ཡང་དག་པར་སྦྱོར་བ་དང་ལྡན་པ་ལ་ནི་འཕགས་པའི་རྣམ་པར་གྲོལ་བ་ཡོད་དེ། འདི་ནི་ཡོད་པ་ཞེས་བྱའོ། །དེ་ལ་མེད་པ་གང་ཞེ་ན། ལོག་པར་སྦྱོར་བ་དང་། ལྡན་པ་ལ་ནི་འཕགས་པའི་རྣམ་པར་གྲོལ་བ་མེད་དེ། དེ་ནི་མེད་པ་ཞེས་བྱའོ། །གཞན་ཡང་ལས་དང་རྣམ་པར་སྨིན་པ་ནི་ཡོད་དོ། །གང་ལས་དེ་དང་རྣམ་པར་སྨིན་པ་དང་ལྡན་པ་དེ་ནི་མེད་དོ། །གཞན་ཡང་ཀུན་རྫོབ་ཏུ་མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ནི་ཡོད་དོ། །གང་མིག་ནས་ཡིད་ཀྱི་བར་དང་ལྡན་པ་ནི་མེད་དོ། །གཞན་ཡང་བྱང་ཆུབ་སེམས་དཔའ་བརྩོན་འགྲུས་བརྩམས་པ་ལ་ནི་བྱང་ཆུབ་ཡོད་དོ། །ལེ་ལོ་ཅན་ལ་ནི་བྱང་ཆུབ་མེད་དོ། །ཕྱིན་ཅི་ལོག་ལས་བྱུང་བའི་ཕུང་པོ་ལྔ་དག་ནི་ཡོད་དོ། །རྒྱུ་མེད་པ་ལས་ཆོས་འབྱུང་བ་ནི་མེད་དོ། །གཞན་ཡང་མི་རྟག་པ་དང་། སྡུག་བསྔལ་བ་དང་། འགྱུར་བའི་ཆོས་ཅན་གྱི་གཟུགས་ནི་ཡོད་དོ། །རྟག་པ་དང་། བརྟན་པ་དང་། ཐེར་ཟུག་དང་མི་འགྱུར་བའི་ཆོས་ཅན་དང་། ཡང་དག་པར་དེ་བཞིན་ཉིད་དུ་གནས་པའི་གཟུགས་དེ་ནི་མེད་དོ། །དེ་བཞིན་དུ་མི་རྟག་པ་དང་། སྡུག་བསྔལ་བ་དང་། འགྱུར་བའི་ཆོས་ཅན་གྱི་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཡོད་དོ། །རྟག་པ་དང་། བརྟན་པ་དང་། ཐེར་ཟུག་དང་། མི་འགྱུར་བའི་ཆོས་ཅན་དང་། ཡང་དག་པར་དེ་བཞིན་ཉིད་དུ་གནས་པའི་རྣམ་པར་ཤེས་པ་དེ་ནི་མེད་དོ། །གཞན་ཡང་མ་རིག་པའི་རྐྱེན་གྱིས་འདུ་བྱེད་རྣམས་ཞེས་བྱ་བ་དེ་དག་ནི་ཡོད་དོ། །མ་རིག་པ་མེད་ན་འདུ་བྱེད་རྣམས་ཞེས་བྱ་བ་དེ་དག་མེད་དོ། །འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་བྱ་བ་དེ་ནི་ཡོད་དོ། །འདུ་བྱེད་རྣམས་མེད་ན་རྣམ་པར་ཤེས་པ་ཞེས་བྱ་བ་དེ་མེད་དོ། །རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་བྱ་བ་དེ་ནི་ཡོད་དོ། །རྣམ་པར་ཤེས་པ་མེད་ན་མིང་དང་གཟུགས་ཞེས་བྱ་བ་ནི་མེད་དོ། །མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་ཅེས་བྱ་བ་དེ་ནི་ཡོད་དོ། །མིང་དང་གཟུགས་མེད་ན་སྐྱེ་མཆེད་དྲུག་ཅེས་བྱ་བ་དེ་མེད་དོ། །སྐྱེ་མཆེད་དྲུག་གི་རྐྱེན་གྱིས་རེག་པ་ཞེས་བྱ་བ་དེ་ནི་ཡོད་དོ། །སྐྱེ་མཆེད་དྲུག་མེད་ན་རེག་པ་ཞེས་བྱ་བ་དེ་མེད་དོ། །རེག་པའི་རྐྱེན་གྱིས་ཚོར་བ་ཞེས་བྱ་བ་དེ་ནི་ཡོད་དོ། །རེག་པ་མེད་ན་ཚོར་བ་ཞེས་བྱ་བ་དེ་མེད་དོ། །ཚོར་བའི་རྐྱེན་གྱིས་སྲེད་པ་ཞེས་བྱ་བ་དེ་ནི་ཡོད་དོ། །ཚོར་བ་མེད་ན་སྲེད་པ་ཞེས་བྱ་བ་དེ་མེད་དོ།