ཐེག་པ་ཆེན་པོ་དེ་ཇི་ལྟ་བ་བཞིན་དུ་དེ་ལ་འཚལ་བར་བགྱིའོ། །སུ་ཞིག་ལམ་ཆེན་པོ་དེ་ལྟ་བུ་རབ་ཏུ་སྟོན་པར་བགྱིད། ལམ་ཆེན་པོ་དེ་ཇི་ལྟ་བ་བཞིན་དུ་རབ་ཏུ་གཞོལ་བར་བགྱིའོ། །དེ་སྐད་ཅེས་གསོལ་པ་དང་། དེའི་ཚེ་དེ་བཞིན་གཤེགས་པ་དེས་རྒྱལ་པོ་ཆེན་པོ་དེ་ལ་འདི་སྐད་ཅེས་བཀའ་སྩལ་ཏོ། །ཀྱེ་རྒྱལ་པོ་ཆེན་པོ་འདི་ལྟར་ཤེས་པར་གྱིས་ཤིག །དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་ཞེས་བྱ་བ་ཡོད་ཀྱིས། རྒྱལ་པོ་དེའི་ཐད་དུ་སོང་ཤིག་དང་། རྒྱལ་པོ་ཆེན་པོ་ལ་ཇི་ལྟར་གོ་ཆ་ཆེན་པོ་བགོ་བ་དང་། ཐེག་པ་ཆེན་པོ་ལ་ཞོན་པ་དང་། ལམ་ཆེན་པོ་ལ་གཞོལ་བར་བྱ་བའི་ཆོས་དེ་ཡང་དག་པར་སྟོན་པར་འགྱུར་རོ། །དེ་ནས་དེ་བཞིན་གཤེགས་པ་དེས་དེ་སྐད་ཅེས་བཀའ་སྩལ་ནས་མི་སྣང་བར་གྱུར་ཏོ། །བློ་གྲོས་མཐའ་ཡས་དེའི་ཚེ་རྒྱལ་པོ་ཆེན་པོ་དོན་ཐམས་ཅད་གྲུབ་པ་དངོས་པོ་དེ་ལྟ་བུ་མཐོང་བ་དང་། བ་སྤུ་ཟིང་ཞེས་བྱེད་པར་གྱུར་ནས་ངོ་མཚར་གྱི་བསམ་པ་དང་། འཇིགས་པའི་སེམས་སྐྱེས་པས་ལྷ་དང་། མིའི་འདོད་པའི་བདེ་བ་སྣ་ཚོགས་ལ་མ་མོས་ཤིང་འདུས་བྱས་ཐམས་ཅད་ལ་ཡོངས་སུ་སྐྱོ་བར་གྱུར་ནས། གོ་ཆ་ཆེན་པོ་དང་། ཐེག་པ་ཆེན་པོ་དང་། ལམ་ཆེན་པོ་ཡོངས་སུ་གཉེར་བའི་ཕྱིར་རྒྱལ་བུ་བརྒྱད་དང་། བཙུན་མོ་བཞི་དང་། བུ་གཞན་རྣམས་དང་། སླས་དང་། གཡོག་འཁོར་རྣམས་དང་ལྷན་ཅིག་ཏུ་དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་ག་ལ་བ་དེ་ལོགས་སུ་དོང་ངོ་། །དེར་ཕྱིན་པ་དང་། འཁོར་དང་བཅས་ཏེ་གུས་པས་བཅོམ་ལྡན་འདས་དེའི་ཞབས་ལ་མགོ་བོས་གཏུགས་ཏེ་ཕྱག་བྱས་ནས་རིན་པོ་ཆེ་སྣ་བདུན་གྱི་མེ་ཏོག་རྣམ་པ་སྣ་ཚོགས་བརྒྱ་སྟོང་དུ་མས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་མངོན་པར་གཏོར་ཏོ། །གཞན་ཡང་ན་བཟའ་ཚད་མེད་པ་སྙེད་དེ། དེ་བཞིན་གཤེགས་པ་དང་། ཉན་ཐོས་ཀྱི་དགེ་འདུན་རྣམས་ལ་ཕུལ་ལོ། །གཞན་ཡང་བདེ་བའི་ཡོ་བྱད་ཐམས་ཅད་ཀྱིས་ལོ་སྟོང་ཕྲག་བཅུའི་བར་དུ་བསྙེན་བཀུར་བ་དང་། རིམ་གྲོ་དང་། མཆོད་པ་བྱས་སོ། །དེའི་འོག་ཏུ་རྒྱལ་ཐབས་སྤངས་ནས་འཁོར་དང་བཅས་དེ།