།གསང་བ་པའི་བདག་པོ་སྔོན་གྱི་དགེ་བའི་རྩ་བ་རྣམས་ཀྱིས་འོངས་པའི་འཁོར་འདི་ཇི་ལྟར་ལྷང་ངེ་བ་ལ་ལ་ལྟོས། གསང་བ་པའི་བདག་པོ་དེ་ལ་དགེ་བའི་རྩ་བ་ལས་ཡོངས་སུ་མི་ཉམས་པར་བྱ་བའི་ཕྱིར་ཤིན་ཏུ་བརྩོན་པར་བྱའོ། །གསང་བ་པའི་བདག་པོ་ཇི་ལྟར་དགེ་བའི་རྩ་བ་ལས་ཡོངས་སུ་ཉམས་པར་མི་འགྱུར་ཞེ་ན། གསང་བ་པའི་བདག་པོ་བག་ཡོད་པར་གནས་པའི་ལྷ་དང་མི་རྣམས་ནི་དགེ་བའི་རྩ་བ་ལས་ཡོངས་སུ་ཉམས་པར་མི་འགྱུར་རོ། །དེ་ལ་བག་ཡོད་པ་ནི་སེམས་རྗེས་སུ་སྲུང་བ་དང་། ཡུལ་འདོར་བ་དང་། འདོད་པ་ལ་དགའ་བ་རྣམ་པར་སྤོང་བ་དང་། ཆོས་ཀྱི་དགའ་བ་ལ་བསྟེན་པ་དང་། འདོད་པ་ལ་རྣམ་པར་རྟོག་པ་དང་། གནོད་སེམས་ཀྱི་རྣམ་པར་རྟོག་པ་དང་། རྣམ་པར་འཚེ་བའི་རྣམ་པར་རྟོག་པ་རྣམས་ཀྱི་རྒྱུ་བ་མེད་པ་དང་། མི་དགེ་བ་རྣམས་དང་། ཚུལ་བཞིན་མ་ཡིན་པ་ཡིད་ལ་བྱེད་པ་རྣམས་ཀྱི་རྒྱུ་བ་མེད་པ་དང་། ཆགས་པ་དང་། ཞེ་སྡང་དང་། གཏི་མུག་རྣམས་ཀྱི་རྒྱུ་བ་མེད་པ་དང་། ལུས་དང་ངག་དང་། ཡིད་ཀྱི་གནས་ངན་ལེན་རྣམས་ཀྱི་རྒྱུ་བ་མེད་པ་ནས་ཉམས་པའི་ཆ་དང་འཐུན་པར་འགྱུར་བའི་ཆོས་ཐམས་ཅད་ཀྱི་བར་གྱི་རྒྱུ་བ་མེད་པ་སྟེ། འདི་ནི་བག་ཡོད་པ་ཞེས་བྱའོ། །གསང་བ་པའི་བདག་པོ་སུ་དད་པ་དང་ལྡན་ཞིང་བག་ཡོད་པ་དང་ལྡན་པ་དེས་བརྩོན་འགྲུས་གང་གིས་བག་ཡོད་པར་བྱེད་པ་དང་། དད་པར་བྱེད་པའི་ཆོས་དེ་དག་ཡང་དག་པར་སྒྲུབ་པར་འགྱུར་བའི་བརྩོན་འགྲུས་དང་ལྡན་པར་བྱའོ། །གསང་བ་པའི་བདག་པོ་སུ་དད་པ་དང་། བག་ཡོད་པ་དང་། བརྩོན་འགྲུས་དང་ལྡན་པ་དེས་དྲན་པ་དང་། ཤེས་བཞིན་ལ་བརྩོན་པར་བྱའོ། །དྲན་པ་དང་ཤེས་བཞིན་དེས་བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཆུད་ཟ་བར་མི་འགྱུར་རོ། །གསང་བ་པའི་བདག་པོ་སུ་དད་པ་དང་། བག་ཡོད་པ་དང་། བརྩོན་འགྲུས་དང་། དྲན་པ་དང་། ཤེས་བཞིན་དང་ལྡན་པ་དེས་ཚུལ་བཞིན་དུ་སྦྱོར་བ་ལ་བརྩོན་པར་བྱའོ། །གསང་བ་པའི་བདག་པོ་ཚུལ་བཞིན་དུ་སྦྱོར་བ་ལ་བརྩོན་པའི་བྱང་ཆུབ་སེམས་དཔའ་ནི་གང་ཡོད་པ་དེ་ཡང་ཡོད་པར་རབ་ཏུ་ཤེས་སོ། །གང་མེད་པ་དེ་ཡང་མེད་པར་རབ་ཏུ་ཤེས་སོ། །དེ་ལ་ཡོད་པ་ནི་གང་། མེད་པ་ནི་གང་ཞེ་ན། ཡང་དག་པར་སྦྱོར་བ་དང་ལྡན་པ་ལ་ནི་འཕགས་པའི་རྣམ་པར་གྲོལ་བ་ཡོད་དེ།