སངས་རྒྱས་ཀྱི་བྱིན་གྱིས་བརླབས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ་རྡོ་རྗེ་འདི་ནི་ལྕི་སྟེ། འདི་ལ་ངའི་བྱིན་གྱི་རླབས་མ་ཡིན་པར་རིག་པར་བྱའོ། །ཀཽ་ཤི་ཀ་འདི་ཇི་སྙམ་དུ་སེམས། རིའི་རྒྱལ་པོ་རི་རབ་ལྕི་བ་ཡིན་ནམ། གསོལ་པ། བཅོམ་ལྡན་འདས་རིའི་རྒྱལ་པོ་རི་རབ་ཇི་ཙམ་དུ་ལྕི་བ་ནི་དཔེར་བགྱི་བར་ཡང་སླ་བ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ་རྡོ་རྗེ་འདི་ནི་ལྕི་སྟེ། ཀཽ་ཤི་ཀ་གལ་ཏེ་གསང་བ་པའི་བདག་པོ་ལག་ན་རྡོ་རྗེས་རྡོ་རྗེ་འདི་རྡོ་རྗེའི་རང་བཞིན་གྱི་འཁོར་ཡུག་གི་རིལ་བསྣུན་ན་དེ་ཡང་དཔེར་ན་ཕུབ་མ་སྤར་གང་གཏོར་བ་བཞིན་དུ་རྣམ་པར་འཐོར་ཏེ། ཀཽ་ཤི་ཀ་རྡོ་རྗེ་འདིའི་སྟོབས་ཀྱི་ཤུགས་ནི་དེ་ཙམ་མོ། །དེ་ནས་ལྷའི་དབང་པོ་བརྒྱ་བྱིན་གྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་མཽད་གལ་གྱི་བུ་ཆེན་པོ་ཁྱོད་བཅོམ་ལྡན་འདས་ཀྱི་ཉན་ཐོས་རྣམས་ཀྱི་ནང་ན་རྫུ་འཕྲུལ་དང་ལྡན་པའི་མཆོག་ཏུ་བསྟན་པ་ཡིན་ན་རྡོ་རྗེ་འདི་སའི་སྟེང་འདི་ནས་ཐེག་ཤིག །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་འདི་སྙམ་དུ་བསམས་ཏེ། གལ་ཏེ་བདག་གིས་ལྷ་དང་བཅས་པའི་འཇིག་རྟེན་འདིའི་མདུན་དུ་རྡོ་རྗེ་འདི་གདེག་པར་མ་ནུས་ན་ནི་བདག་ལ་དབང་ཟ་བར་འགྱུར་རོ། །སྙམ་ནས་དེས་དེ་འདྲ་བའི་སྟོབས་ཀྱི་ཤུགས་ཀྱིས་རྡོ་རྗེ་དེ་བཟུང་བ་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་རབ་ཏུ་གཡོས་ཏེ། ཆུ་ཡང་གནམ་དུ་རྒལ་ཅིང་། རྒྱ་མཚོ་ཐམས་ཅད་འཁྲུགས་ཀྱང་རྡོ་རྗེ་དེ་བསྐྱོད་པའམ། བསྒུལ་བར་མ་ནུས་སོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་ངོ་མཚར་དུ་གྱུར་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། འདི་སྐད་ཅེས་གསོལ་ཏོ། །བཅོམ་ལྡན་འདས་བདག་བཅོམ་ལྡན་འདས་ཀྱིས་ཉན་ཐོས་རྣམས་ཀྱི་ནང་ན་རྫུ་འཕྲུལ་དང་ལྡན་པའི་མཆོག་ཏུ་བསྟན་པ་ལགས་ཏེ། བཅོམ་ལྡན་འདས་བདག་དེ་ལྟར་རྫུ་འཕྲུལ་ཆེ་ཞིང་དེ་ལྟར་དབང་ཆེ་བར་གྲགས་ལ་དེ་ལྟར་མཐུ་ཆེ་བ་ལགས་ཏེ། བཅོམ་ལྡན་འདས་བདག་གང་གི་ཚེ་འཚལ་ན་རྒྱ་མཚོ་ཆེན་པོ་བཞིའི་ཆབ་ཀྱི་ཕུང་པོ་ལག་མཐིལ་གཅིག་ཏུ་འཇོག་གོ། །བཅོམ་ལྡན་འདས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་དཔེར་བགྱི་ན་མི་ལ་ལ་ཞིག་གིས་ཀར་ཥ་པ་ཎ་གཅིག་མཛུབ་མོའི་རྩེ་མོས་བསྒྲེ་བཟློག་པ་དེ་བཞིན་དུ་བདག་གིས་བསྒྲེ་བཟློག་གོ།