།བཅོམ་ལྡན་འདས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་དཔེར་བགྱི་ན་མི་ལ་ལ་ཞིག་གིས་ཀར་ཥ་པ་ཎ་གཅིག་མཛུབ་མོའི་རྩེ་མོས་བསྒྲེ་བཟློག་པ་དེ་བཞིན་དུ་བདག་གིས་བསྒྲེ་བཟློག་གོ། །བཅོམ་ལྡན་འདས་ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་ཞིང་མཐུ་ཆེ་བ་མཆི་བ་ཡང་བདག་གིས་ཐོགས་པར་བགྱིད་དོ། །རིའི་རྒྱལ་པོ་རི་རབ་ཀྱང་ལག་པ་ཡ་གཅིག་གིས་བླངས་ཏེ་ཚངས་པའི་འཇིག་རྟེན་གྱི་བར་དུ་འཕེན་ཏོ། །བཅོམ་ལྡན་འདས་བདག་གིས་ཀླུའི་རྒྱལ་པོ་དགའ་བོ་དང་། ཉེ་དགའ་བོ་དེ་གཉིས་ཀྱང་བཏུལ་ཏོ། །བཅོམ་ལྡན་འདས་བདག་འཇིག་རྟེན་གྱི་ཁམས་འོད་ཟེར་ཅན་དུ་ཡང་མཆིས། བདག་གིས་རི་རབ་ཙམ་གྱི་ཁམས་དེ་དག་ཀྱང་འཚལ་འཚལ་ན། བཅོམ་ལྡན་འདས་བདག་གིས་རྡོ་རྗེ་འདི་ལྟར་ཆུང་བ་འདི་བསྐྱོད་པའམ། བསྒུལ་བའི་རྔོ་ཡང་མ་ཐོག་པ་འདི་བཅོམ་ལྡན་འདས་བདག་རྫུ་འཕྲུལ་གྱི་སྟོབས་དེ་ལས་ཡོངས་སུ་ཉམས་པའམ་གཅིག་ཏུ་མ་གྱུར་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། མཽད་གལ་གྱི་བུ་ཆེན་པོ་ཁྱོད་རྫུ་འཕྲུལ་གྱི་སྟོབས་དེ་ལས་ཡོངས་སུ་ཉམས་པ་ནི་མེད་མོད་ཀྱི། བྱང་ཆུབ་སེམས་དཔའི་སྟོབས་ཀྱི་བྱིན་གྱི་རླབས་འདི་ཉན་ཐོས་དང་། རང་སངས་རྒྱས་ཐམས་ཅད་ཀྱིས་ཀྱང་རྣམ་པར་དཀྲུག་པར་མི་ནུས་ན། སེམས་ཅན་གཞན་དག་གིས་ལྟ་སྨོས་ཀྱང་ཅི་དགོས། མཽད་གལ་གྱི་བུ་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་དག་ན་རིའི་རྒྱལ་པོ་རི་རབ་ཡོད་པ་རྣམས་ནི་བསྐྱོད་པའམ། བསྒུལ་བར་ནུས་ཀྱི། རྡོ་རྗེ་འདི་ནི་ས་ཕྱོགས་འདི་ནས་བསྐྱོད་པའམ། བསྒུལ་བར་མི་ནུས་སོ། །ཚེ་དང་ལྡན་པ་མཽད་གལ་གྱི་བུ་ཆེན་པོས་གསོལ་པ། བཅོམ་ལྡན་འདས་འདི་ལྟར་རྡོ་རྗེ་འདི་འཆང་བས་གསང་བ་པའི་བདག་པོ་ལག་ན་རྡོ་རྗེ་ནི་སྟོབས་ཆེ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། མཽད་གལ་གྱི་བུ་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་ན་རི་རབ་ཇི་སྙེད་ཡོད་པ་དེ་དག་ཐམས་ཅད་རི་གཅིག་ཏུ་གྱུར་ཀྱང་དེ་ནི་གདེག་པར་ནུས་ཀྱི། རྡོ་རྗེ་འདི་ནི་གདེག་པར་མི་ནུས་སོ། །དེ་ནས་གནས་བརྟན་མཽད་གལ་གྱི་བུ་ཆེན་པོ་ངོ་མཚར་དུ་གྱུར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་རྡོ་རྗེ་འདི་འཆང་བས་གསང་བ་པའི་བདག་པོ་ལག་ན་རྡོ་རྗེ་འདི་ནི་སྟོབས་ཀྱི་ཤུགས་ཆེན་པོ་དང་ལྡན་པ་ལགས་ཏེ་ངོ་མཚར་ཏོ།