།ཚོར་བ་མེད་ན་སྲེད་པ་ཞེས་བྱ་བ་དེ་མེད་དོ། །སྲེད་པའི་རྐྱེན་གྱིས་ལེན་པ་ཞེས་བྱ་བ་དེ་ནི་ཡོད་དོ། །སྲེད་པ་མེད་ན་ལེན་པ་ཞེས་བྱ་བ་དེ་མེད་དོ། །ལེན་པའི་རྐྱེན་གྱིས་སྲིད་པ་ཞེས་བྱ་བ་དེ་ནི་ཡོད་དོ། །ལེན་པ་མེད་ན་སྲིད་པ་ཞེས་བྱ་བ་དེ་མེད་དོ། །སྲིད་པའི་རྐྱེན་གྱིས་སྐྱེ་བ་ཞེས་བྱ་བ་དེ་ནི་ཡོད་དོ། །སྲིད་པ་མེད་ན་སྐྱེ་བ་ཞེས་བྱ་བ་དེ་མེད་དོ། །སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ནི་ཡོད་དོ། །སྐྱེ་བ་མེད་ན་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་མེད་དོ། །གཞན་ཡང་སྦྱིན་པས་ལོངས་སྤྱོད་ཆེན་པོར་འགྱུར་བ་ནི་ཡོད་དོ། །སྦྱིན་པས་དབུལ་པོར་འགྱུར་བ་ནི་མེད་དོ། །ཚུལ་ཁྲིམས་ཀྱིས་མཐོ་རིས་སུ་སྐྱེ་བ་ནི་ཡོད་དོ། །ཚུལ་ཁྲིམས་ཀྱིས་ངན་སོང་དུ་སྐྱེ་བ་ནི་མེད་དོ། །ཐོས་པས་ཤེས་རབ་ཆེན་པོར་འགྱུར་བ་ནི་ཡོད་དོ། །ཐོས་པས་ཤེས་རབ་འཆལ་བར་འགྱུར་བ་ནི་མེད་དོ། །བསྒོམ་པས་འབྲལ་བར་འགྱུར་བ་ནི་ཡོད་དོ། །བསྒོམ་པས་འབྲལ་བར་མི་འགྱུར་བ་ནི་མེད་དོ། །ཚུལ་བཞིན་མ་ཡིན་པ་ཡིད་ལ་བྱེད་པ་དང་ལྡན་ན་ཉོན་མོངས་པ་འབྱུང་བ་ནི་ཡོད་དོ། །ཚུལ་བཞིན་མ་ཡིན་པ་ཡིད་ལ་བྱེད་པ་དང་བྲལ་ན་ཉོན་མོངས་པ་འབྱུང་བ་ནི་མེད་དོ། །མངོན་པའི་ང་རྒྱལ་ཅན་ལ་ནི་ཀུན་ཤེས་པ་བརྡ་སྤྲོད་པ་མེད་དོ། །མངོན་པའི་ང་རྒྱལ་མེད་པ་ལ་ནི་མྱ་ངན་ལས་འདས་པ་ཡོད་དོ། །གཞན་ཡང་ཐམས་ཅད་ཀྱི་རྗེས་སུ་སོང་བའི་སྟོང་པ་ཉིད་ཡོད་དོ། །ནང་གི་རྗེས་སུ་སོང་བའི་བདག་ནི་མེད་དོ། །ཡེ་ཤེས་དང་ལྡན་པ་ལ་ནི་ཐར་པ་ཡོད་དོ། །ང་རྒྱལ་དང་ལྡན་པ་ལ་ནི་འབྱུང་བ་མེད་དོ། །བདག་གམ། སེམས་ཅན་ནམ། སྲོག་གམ། གང་ཟག་ཅེས་བྱ་བ་གང་ཡིན་པ་དེ་ནི་མེད་དོ། །གསང་བ་པའི་བདག་པོ་དེ་ལྟར་ན་བག་ཡོད་པ་དང་། ཚུལ་བཞིན་ཡིད་ལ་བྱེད་པ་དང་ལྡན་པའི་བྱང་ཆུབ་སེམས་དཔས་འཇིག་རྟེན་ན་མཁས་པ་རྣམས་ལ་ཡོད་པར་གྲགས་པ་གང་ཡིན་པ་དེ་ནི་ཡོད་པར་རབ་ཏུ་ཤེས་སོ། །འཇིག་རྟེན་ན་མཁས་པ་རྣམས་ལ་མེད་པར་གྲགས་པ་གང་ཡིན་པ་དེ་ནི་མེད་པར་རབ་ཏུ་ཤེས་སོ། །དེ་ཡོད་དོ་ཞེས་ཐ་སྙད་འདོགས་པ་ལ་ཡང་མི་ཆགས་སོ།