེད་པ་དང་། མཚན་ཉིད་མེད་པ་དང་། བསྙད་དུ་མེད་པ་དང་། སྨྲར་མེད་པ་དང་། གཉིས་སུ་མེད་པ་དང་། གཉིས་དང་བྲལ་བ་དང་། ཡང་དག་པའི་མཐའ་དང་མཉམ་པ་དང་། དེ་བཞིན་ཉིད་དུ་ཞུགས་པ་དང་། ཆོས་ཀྱི་དབྱིངས་ཀྱི་མཚན་ཉིད་ཡིན་པའི་བདེན་པ་དང་བདེན་པའི་ཚིག་དེས་ཆོས་ཀྱི་རྣམ་གྲངས་འདི་འཛམ་བུའི་གླིང་ན་རབ་ཏུ་སྤྱོད་པར་གྱུར་ཅིག །​དེ་ནས་བཅོམ་ལྡན་འདས་ཀྱིས་བདེན་པའི་བྱིན་གྱིས་བརླབས་དེ་མཛད་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གང་ཡིན་པ་དང་། ཆོས་ཀྱི་རྣམ་གྲངས་འདི་གང་ཡིན་པ་དེ་དག་ནི་མཉམ་པའི་ཕྱིར་ཁྱོད་ཀྱིས་ཀུན་ནས་སྒོའི་ཆོས་ཀྱི་རྣམ་གྲངས་འདི་ཟུང་ཤིག །​ཆོངས་ཤིག །​ལྷོགས་ཤིག །​ཀུན་ཆུབ་པར་གྱིས་ཤིག །​གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཅིག །​དེ་ཅིའི་ཕྱིར་ཞེ་ན། ཀུན་དགའ་བོ་དེ་བཞིན་གཤེགས་པ་ནི་ཀུན་ནས་སྒོའི་ཆོས་ཀྱི་དབྱིངས་འདི་ལེགས་པར་ཐུགས་སུ་ཆུད་ནས་སེམས་ཅན་རྣམས་ལ་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་སྟོན་པར་མཛད་པའི་ཕྱིར་རོ། །​ཀུན་དགའ་བོ་དེ་ལྟ་བས་ན་ཆོས་ཀྱི་རྣམ་གྲངས་འདི་ལེགས་པར་བསྲུང་བ་དང་། ལེགས་པར་གཟུང་བ་དང་། ལེགས་པར་ཀུན་ཆུབ་པར་གྱིས་ཤིག །​བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་པའི་སྙིང་པོ་དང་། འཇམ་དཔལ་གཞོན་ནུར་གྱུར་པ་དང་། ཚེ་དང་ལྡན་པ་ཀུན་དགའ་བོ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།​། །​།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། ཀུན་ནས་སྒོའི་ལེའུ་ཞེས་བྱ་བ་སྟེ་ལེའུ་བཅུ་པ་རྫོགས་སོ།​། །​།རྒྱ་གར་གྱི་མཁན་པོ་ཛི་ན་མི་ཏྲ་དང་། སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།​། །​།



The English translation of this folio by 84000 - Translating the words of the Buddha can be found at:
https://read.84000.co/translation/toh54.html?part=UT22084-040-005-389#UT22084-040-005-389